Литературатодосъя валатонъёсын, Кылбугор

ЛИТЕРАТУРАТОДОСЪЯ ВАЛАТОНЪЁСЫН

КЫЛБУГОР

Азькыл интые:

Литературатодос удысын удмурт нимкылъёсты кутон

Йќскалыклэн (нацилэн) азьланьтћськемез кулэ каре кыллэсь вќлмемзэ паськытатонэз, котькуд удысъёсы пыџатэмез. Озьыен, литературатодосъя выль нимкылъёсты кылдытон туала удмурт литература понна одћгез туж кулэ луись ужпум луэ. Кылчиос-тодосчиос удмурт кыллэн азинсконысьтыз кќня ке вакытъёсты висъяло (). Литературатодос удысын но сыџе «тулкымъёсты» висъяны луоно. Татын али висъяломы кыксэ сыџе «тулкымез» – Герд вакытэз но туала вакытэз.

Кузебай Герд ог 300 ёрос выль кыл но нимкыл кылдытћз, соос пќлысь тросэз литературатодос но фольклор удысъёсын герњаськемын («Кенеш». 1926 № 3–4.). Тани кќняез ке: критик – книга улэмез дунъясь; стопа – кылбур пыд; повесть – кузь верос; рассказ – верос но о. а. Кызьы али адњиськом, тросэз соос улонэ пыџазы. К. Гердэн артэ мукет усточиос но выль нимкылъёсты утчазы, кылсярысь, Т. Борисов, А. Бутолин (конфликт – геред).

1991-тћ арын Ф. Пукроковлэн «Совтской Удмуртия» газетын поттэм нимкылъёсыз та удыслы выль шокчен сётћзы. Гожъясьчи азьвыл кылдытэм шер кутћськись валатонъёсты но чакла, аслэсьтыз малпам выль кылъёссэ но џектэ: басня – пќлльы, вымысел – асмалпам. Нимкылъёс кылдытын удысын пайдаё ужаз . Н. Байтеряковлэн кылбуретэзлы сћзем асужаз (монографияз) со нимысьтыз кылбугор сётћз. Л. Айтуганова трос тыршиз, образ интые «кылсуред» валатон улонамы мед пыџалоз шуыса. Тани солэн эшшо мукет џектонъёсыз: аслык – стиль, кылбур ёзнэт – строфа, кылбургур – ритм (Ф. Пукроковлэн – лэйкы).

Тунсыко луэ В. Ванюшевлэн но Е. Макаровалэн литературатодосысь куд-ог удыскылъёслы њуч-удмурт кыллюкамзы, кудћз «Кыл но кылбурет» гожтосазы поттэмын. Кылсярысь, метафора – укшатон, метонимия – мукетним, эмоциональный тон – мылкыдгур. Палэнэ кельтыны уг яра А. Ермолаевлэсь, А. Зуевалэсь, П. Поздеевлэсь, А. Шкляевлэсь утчанъёссэс.

Нимысьтыз пусйыны кулэ «Гужем университет–2010» проектэ пыриськись тодосчиосты но – та кылбугор бордын ужасьёсты (С. Арекеева, Г. Глухова, Т. Владыкина, Т. Зайцева, Л. Федорова, В. Шибанов). Та тодосчиос пќлысь тросэз дасязы школа понна «Удмурт литература» дышетскетъёс, котькуд книгалэн пумаз – литературатодос но фольклор удысысь нимкылъёсын кыллюкам. Ваньзэ соосты но азьвыл кылдытэм нимкылъёсты лыдэ басьтыса, В. Шибанов но солэн студентэз А. Япарова 2005-тћ арын нимысьтыз диплом уж но гожтћзы вал.

Тани али, Кастрен нимо огазеяськон юрттэмен, та бадњым ужез азинтыны выль луонлык кылдћз. Валамон ини, та ужрадэ «Гужем университет–2010» проектэ пыриськем студентъёс но кыскемын вал (В. Кондратьев, Н. Анисимов, Е. Корепанова но мук.). Мар пќрмиз – тћляд син азяды.

,

КЫЛЛЮКАМ

АБСУРД, учк. ЙЫРЧУКИНЛЫК.

ЙЫРЧУКИНЛЫК (абсурд – лат. absurdos – пќрмостэм). Чеберлыко текстысть дышем логической герЗетъёсты тИян, кудИз сэрен текстын выль пуштросъёс усьтиськыны кутско. Туала улонлэсь шимес луэмзэ валэктћсь нимкыл. Й.-ен герњаськемын постмодернизм литература, кытын текстысь люкетъёс куспын герњетъёс огшорытэмесь, валэктыны луонтэмесь. Абсурд валатонлэсь туала пушроссэ усьтћз Альбер Камю «Миф о Сизифе. Эссе об абсурде» ужаз. Озьы ик: абсурд-драма. Дэмламын на: абыршак (П. П.), йыринчукинлык (В. Ш., Н. К.).

ЙЫРЧУКИНЭС (абсурдный – лат. absurdos – пќрмостэм). Абсурд (йырчукинлык) валатонэн герњаськем тодмет. Дэмламын на: йырчукинлыко, йыринчукинлыко.

АВАНГАРД ЌР (авангардизм – фр. avant-cardisme) – ХХ-тћ даурысь лулчеберетын выль амалъёсты утчан, уката ик реализмлы «пумит мынон». Авангардизмлэсь куронъёссэ уже пычатыны тыршизы, кылсярысь, экспрессионизм, кубизм, футуризм, дадаизм, сюрреализм, озьы ик «выль роман», «абсурд драма», хепенинг но «уйбыртон» («поток сознания») литература.

АСУЛОНСЮРЕС жанр (автобиографический жанр – гр. autos – ачим, bio – улон, grapho – гожтћсько). Отчы пыро асулонсюресэз веран, мемуаръёс, дневникъёс, исповедь, сюрес вылын гожъямъёс. Автор гожтэ аслаз улонэз сярысь, соин џош улћсь адямиос сярысь, улонысьтыз пќртэм учыръёс сярысь. Кылсярысь, М. Атамановлэн берло ужъёсаз шќдћське. Удмурт литератураын асулон сярысь веран жанр берло дыре тужгес азинске. (Т. З.)

АСУЛОНСЮРЕС (автобиография – гр. autos – ачим, bio – улон, grapho – гожтћсько). Сыџе гожтос, кытын гожъямын авторлэн улон-вылонэз; матын мемуар валатонлы. Но мемуарын паськытгес возьматэмын «даурлэн шокамез», асулонсюресын – геройлэн пушдуннеез, ачиз мадись мурт. Дэмламын на: асулонгож. (Ф. П.), асулонгумыр (П. П.).

АСГОЖТОС (автограф – гр. autos – ачим, grapho – гожтћсько). Авторлэн лыдњисьёслы тодазы кельтон понна маке гожтыса кельтэмез, синпельлы гожтэмез. Чеберлыко произведениез эскеронын таџе гожтосъёс умой кивалтос луо, бадњым юрттэт сёто. А.-ёс люкан вашкала улонын ик вылэм ини, но тужгес но 16-тћ даурлэн пумаз Франциын вќлмем. Россиын А.-лэн научной (тодослыко) кулэлыкез кылдэ 19-тћ даурлэн пумаз – авторствоез эскерон пумысен. Киужъёсты (рукописьёсты, черновикъёсты) гожтон џемысь бадњым инты басьтэ чеберлыко произведенилэсь «творческой сюрессэ» чакланын.

АСДУНЪЕТ (автокритика – гр. autos – ачим, kritikе – дунъяны быгатон). Авторлэн ас гожтэм произведенизэ эскеремез, дунъет сётэмез. А. џемысь юрттэ критикъёслы произведенилэсь пуштроссэ мургес валаны. А. пумиськылэ гожтэтъёсын, асулонсюрес гожтосъёсын, азькылъёсын, берловеранъёсын. Кылсярысь, Л. Нянькина «Ау-ау! яке инбамысь гожъёс» повестезлэн кутсконаз ужезлы таџе асдунъет сётэ: «Та повестьме гожтыны пукси но – табере ачим но уг валаськы кыџе художественной амалэн сое гожтыны… Азьло ик шќдћсько ни: критикъёс пыкылозы шаблонно повесте понна, лыдњисьёс кесёзы, предложениосы њуч конструкцияя кошко шуыса…».

АВТОМЕТАФОРА (автометафора – гр. autos – ачим, metaphora – выжтћсько). Сыџе метафора, кудћз пыр герой ассэ ачиз возьматэ. Вакыт ортчемъя, герой (соин џош кылбурчи но) ассэ ачиз выль сямен дунъяны быгатэ. Поэтлэсь автометафораоссэ эскерыса адњоно, огвакытэ со ассэ љуась тылэн џошатэ, мукет вакытэ – шундыен, нош куиньметияз – сильтќлэ;, юнме шорысь ќвќл со. Дэмламын на: асятвылтэт (П. П.).

АВТОР (автор – гр. autos – ачим). Текстэз кылдытћсь, кудћзлэн дунне шоры учконэз (дуннеучконэз) чеберлыко гожтосын возьматэмын. «Теория автора» школа-ќрлэн дышетэмезъя, «авторез» ќвќл сурано биографической авторен, кудзэ «зэмос автор» ниманы луоно.

АВТОР-МАДИСЬ (автор-повествователь). Текстысь герой, кудИз маде эпосын ортчись учыръёс сярысь. Мадись мурт – чемгес адями, но со интыын мукет субъектъёс но (кылсярысь, пойшуръёс) луыны быгато.

КЫЛДЫТЋСЬ, учк. АВТОР.

АВТОРИЗАЦИ(Я) (авторизация – гр. autos – ачим). Авторен кенешыса, солэн чакламез улсын произведенилэсь туссэ воштон яке мукет кылэ берыктон. Џемысь пусйиське таџе кылъёсын: «Кыџе ке кылысь авторизировать карем берыктон».

АВТОРЛЭН ВЕРАМЕЗ (авторская речь). Чеберлыко текстысь сыџе кылъёс, кудъёсыз пыр автор шонерак, аслаз синмыныз геройёсыз шоры учке но соосты дунъя, ужпумъёсты, инкуазез, ужрадъёсты суреда. Куддыр авторлэн кылыз возьматћськись учыръёсын яке адямиосын герњаськемын уг луы. Отын автор мылкыдзэ возьматэ, гожтосэзлэсь пуштроссэ паськытатэ. Авторлэн кылызлы луыса, лыдњись син азяз гожтћсьлэсь но туслыксэ пуктыны быгатэ.

АКМЕИЗМ (акмеизм – гр. akme – малэн ке выћи љуждалаез, сяськаяськись кужым). Россиысь 20-тћ даурлэн кутсконаз кылбурет удысысь сыџе ќр, кудћз символизмлы пумит султэ но «валамон» кылбур гожтонэз кулэ каре (Н. Гумилев, А. Ахматова, О. Мандельштам). А.-ын котькуд кыллэн вань аслаз шонерак валатонэз. А.-лэсь манифестсэ «О прекрасной ясности» М. Кузьмин гожтћз.

АКРОМОНОГРАММА (акромонограмма – гр. akros – пумысь, дурысь, mono – одћг). Кылбур, кудаз чурлэн берпуметћ слогез мукет чурлэн слогеныз огкадь луэ. Вќлмемын А., кытын «кутскон рифма» вань:

Ми Тимош дядяймылы

Ыстћськом салам. (Г. Ходырев).

АКРОКЫЛБУР (акростих – гр. akros – пумысь, дурысь, stichos – кылбур). Сыџе кылбур, кытын котькуд чурысь нырысетћ букваос кыџе ке кыл яке кылтэчет кылдыто. А. џемысь кинлы ке сћзьыса гожтћське, соку нырысетћ букваос сизёно муртлэсь нимзэ возьмато. А. тодмо ни асьме вапумлэсь азьло 6-тћ даурысен. Вашкала грекъёс А.-ез прозаын но куто вылэм. Алла таџе акрокылбур гожтћз:

Эрико ќръяськод чуръёстэ,

Рифмаен герњатэк – маратэк.

Ичиез љог тубе тубаттћ,

Катьтэмме уноез тубытэк.

Бичатэ, горытэ, бќрњытэ

Аспќртэм тумошо образэд,

Тузонэз тузыса пурњытэ.

Укылтэм вешасьись уйшоред –

Егит ныл ке али мон лусал,

Вунонтэм дыръёсме кузьмасал.

СЛОГВИСЪЯН (акцент – лат. accentus – ударение). 1) Учк.: «ударение». 2) Мукет калыклэн кылыныз вераськыку кылћськись дышымтэ куараверан (произношение). 3) Пус, кудћныз ударение возьматћське. 4) Крезьгурын: куараез воштон. Дэмламын на: висйым (Ф. П.).

АЛЛЕГОРИЯ (аллегория – гр. allos – мукет, agoreuo – мон верасько). Ватэм пуштросэн кылсуред-образ кылдытон амал, кылбуретын одћг тодмо кылсуред пыр мукет кинэ ке яке мае ке суредан: њичы пыр – кескич адямиез, луд кеч пыр – кышкась адямиез; адямилэн киосысьтыз вож улвай азьло дырысен тупаса улонэз возьматэ. А. кутћське литератураын, суредаськонын, скульптураын, фольклорын (пудо-животъёс сярысь выжыкылъёсын). А. пуштросэн кылдытэмын пословицаос, поговоркаос, калык кырњанъёс. Дэмламын на: ятвылтэт (П. П.), амалкыл, визьсынкыл (Ф. П.).

АЛЛИТЕРАЦИЯ учк. ЧУРЫТ КУАРАШУДОН

ЧУРЫТ КУАРАШУДОН (аллитерация – лат. al – бордын, вќзын, litera – буква). Куарагурлэн одћг йосэз (видэз), кытын кылбурын огкадь куараосты трос пол куто нимаз куараосты висъян понна: «Куџо коџо кыџыртэ» (И. Гаврилов). К но Џ куараос юртто коџо куараез кылћськымон карыны.

АЛЬМАНАХ (альманах – араб: «аль-манах» – календарь). Пќртэм гожъяськисьёслэсь ужъёссэс огазе люкаса поттэм бичет (журнал). Гожтосъёс отчы огазеямын луыны кулэ кыџе ке огъя тодметсыя (темазыя, жанрзыя, валтћсь малпанзыя). Кылсярысь, «Шундыкар куараос» литературно-творчекской альманах (2003, № 10), кытын 2003-тћ аре «Шундыкар» лагере ветлэм пиналъёслэн ужъёссы печатламын; озьы ик УдГУ-ысь студентъёслэн «Вуюись» (2003) альманахсы.

АМФИБРАХИЙ (амфибрахий – гр. amphibrachys – кыкналасянь вакчи). Куинь слогъем кылбур мертэт, кытын ударение кыкетћ слог вылэ усе (__ __ __):

Шампанской, мќзмись ныл сюлэм кадь

Уг тэры куско чаркае,

Нош тон, кинэ ке витись мурт кадь,

Мќзмыт учкиськод укное. (Л. Кутянова).

СЭРТТОН-ПЕРТЧОН (анализ – грек analusis – люкылон, сэрттон) – 1) Быдэслыкез люкетъёслы ёзнан но эскерон – сэрттон-пертчон. 2) Џемысь луэ «исследование» кыллы синоним – эскерон. Та юанлы сётоз валэктон текстэз интылык ласянь нимысьтыз сэрттон-пертчон.

АНАГРАММА (анаграмма – гр. anagrammatismos – куараосты интыенызы воштон). Кылысь куараослэсь радзэс воштыса мукет кыл пќрмытон. А. кутћське кылбуръёсын но, соос пыр кыллэсь валатонзэ мукетгес карыса: њольгыри – њоргыли.

АНАКРЕОНТ КЫЛБУРАН (анакреонтическая поэзия). Антика кылбуранын шулдыръяськонъёсты, капчи улонэз, юондыръёсты данъяса кырњан. Та кылбуран нимамын вашкала грек кылбурасьлэн Анакреонтлэн нимыныз, со љќксьќр (юондыр) кырњанъёс гожъя вал.

АНАПЕСТ (анапест – гр. anapaistos – берыктэмын). Куинь слогъем кылбур мертэт (размер), кытын ударение берпуметћ слог вылэ усе

(__ __ __):

Кемалась, кемалась, вашкала дыръёсы –

Зундэсъёс, чигвесьёс кылдылон аръёсы… (М. Петров «Италмас»)

АНАФОРА, учк. ОГКУТСКОН.

ОГКУТСКОН (анафора – гр. anaphora – берыктћськон). Кылбурын ритмической радъёслэн кутсконазы кыџе ке но ёзэтъёслэн огвыллем яке огкадь луэмзы, кудиз вылтуссыя ик адњиське. Куд-ог кылбуръёсын О. кылдэ, котькуд чурын нырысетћ букваос огкадесь ке.

Макем секыт вуыны,

Макем секыт кошкыны,

Макем секыт шедьтыны,

Макем капчи ыштыны. (Л. Кутянова)

Тодмо на синтаксис, стилистика яке куара чотын (звуковой) кылдытэм О. Дэмламын на: џошкутскон.

АНЕКДОТ, учк. ПАЛЬЫШТЫК

ПАЛЬЫШТЫК (анекдот – гр. anekdotos – поттымтэ, печатламтэ). Серемес учыр сярысь вакчияк мадёс, кудћз одно ик кылзИсез серектытыны кулэ. Џем дыръя улонысь учыръёс ик П. луыса кутћсько но верасько. Автор произведенияз но П. кутыны быгатэ. Со котырын шќдиськись мылкыдъёсты, геройлэсь характерзэ лыдњисьлы яркытгес возьматыны юрттэ. Калыклэн гурак! серектылэмезъя тодмо ни вал, отын Чупыргы нош ик пальыштыкъёссэ вера шуыса (В. Ш.). Дэмламын на: маскари, серем пырыос, серембур, лэчыт чуръёс, юмокан, мактаськон, горекъян, серемкыл, тумошо мадь, бичатћсь кылос, маскара мадь, мынялтон, мынектон, мынялтод, пќйкыл, серемес мадь, маскаран, горан, пќллет, могдэт, куальтыран, мынекмадь, сереми, горыштык, горан, пальышмадь, маскаран (Кенеш. 2002. № 5–6).

АНТИТЕЗА, учк. ПУМИТПУКТОН.

ПУМИТПУКТОН (антитеза – гр. antithesis –пумит пуктон). Кылсуредъёсты-образъёсты, учыръёсты яке гожтослэсь люкетъёссэ меџак ваче пумит пуктон амал. П. паськыт вќлмемын калык кылосын, озьы ик литератураысь пичи жанръёсын: Трос тодод – вазь пересьмод. Дэмламын на: вачепуктон (Ф. П.).

АНТИТЕЗИС (антитезис – гр. antithesis – пумит пуктон). Логикаын тезислы ваче пумит луись суждение. Учкы озьы ик: «сонет». Дэмламын на: вачеитэт (Ф. П.), пумиткужым.

АНТИКА УСТОЛЫК (античное искусство). Вашкала Римысь но Грециысь лулчеберетэз но усотолыкез нимась валатон.

БЫРЪЕТ, учк. АНТОЛОГИ(Я).

АНТОЛОГИ(Я) (антология – гр. anthologia – буёлъёс люкан). Пќртэм авторъёслэсь чеберлыко гожтосъёссэс люкаса поттэм бичет, быръет. Џемгес быръем веросъёсын но кылбуръёсын луэ бере, нимано: ВЕРОСБЫРЪЕТ, КЫЛБУРБЫРЪЕТ. А. тодмо ни асьме вакытозь нырысетћ даурысен вашкала Грециысен. Россиын вќлмиз 19-тћ даурысен. Г. Романоваен дасям Удмурт верослы сћзем антологилэн нырысетћ томаз пыртэмын Октябрь революции бере кутскыса 60-тћ аръёсозь гожтэм вакчи жанръем гожтосъёс.

АДЯМИМЫТОН, учк. АНТРОПОМОРФИЗМ.

АНТРОПОМОРФИЗМ (антропоморфизм – лат. аntropho – адями, morphe – тус, пуштрос). Улэп макелы, пќйшуръёслы, кизилисузьетъёслы адямилэсь тодметъёссэ сётон. Озьы ик калык кылосын портэм лулъёсты, пойшуръёсты, будосъёсты вылтуссыя адямилы кельшытон, адями манеръёсын но сямъёсын возьматон.

АПОКРИФ (апокриф – лат. apokryphos – лушкем). Вашкала осконэн герњаськем (религиозной) дауркылъёс-мадесъёс, кудъёсыз священной писаниез ас сяменызы азьланьто. Черк соосыз шонертэмен лыдъя но соослэсь куштћське. А. вылын С. Есенинлэн тросэз кылбуръёсыз кылдытэмын.

АРТЕФАКТ (артефакт – лат. artefactum – искусственно лэсьтэм). Кыџе ке тодмет яке кылдытэт, кудћз эскероно маке (объект) понна эсэп-норма уг луы. Дэмламын на: кылдытэт.

ВУЖКЫЛ (архаизм – гр. arhaios – вужмем). Сыџе кылъёс но фразаос, кудъёсыз нимало вашкала улонысь вужмем арбериосты но учыръёсты. Куд-огез со вунэм кылъёс выльысь кутћськыны кутско. Кылсярысь, Флор Васильев выльысь пыртћз вераськонамы вуж толэзь нимъёсты: южтолэзь, тулыспал, коньывуон но мкт.

АРХЕТИП, учк. ВУЖИНКЫЛ.

ВУЖИНКЫЛ (архетип – гр. arcye – кутскон, typos – образ). Вашкала улонэн но пушдуннеен герњаськем валатонъёс, кудъёсс туала пуштросэн кутиз . Туж вашкала (первобытной) вапумъёсысь вуэм образ, учыр, суред. Герњаськемын мифдуннеен, соин ик В.-ёслэн пуштроссы (семантиказы) котыр ласянь узыр, куддыръя туала визьмын валэктонтэм. Кылсярысь, бур пал ярдурысь палляназ выжон огдыре возьматэ на сопал дуннее выжемез, кулонэз. Удмурт кылбуретын В. луыса паськыт волмемын ву, шунды, чын, бус, трос пќйшуръёс (юсь, вал, пуны), писпуос (кыз, кызьпу, пужым), буёлъёс но мукет.

АССОНАНС, учк. ОМЫРО КУАРАШУДОН.

ОМЫРО КУАРАШУДОН (ассонанс – лат. assonare – тупатыны). Кылбур чурын, строфаын, веранын огкадь гласной куараосты кутон. Куараосты џемысь огкадь кутон веранэз валамонгес висъяны юрттэ. Џемысь огкадь луо ударение улын сылћсь куараос.

ЛЭЧЫТВЕРАН (афоризм – гр. aphorismos – усьтыны, висъяны). Вакчи веран, кудћз пушкы ватэмын маке сярысь мур малпан. Прозалэн ас кужымо жанрез луэ. Котькуд веранэз кыџе ке нимаз пуштросо макелы пќрмытэ. Чебер, вольыт вылкабын-формаын авторлэн огъяса верам малпанэз меџак адњиське. Пословицалэсь Л. висъяське соин – авторез тодмо. Кылсярысь, А. Комаровлэн куд-ог лэчытверанъёсыз: «Ческыт љукез нушыен сураса уг пќзьто». Яке: «Сазь йырын люгы пќлы уг пыро». Дэмламын на: вакчи визьверан, вакчи чуръёс.

БАЛЛАДА (баллада – ит. ballare – эктыны). Лиро-эпической жанрлэн одћгез вылкабез (формаез) луэ. Б. – сюжето кылбур, со кылдэмын героической, фантастической яке огшоры улонысь паймымон яке тунсыко учыръёс вылын. Џемысь со мадьгож историен герњаськемын луэ, яке калыклэн осконъёсысьтыз басьтэмын.

БАСНЯ, учк. ПЌЛЛЁН.

ПЌЛЛЁН (басня). Вакчи сюжето кылбур (куддыръя верос), аллегория пуштросъем; текстын сётћське мораль, улонлы дышетон. Геройёсыз џемгес луо пќйшуръёс но пОртэм арбериос, соос пыр адямослэн урод сямъёссы, улонысь тырмымтэос серекъямын. Тросэзлы тодмо А. Лужанинлэн «Сюмъё но Падыш», «Пужым но Ньылпу» но мукет пќллёнъёсыз. Дэмламын на: нодъясь кылбур.

БЕЛЛЕТРИСТИКА (беллетристика – фр. вelles letters – чебер кылос). Кыпчи пуштросъем чеберлыко проза (поэзия но драматургия отчы уг пыро), кудзэ «массовой» литература шуыны луэ. кичолтэмен, Б. улсын валаны кутскизы капчиен лыдњиськонэз, сое «серьёзной» литературалы пумит пуктыса. Беллетризация – со тодослыко-документальной макеез чеберлыко но тунсыко мадьгож пыр гожтон амал.

ТЌДЬЫ КЫЛБУР, учк. РИФМАЯМТЭ КЫЛБУР.

РИФМАЯМТЭ КЫЛБУР (белые стихи). Рифмаостэк гожтэм кылбур. Паськыт вќлмемын вал њуч кылбуранын 18-тћ дауре. Џошатэ озьы ик: «свободный стих» – эрико кылбур, но верлибр). Г. Романовалэн кылбуръёсыз «тќдьы» кылбур кадь, со ик монэ шугъяськытэ (А. П.). Дэмламын на: «тќдьы» кылбур.

БИБЛИОГРАФИ(Я) (библиография – гр. biblio – книга, grapho – гожтыны). Кыџе ке ужпумлы сћзем книгаослэн, статьяослэн сузьетсы (ќвќл сурано «уже кутэм литератураен»). Дэмламын на: книгатугоко, книганим, книгабугор.

БИОГРАФИ(Я), учк. УЛОНСЮРЕС.

УЛОНСЮРЕС (биография – гр. bio – улон, grapho – гожъясько) – УЛОНСЮРЕС. Одиг адямилэн улонэзлэн сюресэз (историез), кудзэ муктыз адями гожтИз. Литературатодосын эскеро гожъясьчиослэсь (писательёслэсь) улонсюрессэс. Джек Лондонлэн улонсюресэныз тодматћз Вячеслав Михайлов (радиоверанысь).

БУРЛЕСК (бурлеск – ит. burla – серектон). Повествовательной кылбурен гожтэм серемес веран, кытын данъямон тема пышкылон пыр возьматћське. Озьы Антика вакытысь кылбурчилэсь Верглийлэсь «Энеида» поэмазэ француз кылбурчи Скарон 17-тћ дауре воштыса гожтэ. Воштэмаз гожтосын инмаръёс базарысь вузкарисьёслэн кылынызы верасько. Дэмламын на: маскаран.

ИШАНКЫЛ (быличка). Фольклорлэн жанрез: улонысь осконтэм учырез зэматыса веран, куке герой сьќд кужымъёсын (вумуртъёсын, уртъёсын но мкт.) пумиськоно луэ, югдур урод учырен йылпумъяське.

ВАРВАРИЗМ (варваризм – лат. barbarus – мурт музъемысь). Вордскем кыллы тупасьтэм, мукет кылысь басьтэм кыл яке веран. Тужгес трос варваризмъёс пумисько серемес жанръёсын.

АЗЬКЫЛ (введение, вступление). Гожтослэн кутсконаз азьвыл ортчем учыръёс сярысь вакчияк ивортон. Чеберлыко литератураын А.– со лыдњисез љутоно ужпуме выжытон, отын автор геройёс сярысь ивортэ, конфликтэз мытМсь ужпумъёсын тодматэ. Дэмламын на: пыртон.

ВЫЖЫКЫЛ, учк. ПОРТМАНКЫЛ.

ЭРИКО КЫЛБУР (свободные стихи). Пќрмемын пќртэм кузьдалаё чуръёслэсь, метрической туссы одћг кадь. Россиын вќлмиз 18-тћ даурысен. Џемысь со гожтћське ямбен. Гожъясьчиос Э. к.-ез куто басняосын, драматургиын, поэмаосын, лирической кылбуранын: «Тћ учкелэ / Музъем шоры / Њечгес…». Дэмламын на: эркын кылбур (Ф. П.).

ВОЗРОЖДЕНИЕ, учк. ЏУКДАУР.

ЏУКДАУР (Возрождение, Реннесанс). Италиын 14–16-тћ, оглом Европаын 15–16-тћ дауръёс, Шор-дауръёсысь Выль-дауре выжон. Антика вакытысь лулчеберетэз выльысь «љутон», «сайкатона вакытысь тужгес но тодмо адямиос: Данте, Леонардо да Винчи, Рафаэль, Сервантес, Петрарка, Шекспир. Дэмламын на: Выльысьмон (Ф. П.).

ДЫР литератураын (время в литературе), учк. озьы ик: «хронотоп». Чеберлыко текстысь ортчиз дырез озьы ик аспортэмлыко героез сямен учкыны луэ. Одћг быдњагем текстъёсын Д. пќртэм сямен кыстћськыны быгатэ: кудаз – трос аръёс џоже, кудаз – кќня ке нунал џоже, нош кудаз – кќня ке секунд. Ваньмыз со чеберлыко текстлэн валтћсь малпанэныз но ёзсОзнэтэныз герњаськемын. Дэмламын на: вакыт, сэр.

ВУЛЬГАРИЗМ (вульгаризм – лат. vulgaris – лякыттэм). Вераськонысь умойтэм кылћськись кылъёс, кудъёсыз литературной кылэ уг пыро. Автор произведенияз соосты кутэ малпанэз яке кыџе ке героез яркытгес возьматон понна. Куд-ог В. кылъёс дыр ортчемъя умойгес пуштросэн но кутћськыны кутскыло.

АСМАЛПАМ (вымысел). Со, мар асэныд, ас фантазиеныд малпамын. Дэмламын на: выльмалпам, ќвќлзэ возьматон (Ф. П.).

ГЕКЗАМЕТР (гекзаметр – гр. hexametros – куать кылбурвамышъем). Антикаысь кылбуранын тужгес но паськыт вќлмем кылбуркаб. Кылсярысь, Гомерлэн «Илиадаез» но «Одиссеяез» – со куать кылбурвамышъем дактиль.

ГЕРОИКА (героика). Удмурт героика – со Идна, Калмез, Донды но мукет батыръёслэн вормонъёссы, дано ужъёссы сярысь кылбуран. Дэмламын на: батырлык.

ВАЛТЋСЬ ГЕРОЙ (главный герой). Чеберлыко гожтосысь сыџе герой (адями, но озьы ик кыџе ке пќйшур, арбери но луыны быгатэ), кудћз борды ваньмыз сямен валтћсь учыръёс бинисько. «Положительный герой»-ез 1935-тћ арын потэм «Удмурт литератураяз» А. Бутолин нима: «азинэс герой».

КУНКРЕЗЬ (гимн – гр. humnos – данъяса кырњан). Љутскем, торжественной мылкыдын данъясь, ушъясь кырњан. Кунлэн символэз луэ (гербен но куншетэн артэ). Дэмламын на: кунгур.

ГИПЕРБОЛА, учк. БАДЊЫМАТОН.

БАДЊЫМАТОН (гипербола – гр. hyperbole – укыр бадњыматон), кылэз чеберман амал, куке кылсуред укыр бадзыматыса яке мултэс кужмоятыса возьматэмын.. Ваче пумит луэ лилота – укыр пичиёмытон. Кылсярысь, М. Худяков «Дорвыжы» эпосысь оглюкетаз Сьќлта батыр Б. амалъя юртлэсь липетсэ киыныз љутэ но сое укноез сямен усьтэ.

ЙЫРЕТ (глава, оглавление). Книгалэн, статьялэн оглюкетэз. Дэмламын на: йыръет, йыръян.

ГРАФОМАНИ(Я) (графомания – гр. grapho – гожтћсько, mania – кельше, яра). Инкуазен сётымтэ быгатонлыкен адямилэн гожъяськыны яратэмез. Со џемысь озьы луэ гожъяськон уж ваньмызлы капчиен сётћське шуыса малпан бордысь, озьы ик, куке адями аслэсьтыз быгатонлыкъёссэ зэмез сярысь тросэнгес малпа. Графомания џем дыръя кылдэ издательство удысын ужасьёслэн, яке «тодмо нимо» адямиослэн гожъяськоназы.

ГРОТЕСК (гротеск – фр. grotescue – тумошо, серемес). Кылсуред, кытын огинэ биниськемын фантастика, зэмлык н карикатура. Дэмламын на: зэрпаллык.

ДАДАИЗМ (дадаизм – гр. daga – пулэсь лэсьтэм вал; пичи пиналлэн валантэм бОтьыртэмез). Љытпал Европаысь литератураын но искусствоын одћгез авангард Ор. Со возьматћське валантэм куараосын яке кылтэчетъёсын, суредъёсын, пќртэм арбериосын. Нырысетћ Дунне ожгар бере (1920-тћ аръёс) дадаистъёс Франциын выжо сюрреализм ќре, нош Германиын – экспрессионизме.

ДАКТИЛЬ (дактиль – гр. daktylos – чиньы). Куинь слогъем кылбур мертэт, кытын ударение нырысетћ слог вылэ усе ( __ __ __):

Кин возьмалоз таосты,

Каракаен ошенды?

Марзы меда тырмымтэ?

КЫКТОС (двойник). Текстысь геройлэн кыкетћ «Жыныез», кудћз нимаз улэп геройлы пќрмытэмын. Кылсярысь, Ф. Достоевскийлэн гожъямъёсаз. Ќвќлтэм (фантастической) «кыктос» сяна, «кыктос» луэ на реализмо текстъёсын но. Игн. Гавриловлэн «Вордћськем палъёсын» книгаяз С. Климов но, В. Камашев но огдыре ик «ачиз автор вылысь» суредамын. А. Блоклэн кылбуръёсаз сямен ик, М. Федотовлэн но чуръёсысьтыз пумиськылћсь К. џемгес возьматэ аслэсьтыз геройлэсь пеймыт вужерзэ, пумитсуредзэ. Дэмламын на: кыкто (М. Ф.), палдос.

ШУДОНЌР (действие). 1) Спектакльын, пьесаын быдэсмем люкет (=акт). 2) Драмаын но эпосын – ваньмыз учыръёс, кудъёсыз сюжетэз азьланьто. 3) Ортчись учыръёс. «Эбга» трагедиысь шудонќр ортче Х–ХII дауръёсы. Дэмламын на: учырлык.

ДЕКОНСТРУКЦИ(Я), деконструкционизм (деконструкция – лат. deconstitutio – сэрттон) . Философиын но культуратодосын герњаськемын Жак Дерридалэн (фр.) нимыныз. «Конструкциез», кыкто оппозициосты, текстлэсь ёзсознэтсэ но озьыен структурализмез «пушласянь куашкатон», сое улонлы матэ карон. Кылсярысь, феминизмын тодмо текстэз выль сямен лыдњон, пиосмурт интерпритациез (валэктонэз) тћяса; со понна, кылсярысь текстэз «пумитъяськись» нылкышно-героинялэн синмыныз валэктоно, лыдњоно. Дэмламын на: сэрттон.

ДЕСКРИПТИ(Я) АМАЛЭН (дескриптивный, описательный – лат. descriptio – суредан). Кыл конструкция, кудћз воштэ (валэктэ) кыџе ке валатонэз (со, кудћз...; сыџе…, куке...). Кылын валэктон амалэн, кылсуредан амалэн.

ДЕТАЛЬ ЧЕБЕРЛЫКО (деталь художественная – фр. detal – чыры-пыры). Текстысь сыџе чыры-пыры, кудћз чик но чыры-пыры уг луы, угось кылсуредэз син азе умойгес пуктыны юрттэ. Со гожтослэсь пуштроссэ но малпаськон мылкыдэз воштыны быгатэ.

"ЛУЛ ПОЛЭСТЋСЬКОН" («диалектика души» – гр. dialektike – вераськонэз азьланьтыны быгатон). Адямиослэсь пушдуннезэс (психологизэс) возьматон амал, кудћз герњаськемын Л. Толстойлэн утчанъёсыныз.

ДИАЛОГ, учк. ВАЧЕКЫЛ.

ВАЧЕКЫЛ (диалог – гр. dialogos – ваче вераськон). Кык яке тросгес геройёслэн куспазы вераськемзы. Геройёс куспын ваче вераськон сыџе умой лэсьтэмын – романлэн та интыез зэмос драмалы укша (В. Ш.). Дэмламын на: вераськон, вачевераськон, џошенкыл.

ВАКЫТЭН ГЕРЊАСЬКЕМ (диахронный – гр. dia – пыртћ, chronos – дыр). «Дыр пыртћ кыстћськись», история кылдытћсь, историен герњаськем. Дэмламын на: вакыткуараё, вакытпыр.

ДИДАКТИКА литератураын (дидактика в литературе – гр. didaktikos – дышетћсь). Улонлы дышетись, визьнодась литература, кытын зэмос чеберлыко палыз ожытак палэнэ кыле. Татын эскерисько сыџе текстъёс но, кудъёсыз асьсэлы наука удысысь огъя тодон-валанъёсты возьматон ужпум пукто. Кылсярысь, М. Ломоносовлэн «Шувалов графлы пиялалэн кулэлыкез сярысь вазиськон»-эз. Д. л. Чукшор (Восток) но, Љытшор (Запад) но литератураосын умой вќлмемын. Антикаысь литератураын таџе гожтосъёс асьме вакытозь 7-тћ дауръёсы кылдћллям ни – Гесиодлэн, Лукрецийлэн ужъёсазы. Куддыр В. л. пќлы пырто нодкылъёсты (притча), пќллёнъёсты, сатираез. Дэмламын на: визьнодан, нодъянлык.

ДИСКУРС (дискурс – лат. discursus – чаклан, малпаськон). Герњаськемын француз тодосчилэн Мишель Фуколэн нимыныз. Огласянь матын «письмо-процесс» валатонлэн одћгез пуштросэзлы: утопилэн Д.-эз, ХХ дауршорысь Франциысь дышетћсьёслэн Д.-сы но мкт. Паськыт пуштросэн: «со, мар гожтэмын». 1980-тћ аръёсысь нылкышно дискурслэсь аспќртэмлыксэ эскеронлы сћземын (Л. Ф).

МАКТАНГУР (дифирамб – гр. dithyrambos). Мултэс ушъян; кылдэмезъя со – Дионис инмарез данъяса культовой кырњан. М.-ты калык шулдыръяськонъёсын хор кырња вылэм. М. тодмо асьме вапумлэсь азьло 6–5-тћ дауръёсысен. Со бќрсьы М. луиз данъясь-ушъясь кырњан, яке веран, кудћз матын одалы но гимнлы. Будэтъяса, мултэссэ ушъяса веранэз асьме аръёсы пышкылыса «дифирамбъёс кырњаны» шуо. Тросэз кылбурчиос соку Сталинлы сћзем мактангуръёс гожтћзы (В. Ш.).

ДОКУМЕНТАЛЬНОЙ ЖАНР литератураын (документальный жанр в литературе). Зэмос ортчем учыр вылын кылдэм чеберлыко текстъёс. Та жанрлэн кабъёсыз луо: мемуаръёс, дневникъёс, гожтэтъёс. Авторъёс учыръёсты шонер возьматыны тыршо, но дыр ласянь жот-жот радъяло (таин со висъяське чылкак чеберлыко яке чылкак документальной гожтосъёслэсь). Озьы ке но, пушдунне (психологической) тодметъёсынызы, субъективной учконэнызы матын луо чеберлыко литертатуралы (озьыен, висъясько историяя книгаослэсь но наука удысъя эскеронъёслэсь).

ДОЛЬНИК, учк. ЧУТЋСЬ КЫЛБУР.

ЧУТЋСЬ КЫЛБУР (дольник, паузник). Силлабо-тоника но чылкыт-тоника вискысь кылбуран амал, куке кужмо слогъёс вискын ляб слогъёс сураськыса кутћсько (яке 1, яке 2 луо). Чутћсь кылбур жанр геройлэсь пушдуннезэ усьтыны бадњымесьгес луонлыкъёс сётћз.

Сильтќл но љужыт вырйылэз энера,

Бќрсяд шуласа ворттэ. (В. Романов)

Татын «шуласа» но «ворттэ» кылъёс вискын одћг слог уг тырмы, кылбургур амфибрахийлы мед пќрмоз шуыса. Но В. Романов озьы юромо каре –лыдњись та интые мед «чутылоз», малпаськыны кутскоз.

ДРАМА (драма – гр. drama – маке лэсьтон). 1) Литературалэн одћгез валтћсь дћнез, кытчы пыро на эпос но лирика. 2) Сцена вылын возьматыны гожтэм текст, кудаз сюжет азинске геройёслэн куспазы вераськемзы улсын. Озьы ик жанр, кудћз висъя сое трагедилэсь но комедилэсь. Драма ас пушказ трагедилэсь но, комедилэсь но тодметъёссэ басьтыны быгатэ. Дэмламын на: позырет, позырбыд.

ДРАМАТИЗМ, учк. ДАРТКУСЫП(ЛЫК).

ДАРТКУСЫП(ЛЫК) (драматизм). Текстысь (озьы ик улонысь) учыръёслэн њырдаса, огыр-бугыр но лэчыт луыса азинскемзы (напряженность действия). Омель но Деми вискысь дарткусыплык сыџче секыт югдуре вуттэ – Омель пияшез пытсэт сьќры пуктоно кариське (В. Ш.).

ЖАНР (жанр – фр. Genre – йОс). Устолыклэн котькуд удысаз дауръёс џоже кылдэм люкылон, кудћз текстлэн кабеныз но, пуштросэныз но герњаськемын. Эпослэн жанръёсыз – роман, верос, выжыкыл но мкт.; лирикалэн – ода, элегия, кылбур, ноктюрн но мкт., драмалэн – трагедия, драма, комедия, водевиль но мкт. Озьы ик жанръёс висъясько суреданын, музыкаын, эктонын, мукет удысъёсын. Жанръёслэн сознэтсы – жанровая система. Дэмламын на: удыс, асќр, ќр.

ЖАРГОН (жаргон – фр. jargon – капчи вераськон). Кыџе ке мерлыко огазеяськонлэн (социальной группалэн) аслаз кылыз, кудћз џемысь та огазеяськонэ пырисьтэмъёслы валантэм луэ. Паськыт вќлмем жаргон кылъёссы трос: базарын вузкарисьёслэн, лушкаськисьёслэн, студентъёслэн, солдатъёслэн. Куд-ог жаргон кылъёс вылтуссэс воштыса огъя вераськон кылэ пыро. Ж. кутћське персонажлы яркытгес харктеристика сётон понна.

НЫЛКЫШНО РИФМА, учк. РИФМА.

МЫТЭТ (завязка), учк. СЮЖЕТ. Дэмламын на: кутскон, кутскет, сэран, «сэрттћськон».

ЙЫРЪЕТ (Л. К.) , учк. ЙЫРЕТ.

ПЕЛЛЯСЬКОН (заговор). Веран, кудћз быгатэ, вашкалаослэн оскемзыя, адямиез эмъяны яке солы висён келяны. Студент возьматћз, А. Кузнецовалэн куд-ог кылбуръёсызлэн инъетазы калык пелляськонъёс шќдћсько шуыса. Дэмламын на: кылэн юнматон, пелляськон кыл.

АСЭСТОН, АСЭСТЭМ (заимствование). Асэстон – процесслы матынгес, нош асэстэм – результат. Асэстон теория – теория заимствования.

АЗЬМАЛПАН (замысел). Вуоно произведенилэн нырысь ик авторлэн малпаназ кылдэмез. Солэн кык палыз луэ: учыръёслэн азьланьскемзы но гожтћсез шугъяськытћсь малпанъёс но югдуръёс. Пумиськыло учыръёс, куке киужзэ гожтыкуз, автор азьмалпанзэ воштэ, мукет ќре выжтэ. Пытсэт сэрен К. Гердлэн тросэз азьмалпанъёсыз ќз быдэсме (В. Ш.).

КУАРАШУДОН (звукопись). Кыџе ке веранлэсь куаралыксэ кужмоятон; учкы озьы ик: «аллитерация» но «ассонанс». Тодосчиос куарашудон амалэз малы ке но поэзиысь гинэ утчало, но со прозаын но бадњым инты басьтэ (В. Ш.).

КУАРА ПЫШКЫЛОН (звукоподрпжание). Кыџе ке инкуазь куараез адями кылын меџак возьматыны тыршон, кылсярысь, кикы – «ку-ку», эбек – «ква-ква» но соослэсь пќрмем кылъёс: квакгетыны, њильыртон но мкт.

ИДЕАЛ ЧЕБЕРЛЫКО (идеал эстетический – фр. ideal – идеал). Нимаз басьтэм адямилэн яке мер огазеяськонлэн чеберлык сярысь валанэз. Со герњаськемын адямиослэн дунне шоры учконэнызы, мылкыдэнызы. Ч. и. џемысь луэ вуоно улон сярысь малпан. Со юрттэ адямилы юнгес кариськыны, вылез но чеберез борды кыстћськыны.

ИДИОМА (идиома – гр. idioma – аспќртэмлыко веран). Пуштросэзъя мукет кылэ берыктыны луонтэм кыл. Чеберлыко гожтосъёсын кутћське геройлэн вераськоназ но юрттэ солы йоскалыкъем (национальной) тус пыџатыны.

ИДЕЯ, учк. ВАЛТЋСЬ МАЛПАН.

ВАЛТЋСЬ МАЛПАН (идея – гр. idea – адњисько). Текстэз лыдњем бере кылдэм малпан, кудћз быдэс произведенилэн пуштросэныз герњаськемын. Дэмламын на: пушмалпан, тќрмалпан, визьнод. С. Арекеева: «…Верослэсь визьнодзэ (идеязэ) валан понна йырез тћяны кулэ ќвќл кадь…».

ИДИЛЛИЯ (идиллия – гр. idyllion). Кылбуран жанр, кытын возьматћське майбыр каньыл улон – инкуазьлэн зћбыт чеберлыкез пушкын. Вќлмемын вал Антика вакытэ (Вергилий). Али џемгес кутћське серемес, ирония пуштросэн.

ИНВЕКТИВА (инвктива – лат. invehor – кырмисько). Кинлэсь ке шекъёссэ калык азе меџак поттон (кылсярысь, сатириаё серекъян, пышкылыса веран). Литератураын И. луо озьы ик эпиграммаос, тэшкерись статьяос но мкт.

ИНВЕРСИЯ, учк. КЫЛРАД ВОШТОН.

КЫЛРАД ВОШТОН (инверсия – лат. inversio – интыен воштон). Стилистикалэн амалэз – кылъёслэсь но кылтэчетъёслэсь веранын кутћськон радзэс воштон, соослэсь пуштроссэс висъян муген. К. в. луыны быгатэ трос мукет удысъёсын но, кылсярысь, «инверсия температуры» но мкт. Дэмламын на: радвоштћськон, кылрад тћян.

ИНДЫЛОН-КОСОНЪЁС. Пеймыт дуннеысь лек кужымъёслэсь утиськон яке Зеч вылИ кужымъёсты ас палад карон понна калыкен малпам кылъёс.

МУКЕТНИМАН (иносказание). Мае ке но мукет сямен ниман-веран. Кыџе ке ватэм мукет малпанэ нуись веран. Озьы ик учкы: «аллегория» Дэмламын на: котыръяса ниман, визь сынаса веран.

СЦЕНАЯН (инсценировка – лат. in – вылын, scaena – сцена). Эпической (проза яке кылбур) произведениез театр, телевидение, радио понна выльдон-радъян. С. понна калыкын тодмо луись гожтосэз куто. Куддыръя авторез ик сое С.-лы дася. Сценалэн куронъёсыз џемысь авторъёсты сюжетэз мукет сямен радъяны косо. Асьме литератураын пусйымон луо П. Блиновлэн «Улэм потэ» романэзъя, Г. Красильниковлэн «Арлэн кутсконэз» романэзъя, Р. Валишинлэн «Тќл гурезь» романэзъя лэсьтэм спектакльёс но мкт.

ИНТЕРПРЕТАЦИ(Я), учк. АСВАЛЭКТЭТ.

АСВАЛЭКТЭТ (интерпретация – лат. interpretation – валэктыны). 1) Произведенилэсь пуштроссэ лыдњон, сое кыџе ке вакытлы тупатыса. 2) Герменевтикаын: валэктон. Валамон кылэ берыктыса веран. П. Блиновлэн романэзлы, уката ик Омельлы, трос гинэ асвалэктэтъёс сётэмын. Дэмламын на: асвалэктон.

ИНТЕРТЕКСТ (интертекст – лат. inter – висказ, text – текст). Одћг текстын мукет текстысь яке кќня ке текстъёсысь люкетъёслэн огазеяськонзы. Соосыз огинэ кутыса но выльзэ будэтыса кылдэ чылкак мукет, выль текст. Нимкылэз кутћз Ю. Кристева. Пуштросэзъя матын М. Бахтинлэн «диалог культур» валатонэзлы. Р. Барт верамъя, «каждый текст соткан из цитат, отсылающих к тысячам культурных источников».

ИНТЕРЬЕР (интерьер). Адямиослэн улон интызы, юртъерлэн пушрадлыкез. Учыръёслэсь кытын ортчемзэс возьматон понна, геройёслы дунъет сётон понна кутиське.

ИРОНИЯ (гр. eironeia – серем карон). Астэ ачид но котырысь улонэз серекъяса, пальпотыса дунъян, яке данъян пыр утиян мылкыд. Учкы озьы ик: «комизм» Т. Черновалэн «Серекъялод оло бордод» кылбураз мактаса серекъян пыр городысь автобус возьматэмы,. адямиос интые – пойшуръёс-изьверъёс. Дэмламын на: мактан, мактамъяськон, мактаса серекъян.

ИСКУССТВО, учк. УСТОЛЫК.

УСТОЛЫК (искусство). 1) Оглом чеберлыко творчество (литература, суредан, графика, музыка, архитектура). 2) Котькуд ужез чебер, быгатыса быдэстон.

АССЮРЕСЭЗ литературалэн (история литературы – гр. historia – азьвылэз, ортчемез сярысь веран). Литература аслаз азинтћськон сюресэныз, кудћз Россиын ХХ дауре политика-мерлыко улонэн туж юн герњаськемын.

КАЛАМБУР (каламбур – фр. calembour – каламбур). Огкадь кылиськись пќртэм валатонъёсын «шудон»: «Вал но скал луиз». Дэмламын на: кыланбур.

КАТАРСИС, учк. ЛУЛЧЫЛКЫТАН.

ЛУЛЧЫЛКЫТАН (катарсис – гр. katharsis – чылкытатон). Аристотельлэн «Поэтика»-яз (асьме вапумлэсь азьло 4-тћ даур) лыдњисьлэсь но учкисьлэсь лулзэ «чылкытатон» – кышкатон но жалян пыр. Озьы ик кутћське З. Фрейдлэн психоанализаз.

КАТРЕН (катрен – фр. guatre – ньыль). Џемгес куто, сонет сярысь вераськыку: 4+4+4+2 яке 4+4+3+3. Сонетын кыкетћез ньыльчур котьку сямен нырысетћ ныльчурысь малпанэз азинтэ. Дэмламын на: ньыльчур.

КЛАССИЦИЗМ, классицистъёс (классицизм, классицисты – лат. classicus – адњем карымон). Литератураын но искусствоын 17–19-тћ дауръёсысь ќр, кудћз Антика йылолъёсты выльысь уже кутыны тыршиз. Валтћсь литераторъёс: Мольер, Буало, Корнель, Расин, Гёте, Шиллер, Ломоносов, Сумароков, Державин но мкт. 18-тћ даурысь удмурт кылын гожтэм тодмо данкылбуръёс кыксы ик классицизмлэн куронъёсызъя поръямын ни. Екатерина II эксэез 1767-тћ арын Казане ветлыкуз данъяса удмурт кылын таџе нырысетћез кылбур гожтэмын вал:

Ма эзь сьоты выцякь ишизнатонъ милы

Лэстћзь ма ибыртамъ бадчтмъ ми инмарлы

Солы теныдъ тау мумии тнамъ верасько

Уно улны теныдъ инмарь сьот курысько.

КЛАУЗУЛА (клаузула – лат. clausula – йылпумъян). Кылбур чурлэн йылпумъяськонэз: «воргорон клаузула»: шудон, кужмо луэ берпум слог; «нылкышно клаузула»: уг шуды, кужмо луэ пумысеныз 2-тћ слог; «дактилической клаузула»: уз шудэлэ, кужмо луэ пумысеныз 3-тћ слог. Ќвќл сурано рифмаен. Дэмламын на: чурпум.

КОМЕДИ(Я) (комедия – гр. komodia – «шулдыр улонэз кырњан»). Драмалэн жанрез, кытын адямиос но учыръёс серем пыр, юморен суредамын. Трагедилэсь но драмалэсь висъяське конфликтэзъя, угось К.-ын конфликт йќспќртэм («мнимый») луэ.

КОМИЗМ (комизм, комическое – гр. kotnikos – серемес, шулдыр). Лулчеберетысь но улонысь серемлыкез висъян. Литература гожтосъёсын серемеслыко џемысь возьмато азьвыл улонлэн вужмем тодметъёсыз. Литературалэн вань бадњымесь луонлыкъёсыз адямиез серекъян амалэн визьманы-дышетыны. К.-лэн пќртэмлыкъёсыз: юмор, ирония, сатира но мкт. Дэмламын на: серемеслык, маскаралык.

КОМПАРАТИВИСТИКА (компаративистика – лат. comparatives – џошатћсь). Дыр ортчемъя воштћськемез эскерыса, пќртэм литератураосты џошатћсь литературатодос. Та нимкылэз тодосэ пыртиз немец . «Калгись сюжетъёсты» эскерон бодысен кутскиз но выжыоссэ паськыт лэзиз. Удмурт литературатодосын та ќръя тужгес но азинлыко ужа Ф. Ермаков.

.

КОМПОЗИЦИЯ, учк. ПУШСУЗЬЕТ.

ПУШСУЗЬЕТ (композиция – лат. kompositio – пќрмытон, ватсан, огазеян) – 1) ПУШСУЗЬЕТ – чеберлыко текстлэсь портэм ёзэтъёссэ чеберлыко амалъёсъя радъян. 2) Озьы ик: крезьгур. 3) Искусстволэсь пќртэм йОсъёссэ (видъёссэ) огазеяса радъян. 4) Пќртэм арбериослэсь одћг маке лэсьтон. Дэмламын на: сузьет, сознэт, пуктэт, чеберлыко текстэз радъян, веранлэн радъяськем тусыз.

КОНФЛИКТ (конфликт – латин. confliktos – шуккиськон, ваче вуон). Малпанъёслэн, кужымъёслэн, югдуръёслэн ваче пумит вуэмзы, нюръяськемзы но ченгешемзы, кудиз адямиослэн куспазы нюръяськонзы вылэ выже. К. – сюжетэз азьлань нуись, «догись» кужым. Кылсярысь, луыло социальной пуштросо, нравственной, семъя кусып, производственной но мукет К.- ёс. Дэмламын на: геред (А. Б.), пумитдарт.

КРИТИК (критик – гр. kritikе – дунъяны быгатон). Чеберлыко гожтосэз эскерись но солы дунъет сётись Онерчи. Учкы «критика». Дэмламын на: критикчиос (М. К.), кылбурдунъясь (К. Г.).

КРИТИКА (критика – гр. kritikе – дунъяны быгатон). 1) Литератураез туала улон азьын сылћсь ужпумъёс пыр эскерон, туннэ нуналысь пќртэм мер ужпумъёс но югдуръёс пыр учкон; гожтослы чеберлыкез ласянь дунъет сётон. 2) Мае ке курлан. Дэмламын на: дунъетбур.

ЛЭЧЫТ КЫЛЪЁС (крылатые слова). Мифологиысь но литератураысь персонажъеслэн нимъёссы, историын тодмо луэм адямиослэн образной веранъёссы, вакчи цитатаос, кудъёсыз паськыт кутћсько асьмелэн вераськонамы. Кылсярысь, «Улон понна сиськыны кулэ, сиськон понна улыны кулэ ќвќл» (Сократ).

КУЛЬМИНАЦИЯ, учк. СЮЖЕТГЕРД.

СЮЖЕТГЕРД (кульминация – лат. culminis – вылћын). Сюжет но конфликт азинскемен сэрен текстысь тужгес «њырдыт» инты, кудћз конфликтэз лэчытатэ. Со асьмеды пумъянлы дася ни. Учкы озьы ик: «сюжет». Дэмламын на: йыл-шорсюлэм (С. М.).

ЛЕГЕНДА, учк. ДАУРКЫЛ.

ДАУРКЫЛ (легенда – лат. legenda – со, мае лыдњыны кулэ). 1) Вашкалаысь маке сярысь паймымон учырез веран, кудзэ верась но кылзись но зэмос шуыса малпало; выль литератураын – асмалпам веран, кудћз зэм ик луыны быгатысал вазен дыръёсы. 2) Огъя вераськонын – малпаса сётэм яке осконтэм луись учыр. Коньы Толялэн «Сюрес усьтћське мынћсьлы» кузьмадёс-дауркылэз.

ЛЕЙТМОТИВ (лейтмотив – нем. leitmotiv – валтћсь мотив). Чеберлыко гожтосын кќня ке пол кутћськись кылсуред, бадњым инты басьтћсь мылкыд, кытћяз чеберлыко висъяськись дчыры-пыры – деталь. Кылсярысь, Г. Красильниковлэн «Кошкисез мед кошкоз» веросаз «ву» лейтмотив, џем пумиськылыса, котькуд геройлэсь образзэ аспќртэмлыко усьтыны юрттэ.

ЛИРИКА (лирика – гр. lyrikos – со, мае верало лира шудэм улсын). Литературалэн одћгез динез – драмаен но эпосэн артэ. Л. возьматэ адямилэсь мылкыдзэ, сюлмаськонъёссэ. солэн пушдуннезлэсь аспќртэмлыксэ. Татчы пыро трос пќртэм жанръёс: элегия, романс, газель, сонет, кырњан, кылбур но мкт.

ЛИРИКА ГЕРОЙ (лирический герой). Кылбурын кылбурчилэн образэз (кылсуредэз), со џем дыръя нырысетћ лицоысь нимвоштосэн возьматэмын («мон», «мынам»). Л. г. вера ас мылкыдыз, лул-сюлэмыз сярысь, мар сое сюлмаськытэ, курадњытэ. Кылбурын со огдыре субъект но, объект но луэ (). Поэт Л. г. пыр ассэ гинэ уг, солы матын луись трос адямиосты возьматэ. 1970-тћ аръёсы Флор Васильевлэн гожъямъёсаз азьпал радэ потэ сыџе лирика герой, кудћз дуннешќдэмезъя но дунневаламезъя язычниклы матын луэ. Дэмламын на: асмурт, бурмурт (Ф. П.).

ЛИРИКАЕ КОЖЫЛОН (лирическое отступление). Сюжетлэсь палэнэ кожон, кытын автор геройёс но соослэн улонзы шоры кызьы учкемзэ шарая. Кылсярысь, Гоголь «Мёртвые души» поэмаяз Л. к.-ын адямилэн адњонэз сярысь, Родинаезлэн но калыкезлэн адњонзы сярысь малпаське.

ЛИТЕРАТУРАТОДОС (литературоведение – гр. lit(t)eratura – со, мар гожтэмын). Литература сярысь удыстодон, кудћз чеберлыко гожтосъёсты но соос котырысь кылдэм югдурез, литературалэсь катъёссэ дышетэ. Л.-лэн удысъёсыз: литературалэн теориез, литературалэн историез, критика (дунъян-эскерон); берло дыре литературалэн философиез но висъяськыны кутске.

ЛИТЕРАТУРА КЫЛ (литературный язык). Юнматэм кабъёсъя кылдытэм, диалектъёслэсь вылћын сылћсь кыллэн эсэпъёсыз (нормаез). Л.к. гожтосъёсын но вераськонын улэ, калыклэн улонэзлэн котькуд палъёсаз-удысъёсаз кутћське. Революци бере удмурт огъякыл (книгакыл) сярысь лэчыт кыложъёс пуромылћзы. Дэмламын на: книгакыл (К. Г.).

МАГИЯ (магия – гр. mageia – магия). Вашкала вапумъёсы кылдэм дуннеоскон, куке ќвќлтэм кужымъёс адямилэсь но инкуазьлэсь улон ќрзэс воштыны быгато. Герњаськемын со вакытысь трос сям-нергеосын (обрядъёсын). Дэмламын на: абызлык; сьќд абызлык – черная магия, тќдьы абызлык – белая магия.

КЫЛОЖ (дискуссия). Кыче ке текст яке гожъясьчи пумысен коня ке критикъёслэн куспазы ченгешемзы.

МАДИСЬКОН (загадка). Кыче ке арбериез яке учырез мукет арберилэн яке учырлэн тодметэз пыр ватыса, шудыса возьматон. Отын мА сярысь вераськемез тодыны луэ солэн валэктонэзъя. Мадиськонлэн одно ик вань валэктонэз (отгадкаез), кылзись мурт сое ачиз тодыны кулэ. М.-ёс поськыт вОлмемын калык кылосын (фольклорын).

МЕЛОДИКА, учк. КУАРАГУР.

КУАРАГУР (мелодика – гр. melos – кырЗан, крезьгур). 1) Куаралыкез, крезьгурез дышетон удыс. 2) Тазьы куддыр нимало кылбурлэсь интонациез ласянь пќрмемзэ, поэтической веранын куаралэсь вошъяськемзэ но пќртэм пуштросо оттенокъёс кылдытэмзэ.

МЕМУАРЫ, учк. ТОДЭВАЁНЪЁС.

ТОДЭВАЁНЪЁС (мемуары – фр. memoires – тодэ ваёнъёс). Автобиографи жанръёс пќлысь одћгез тужгес но паськыт вќлмемез. Автор тодаз вае, кызьы со ас вакытаз пыриськиз мерлыко, лулчеберет но литература улонэ, мае солы адњыны кылдћз (даурен герњаськем паймымонзэ). П. Черновлэн тодэваёнъёсаз пусъемын, солэн юрттэменыз сэрен тросэз егит авторъёс улон ќрзэс шедьтћзы шуыса (В. Л.).

МЕТАФОРА, учк. УКШАТОН.

УКШАТОН (метафора – гр. metaphora – выжытон). Одћг макелэсь тодметъёссэ мукет маке вылэ выжытон: «шунды пуксе», «сюлмы чигиське». У. нимкылэз дэмлаз В. Ванюшев. В. Ившин огшоры учыръёсты укшатон каре но соосты улон прозаен но поэзилэн чеберлыко дунненыз герњась выжъёслы пќрмытэ. (А. Ш). Вќлскем У. – развернутая метафора.

АМАЛ (метод – гр. methodos – маке доры сюрес). Ужан амал, кудћныз тырше эскерись мурт, солы кулэ луись мае ке шедьтон яке тодон понна. Паськыт вќлмемын таџе методъёс-амалъёс: аналогия, џошатон, эксперимент, индукция, дедукция, анализ, синтез. Чеберлыко А. – художественный метод.

МЕТОНИМИЯ, учк. НИМВОШТОН.

НИМВОШТОН (метонимия – грек metonymia – мукет сямен веран). Одћг кыл интые мукет кылэз веран, куке соос куспын вань герњет. Н. нимкылэз дэмлаз В. Ванюшев. «Театр чабиз»: театр чабыны уг быгаты – чабе театре люкаськем калык. Олег Четкарев «вурысъёс» нимвоштон пыр ульчаысь калык-уллёлэсь туссэ возьматыны тырше (В. Ш.).

МЕРТЭС кылбуранын (метр в стихе). (Бюллетень №1). Силлабо-тоникаын кужмо но ляб слогъёслэн радъяськемзы. Кылсярысь, анапестын (ааА) котькуд 3-тћ слогъёсыз кужмоесь (ударение улсын) луо, соос вискын ваньмыз сямен слогъёс – ударенитэм.

ДУННЕУЧКОН (мировоззрение). Дунне шоры аспќртэмлыко учкон.

МИФ (миф – гр. mythos – мадён, веран). Вашкалаослэн инкуазь но дунне сярысь валанъёссы но валэктонъёссы. Кылсярысь, космогони мифъёс валэктыны тыршо Дуннелэсь, Инсьќрлэсь, Адямилэсь кылдэмзэс. Туала тодослэн валэктонъёсыныз артэ пуктоно ке, М.-ёс выжыкылъёслы укшало кадь.

МИФДУННЕ (мифология – гр. mythos – веран). Мифъёслэн сќзнэтсы (совокупность мифов).

МИФТОДОС (мифология – гр. mythos – веран). Мифъёсты эскерись наука-удыстодон.

«ТРОСКУАРАЛЫК» («многоголосье»). Веранлэн пушказ, кудзэ вера одћг герой, пыро мукет геройёсын верам кылъёс-малпанъёс. «Поэтическое многоголосье» – лирика удысысь троскуаралык; кылбур чуръёсы мурт малпанъёсты пыртон амал. Полифония валатонлы матын луэ. «Т.» нимкылэз џектћз.

МОДЕРНИЗМ (модернизм – фр. moderne – туж выль, туала). ХХ даурысь устолыклэн огъя ќрез, кудћз азьвыл кабъёслэсь – уката ик реализмлэсь – палэнэ кошкыны тырше. 1920-тћ аръёсы авангард ќре выже.

ПУШВЕРАН (монолог – гр. mono, logos – одћг, куара). Геройлэн аслыз вазиськыса вераськемез, кудћз текстын быдњалаезъя ик шќдскымон луэ. Трос кутћське драмалэн жанръёсаз. Кылсярысь, Шекспирлэн «Гамлетаз» Гамлетлэн «To be or not to be» монологез. С. Широбоковлэн «Џукдор» пьесаяз пушверан амалэн кыкетћ действиын Яков Пичугин вераське. (С. А.) Дэмламын на: огнын вераськон, ас поннад вераськон.

МОНОГРАФИ(Я) (монография – гр. monos – одћг, qrapho – гожтћсько). Одћг темалы яке югдурлы сћзем тодослыко уж, книга. Кылсярысь, Л.  Байтеряковлэн удысбурезлы сћзем М.-ез. Дэмламын на: асуж.

МОТИВ (мотив – фр. motiv – валэктћсько). Образ, кудћз текстын трос пол кутћськылэ но пумен пуштроссэ воштэ. Ќвќл сурано «муг», «ньќм» пуштросэн. Дэмламын на: мадён ќр (Н. И.), сузьетчур.

ЙЫРЪЯН (название). Чеберлыко ужезлы ним сётыкуз, гожъясьчи отчы одно ик валтћсь мылкыдзэ пыртэ. Г. Перевощиков мадёсъёссэ «Ыш-ыш-ыш…», «Ќб-ќб-ќб», «Эх ма-а…» шуыса йыръякуз, одно ик текстлэсь пуштроссэ лыдэ басьтћз. Текстлэн йыръянэз интертекст амалъя мукет текстъёсын но герњаськыны быгатэ: Эрик Батуев «Дор» – М. Покчи-Петров «Дор».

НАТУРАЛИЗМ (натурализм – лат. naturalis – инкуазь). Литератураысь текстын тодослыко амалэн, протоколын музэн зэмлыко суреданы тыршон. Гожъясьчи оскымон возьматэ ваньзэ, мае адње, мар улонын ортче. Адямилэн улонысьтыз котькуд чыры-пырыез гожтосэ пыртон котьку ик умой уг луы. Литератураын та ќр волмемын вал ХIХ даурлэн пумаз. Та ќрын гожъяськисьёс малпамъя, адямилэн улоназ шудо луонэз но, шудтэм луонэз но азьласянь ик тодмо, «инмарен гожтэмын»; адями ас улонысьтыз номырзэ воштыны уг быгаты.

ТОДОСЛЫКО КЫЛБУРАН (научная поэзия). Медитативной кылбуранлэн пќртэмлыкез. Т. к. суреда наука удысысь теориосты, усьтэтъёсты, гипотезаосты. Кылсярысь, М. Ломоносов, Л. Мартынов но мкт.

ВЫЛЬКЫЛ (неологизм – гр. neo, logos – выль, кыл). Вераськон кылэ алигес кылдэм выль валатонэз возьматћсь кылъёс но кылтэчетъёс. Кылэз нуллисьёс понна кулэен шќдћськись тодмо макелы ним малпан. Кыллэн пушказ тужгес трос выль кылъёс пыро, кыџе ке улон югдур воштћськыку, революциос ортчыку. Октябрь революци бере удмурт кыл узырмиз таџе выль кылъёсын: лыдњон корка, драмкружок, аспирант но мкт. Вераськонэ пыџамзы бере, выль арбериосты нимась кылъёс вылькыл луэмысь дугдо.

НОВЕЛЛА (новелла – ит. novella – новелла). Верослэн кыктоез, кудаз вылысьтыз вылаз но нап-нап мыно учыръёс, кытын пушдуннеын «бугыръяськыса» љеганлы но инкуазь суредъёсты кема возьматыса улыны луонлык ќвќл. Та жанрен гожтэм ужъёс удмурт литератураын тужгес вќлмизы берло аръёс џоже (Р. Игнатьева). Дэмламын на: выльверос.

КЫЛСУРЕД (образ художественный). Кинлэсь ке яке малэсь ке выл но пуш тусбуйёссэ усьтон. Учкы озьы ик: «тип», «характер». Дэмламын на: тусбур.

СЯМ-НЕРГЕ (обряд). Адями коллективлэн улоназ кыџе ке йылолэн валче дышем сямъя ортчытћськись ужрадъёс, сям-нергеос. Дэмламын на: сэбед, нерге, йылол, кылтодон.

ДАНКЫЛБУР (ода – грек. ode – кырњан). Сиё-дано мылкыдын данъяса гожтэм кылбур; лирика кылбуранлэн одћгез жанрез. Паськыт вќлмемын вал классицизмын. Ода пуштросэн учкыны луэ совето поэзиысь сыџе кылбур текстъёсты но, кытын вылћ данъямын КПСС но социализм улон.

ОКСЮМОРОН (оксюморон – гр. оxsymoron – шузи-визьмо). Пуштроссыя герњаськисьтэм, ваче пумит валатонэн кылъёслэн-валатонъёслэн огинэ герњаськемзы: «югыт мќзмон», «кќс ву юыса улћз».

ОКТАВА (октава – лат. octava – тямысэтћ). Тямыс чуръем кылбур, кудћз рифмаяське тазџе амалэн: абабабсс. Историлэн Џукнадаур (Реннесанс) вакытаз паськыт вќлмемын вал. О.-ос бадњым инты басьто А. Белоноговлэн «Выллань сюрес» книгаяз, но рифмаяськемзыя соос классической октава уг луо. Дэмламын на: тямысчур.

ОЛИЦЕТВОРЕНИЕ, учк. УЛЭПМЫТОН.

УЛЭПОМЫТОН (олицетворение). Лултэм арбериосты лулъян, яке лулоосызлы но, кылсярысь, пќйшуръёслы, адямилэсь сямъёссэ, выросъёссэ сётон. Дэмламын на: лулъян.

СУРЕДМАН (описание). Чеберлыко гожтосын мае ке кылъёсын суредан, валэктон. Дэмламын на: кылсуред.

ОППОЗИЦИ(Я) (оппозиция – лат. oppositio – вачепумит сылон). Кык ёзэтъёслэсь ваче пумит пуктон амал. Матын антонимлы. К. Леви-Стросс валэктэмъя, мифдуннеысен кутскыса валтћсь бинар (кыкъем, кузо) оппозиция луэ «культура/природа» яке со ик мукет сямен «космос/хаос»; кылсярысь: югыт/пеймыт, пи/ныл, бур/паллян но трос мкт. Мифъёслэсь ёзсќзнэтсэс (структуразэс) радъянын бадњым инты басьтэ. Дэмламын на: пумиткыл.

ОЧЕРК (очерк). Чеберлыко литератураын верослэн огез аспќртэмлыко жанрез луэ, отын џемысь мер (социальной) ужпумъёс возьматћсько. Публицистической, документальной очерк вера но дунъя улонысь зэмос учыръёсты но ужпумъёсты, авторлэн синмыныз возьматыса. Дэмламын на: зэмверос.

ПАРАЛЛЕЛИЗМ, учк. КУЗО СУРЕД.

КУЗО СУРЕД (параллелизм – гр. parallelos – «вќзам мынћсь»). Веретэз радъян амал: инкуазь суредэз возьматонэн артэ сыџе амалэн ик возьматэмын адями улон. Удмурт кырњанъёсын но џем пумиськылэ кузо (валлин) суред, куке нырысь ик сётэмын инкуазьысь кылсуред, яке куазьтус, собере солэн пуштросэз «выжытэмын» адями дуннее. «Гожтэт гожъяны пукси но – чигиз зарни перое. Зарни перое ќз чигы – чигиз пинал сюлэмы». Дэмламын на: валлин суред.

ПАМФЛЕТ (памфлет – гр. pam – ваньмыз, phlego – сутћсько, љуатћсько, яке франц. pame feuillet – лобњись куар). Эпической жанрын пичияк литературной гожтос, кытын калык син азе поттћсько кыџе ке шекъёс: яке туала улонысь, яке нимаз адямиослэн, огазеяськонъеслэн урод ужъёссэс. П. котькуд огшоры лыдњисьлы валамон луэ. П. аслаз љутэм ужпумъёсызъя публицистикалы матын луэ. Суредаське ирония но сарказм пыр.

ПАРОДИЯ, учк. ПЫШКЫЛОН.

ПЫШКЫЛОН (пародия – гр. parodia – пумит кырњан). Кинлэсь ке адњем карыса но сое пышкылыса серем улсын маке гожтон яке веран-возьматон. Кылсярысь, В. Поздеевлы таџе пышкылон гожтэ:

…Жингырты огпол ке но,

Сюлэмам йыркур дыа.

Зоринча гомње,

Мон тонэ, Удмуртия,

Ќй на данъя њеч.

Дэмламын на: пыџкылон.

ПАФОС (пафос – гр. pathos – шќдон мылкыд). Чеберлыко гожтос пушкы пыџатэм мылкыд, сое «произведенилэн мылкыдыз» шуыны луоз (трагика, сатира но мкт). В. Белинский «пафос – со поэтической малпан (идея)», шуиз. Берло вакытэ П. интые «модус» валатонэз но кутыны кутско. Дэмламын на: дарт.

ПЕЙЗАЖ, учк. КУАЗЬ СУРЕД.

КУАЗЬ СУРЕД (пейзаж – фр. pays – инты). Чеберлыко гожтосын инкуазь суредъёс, отысь шќдћськом авторлэсь мылкыдзэ. Чеберлыко гожтосын К. с. озьы ик мае ке яркытгес возьматон понна кутћське – контраст амалэн (кылсярысь, туж шулдыр куазен герой бырыны шеде), яке со тупа геройлэн малпанъёсызлы, мылкыдызлы (кылсярысь, мќзмыт зоро куазен ортчись секыт учыръёс). Дэмламын на: куазьтус.

БЕРЫКТОН, БЕРЫКТЭМ (перевод). Одћг кылысь мукет кылэ берыктон уж но берыктэм гожтос. Сыџе чеберлыко произведение, кудћз инъет луись текстлы чурул но, чылкак выль произведение но уг луы. Со кык литератураос вискын сылэ кадь: кудаз кылдћз но кудаз аслэсьтыз выль улонзэ кутске. Тужгес секыт луэ кылбурез Б., малы ке шуоно, инъетлэсь пуштроссэ но стильзэ возьматэм сяна, кулэ на лыдэ басьтыны кылбуркабъёсты: ритмез, чуръёслэсь радъяськемзэс, рифмаез, чеберматон амалъёсты но мкт. Дэмламын на: берыктэт.

БЕРЫКТИСЬ (переводчик). Берыктон уж удысын тыршись мурт.

ПЕРСОНАЖ (персонаж – лат. рersona – мурт). Литература произведениын шудћсь мурт, гожъясьчиен кылдытэм адями-образ, кудћз текстын ортчись учыръёсы пыриське.

ПИРРИХИЙ (пиррихий – гр. pyrrichios – ыштон). Силлабо-тонической кылбуранын ударенитэм слогъёслэсь стопа (ямбын яке хорейын џемгес пумиськылэ).

ГОЖЪЯСЬЧИ (писатель). Литература ужен вырись адями, чеберлыко текстъёсты гожъясь мурт. Дэмламын на: гожъясь, гожъяськись.

МАДЁН (повествование). Учыръёс сярысь, действилэн азинскемез но ортчемез сярысь веран. Дэмламын на: веран, мадьыса суредан, мадён-веран.

МАДИСЬ (повествователь). Произведениын мадись мурт (куинетћ лицоын, со верам учыре ачиз уг пыриськы). Учкы озьы ик: веросчи (рассказчик), кудћз ортчись учыръёсы пыриське.

КУЗЬМАДЁС (повесть). Эпосысь жанр – романлэсь пичигес, верослэсь бадњымгес. Сюжет валтћсь герой котыре бинськемын. Веросэн џошатыса, К. улонэз паськытгес возьматэ: отын геройёсыз но, учыръёсыз но трос, текстлэн пумаз адямиослэн воштћськемзы адњиське. Коньы Толя аслэсьтыз «Сюрес усьтћське мынћсьлы» гожтоссэ кузьмадёс-дауркыл шуыса нимаз (повесть-легенда). Дэмламын на: кузьверос (К. Г.), мадёс.

ВЫЛЬЫСЬ ВЕРАН (повтор). Одћг веранэз ик кык яке трос пол веран. Дэмламын на: выльысян (П. В.), паръян, кузъян.

ЧУРУЛ (подстрочник). Текстэз кылысь кылэ меџак, «буквально» берыктон. Берыктон уж удысын пайдаё луэ, чеберлыко тупатон-радъян понна инъет кылдытэ.

ПОДТЕКСТ, учк. КЫЛВУЖЕР.

КЫЛВУЖЕР (подтекст). Текстлэн, верамлэн «адскисьтэм» палыз, ватсаса сётэм пуштросэз. Кылсярысь, А. Чеховлэн, Э. Хемингуэйлэн, Г. Красильниковлэн гожъямъёсазы. Йогурезьын (айсбергын) сямен, синмын адњымонэз луэ одћг тямысмосэз, нош кылемез сизьым тямысмосэз адскисьтэм, «ву улэ ватскемын». Табере тырмыт ќвќл ни учкыны сое гинэ, мар вань текстын, быгатоно валаны, мар ватскемын текстлэн сьќраз, текстлэн вужераз. (А. Е.) Дэмламын на: чуръёс вискын верам (А. Е.), возьматымтэ малпан, текст сьќр, текст вужер, ватэм малпан, ватэм пуштрос.

ПОРТРЕТ (портрет – фр. portrayt – тусбуй). Одћг адямиез яке туркымез (группаез) суредан; џемысь соя текстысь геройёслы дунъет сётыны быгатћськом. Дэмламын на: туспуктэм, тусъет, тусбуй.

«УЙБЫРТОН АМАЛ» («поток сознания»). Пуш малпаськон, асэныд ачин вераськон амал, кытын логической герњетъёс юромо тћямын. Модернизм литератураын одћгез валтћсь маке, но берло со реализме но пыџа. Туала дыре та амалэн трос ужа С. Матвеев («Чорыглэсь лушкам малпанъёс» (2005)). «Предельная форма «внутреннего монолога». Зэм но, герой, номыре валасьтэм мурт сямен, мар чилектэ йырвизьмаз, со сярысь вера, кожалод. Таџе мылкыд уйбыртонлы тупа. (В. Ш.).

КЫЛБУРЕН ГОЖТЭТ (послание). Кинлы ке юромо сћзем гожтос. Отын кылбурчи пќртэм юанъёс, ужпумъёс пумысен аслэсьтыз малпанъёссэ вера. Луыны быгатэ эшлыко, лирической, серем карон но мукет мылкыдо К. г.-ёс.. Дэмламын на: вазиськон.

ПОСТМОДЕРНИЗМ (постмодернизм – фр. post – бќрсьы, moderne – туж выль, туала). Мар лыктћз культурае но улонлэн пќртэм сиосаз – модернизм бере, уката ик 1970-тћ аръёсы. Џемгес герњало Jean-Francois Lyotard-лэн «La Condition Postmoderne» (1979) уженыз. Туала Европаын но Америкаын дуннеучкон, улон-вылон амал. Удмурт литератураын но сыџе ик постмодернизмо югдур кылдћз. Эстониысь культурологъёс вераськон љутћзы постмодернизмлэн сыџе тулкымез сярысь, кудћз пуштросэзъя тупалоз ќжыт лыдъем нациослэн лулчеберетсылы; нимамын вал со «этнофутуризм» шуыса.

ПОЭЗИ(Я), учк. КЫЛБУРЕТ.

КЫЛБУРЕТ (поэзия – гр. poiesis – поэзия). Литературалэн сыџе удысэз, кытын кылъёс но кылбур вылтусъёс кылдыто пќртэм пумо валатонъёс, соосты мукет амалэн кылдытыны уг луы ни. Автор но персонаж огвыллем верасько. «Кылбурет» кылын нимало кылбуръёсты, поэмаосты; соосты гожъясь адямиосты кылбурчи шуо. Нош али, М. Петровлэсь кылбуретсэ огдырлы палэнтыса, нимысьтыз учкомы на солэсь прозазэ. Куддыръя «творчество» нимкыллы матын луэ: Куке џошатимы ке Ф. Васильевлэсь но М. Петровлэн кылбуретъёссэс, соку адњом...

ПОЭМА (поэма – гр. poiema – поэма). Бадњым бадњалаем поэтической текст, џемгес лиро-эпической пуштросэн. Авторез верам учыръёсы пыриське яке со учыръёс сярысь маде.

ПОЭТИКА (поэтика – гр. poietike – чебер гожтон). Паськыт пуштросэн – теория литературы; сюбег пуштросэн – чеберлыко текстлэн пуштросэзлэсь аспќртэмлыкъёссэ эскерон. Огъя поэтика литературалэн теориеныз тупа, озьы ик возьматэ гожъяськон амаллэсь, калыкъёслэсь, вакытъёслэсь, поэтъёслэсь асьсэлы гинэ тупась чеберлыко тодметъёссылэсь сознэтсэз (системазэс). Дэмламын на: кылбуръет, кылчеберлык, кылтћрлык, гожтослэн чеберлыкез.

ПРОЗА (проза – лат. prosa – веран). Метрика ласянь нимысьтыз радъятэк гожтон амал; солы пумит – поэзия, кытын чуръёсты вакчиятыса но метриказэ чакласа сёто. Огшоры шара яке гожтэм веран, эпика тодметъёсъя пќрме. П.-лэн огдышем (традиционной) амалъёсыз – мадён (повествование), суредман описание, валэктон но ваче вераськон. Дэмламын на: мадьбур.

НОДКЫЛ (притча). Со пичи верос, кытын мадисьлэн меџак вератэк њеч сямо, выросо, чылкыт, лякыт сюлэмо луыны (яке Инмарлэн куронъёсызъя улыны) дышетэмез шќдћське. Дэмламын на: мадён кыл, пќян кыл.

АЗЬЛЭТ (пролог – гр. prologos – азьвыл веран). Сюжетлэн люкетэз, кудћз возьматэ учыръёсты, кудъёсыз вылћллям сюжет «пертчиськемлэсь» азьлогес. А. бере кутске экспозиция, кытын ини текстысь учыръёс пертчисько. А.-лы пумит «эпилог» – «пумлэт».

ИНТЫЛЫК литератураын (пространство в литературе). Текстын возьматэм интыос котькыџе пќртэм луыны быгато, гожъясьчи соосты ас сяменыз радъяса пыртэ (учкы озьы ик: «хронотоп»). Куддыръя И. ласянь оппозиция валтћсь инты басьтыны быгатэ: гурт / кар; бур пал ярдур / паллян пал ярдур; сьќд нюлэс / паськыт бусы но мукет. «Матћ» веросэзз интылык ласянь ёзнам ке, отысь висъялом 1) гуртэз, кытын дунне огыр-бугыр луэмын, 2) инкуазез, кытын Матћ мифдуннеысь туслыклы пќрме, но 3) карез, кытысь гуртэ кышкыт ыртќлъёс лыкто. Дэмламын на: инты, интывыл.

ИНЪЕТМУРТ (прототип – гр. prototypon – прообраз). Зэмос адями, кин шоры учкыса автор суреда, пќрмытэ геройзэ. Гердлэн Матиезлэсь инъетмуртсэ Вавожын улћсьёс али но тодо на. Дэмламын на: зэмосмурт.

МАЛПАМНИМ (псевдоним – гр. Pseudos, onoma – малпан, ним). Малпаса кылдытэм ним яке фамилия, кудћныз гожъясьчи аслаз ужез улэ гожтћське. Куд-ог актеръёс сцена вылын асьсэды малпамнимзыя верало. К. Герд – К. Чайников, В. Ар-Серги – В. Сергеев.

ПСИХОЛОГИЯ, ПСИХОЛОГИЗМ, учк. ПУШДУННЕ.

ПУШДУННЕ (психология, психологизм – гр. psychikos – сюлэмо). Литератураын: геройлэн пуш дуннеез но сое усьтон-возьматон амалъёс. Дэмламын на: лулдунне.

ПУМЪЯСЬКОН (развязка). Текстын действиез йылпумъясь люкетэз, кутске сюжетгерд (кульминация) ортчем бере. Учкы озьы ик: «сюжет». Дэмламын на: пертчиськон.

КЫЛБУРКАБ (размер стихотворный). Кылбурлэсь куаралыксэ радъян амал; слогъёслэн лыдзыя но ударенизыя шедьтћське. Калык Ашальчи Окилэсь кылбурзэ ас «кабеныз» ик кельтэ, рифмаятэк кырња. (А. З.) Дэмламын на: кылбурмертэт (К. Г.), кылбур сермет.

ПЫЏКЫЛОН, учк. ПЫШКЫЛОН.

ВЕРОС (рассказ). Эпической прозалэн пичи кабез-формаез, солэсь бадњымгес – повесть. Куддыръя шуг висъяны новеллалэсь, очерклэсь (соосты верослэн пќртэмлыкьёсыз шуыса учкисьёс но вань). Веросын геройёслэн улонысьтызы пичи гинэ учыр возьматэмын, но со пыр мукет геройёс но син азе яркыт пуксё. В.-ын учыръёс но, геройёсыз но асэныз гожъясьчиен малпамын.

ВЕРОСЧИ (рассказчик). Учырез, маке ортчемез верась кин ке. Џемысь вера нырысетћ лицоысен, ачиз ик учыръёсы-событиосы пыриськись луэ. Озьыен, В. верос жанрын гинэ уг пумиськылы. Учкы озьы ик «повествователь». Дэмламын на: верась.

РЕАЛИЗМ (реализм – лат. realis – зэмос). Устолыклэн но литературалэн валтћсь амалзы. Солэн инъетэз – улонэз зэмос учыръёс-югдуръёс пыр возьматон. Россиын вќлмиз 19-тћ дауре. Критической Р. – кытын писательёс (кылсярысь, ) мур но зэмен возьматћзы улонысь урод палъёсты, лыдњисез сооослы пумитъяськытон понна. К. р.-лэн инъетаз азинэс но адњем карымон (положительной) идеалъёс вал – вордскем палъёссэ яратон, курадњись калыкез жалян, шаерлэн югыт азьпалэзлы оскон.

РЕМАРКА (ремарка – фр. remarcue – валэктон). Драмаё текстын авторлэн шудћсьёслы (артистъёслы) куд-ог дэмланъёсыз. Кылсярысь, Ч.-ын со вера, мар лэсьтоно персонажлы, кызьы вазиськоно, кыџе тусо кариськоно. Дэмламын на: џектэт.

РЕФРЕН (рефрен – фр. refrain – выльысь но выльысь веран, «припев»). Кылбурын котькуд ньыльчур (яке куатьчур но о. а.) бќрсьы выльысь вераськись кылбур чуръёс. Кырњанъёсысь рефренэз «припев» шуо.

ДУНЪЕТ (рецензия – лат. recensio – эскерон). Критикалэн одћгез жанрез луэ, отын дунъет сётыса эскериське выль чеберлыко (литератураысь, театрысь, крезьгуранысь но мкт.), научной яке научно-популярной гожтос. Газет-журнал публицистикалэн критикаез. Книгалы Д.-ын котьку сямен лэсьтћське солы библиографи суред, пуштросэз сярысь вакчияк ивортон, жутэм ужпумъёсыз, гожтослэн стилез но о. а. Гожтослылы критикаё дунъет сётћське, туала литератураын кыџе инты басьтэмез чаклаське.

РИТМ (ритм – гр. rhythmos – бызисько). Кылбурын ялан огкадь висъёсын куаралэн я кужмоямез, я лябомемез (ударениен но ударенитэм слогъёслэн вошъяськемзы).

ЧЕБЕР ЮАН (риторический вопрос). Чеберлыко произведениысь юан, валэктон уг куры. Юанэн со верамез ачиз ик юнматэ, кужмоятэ: «няньлэсь бадњымез мар ке вань шат?».

Дэмламын на: юамтэ юан.

РИФМА (рифма – гр. rhytmos). Кылбур чуръёслэн куаразыя тупамзы. (Кылбурысь огкадь куара сётћсь чур пумъёс). Чуръёсъя радъяськемзыя Р.-ос люкисько тазьы: перекрестная Р. – КЕЏЕВЫЛ Р., абаб кабъя; парная Р. – АРТЫСЬ Р., аабб кабъя; кольцевая (охватная) Р. – њыгыртћсь, ЭГЕСАСЬ (эгесо) Р., абба кабъя. Рифмаяськись кылъёсын ударение интыяськемъя таџе рифмаос луо: ВОРГОРОН Р. – ударение усе чурлэн берпуметћ слогаз (адњи – лыдњи); НЫЛКЫШНО Р. – ударение усе чур пумысен кыкетћ слоге (кактус – куака тус); ДАКТИЛИЧЕСКОЙ Р. – ударение чур пумысен куинетћ слоге усе (эн эркия – энергия); Рифмаяськись кылъёсын пумисько ШОНЕР ТУПАСЬ Р., кытын огкадь куараос пумисько (пыж – выж) но ШОНЕР ТУПАСЬТЭМ Р., кытын куараос уг тупало, но чузъяськемзыя матын луо (мыным – лэсьтыны). Висъяське на КУШЕТО (составной) Р., кудћз кылдэ кык-куинь кылъёслэсь. Дэмламын на: куаратупан.

ДЋНЬ литератураын (род в литературе). Соос куинь – эпос, лирика но драма. Учыръёс сярысь мадён – эпос, пуш мылкыдэз усьтыса малпаськон (субъективно-эмоциональное размышление) – лирика, геройёслэн куспазы вераськемзы пыр учыръёсты возьматон – драма.

РОМАН (роман – фр. roman – роман). Прозаен гожтэм бадњым эпической текст. Отысь учыръёс малпамын, но со вакытэ ик историен юн герњаськемын. Адями но солэн улонэз трос дыр џоже, пќртэм учыръёсын возьматэмын, сюжет трос ќръёсъя радъяське, трос геройёсты возьматэ. Р.-ын нырысь интыын – нимаз адямилэн адњонэз, со бќрсьы – калыклэн но историлэн.

КЫЛБУРЕН РОМАН (роман в стихах). Лиро-эпической жанрлэн бадњым вылкабез (формаез). Роман сямен ик, аспќртэмлыко луэ трос пќлэсо сюжетэныз, трос геройесыныз, характеръёсты быдэсак сямен усьтыны тыршеменыз. Озьы ик лирикаын кутћськись чеберлыко кылсуред (художественной образ) кылдытон амалъёс паськыт кутћсько. Кылбурен гожтэм романын вань героез, кудћзлэн малпанъёсыз пыр ортчо ваньмыз возьматэм учыръёс. Њуч литератураын, кылсярысь, К. р. гожтћз А. Пушкин («Евгений Онегин»), удмуртаз– Ф. Пукроков («Ошмес син»).

РОМАНТИЗМ (романтизм). Европаын но Америкаын 18-тћ даурлэн пумаз – 19-тћ даурлэн нырысетћ љыныяз нимысьтыз висъяськем литература но искусство тулкым. Кужмо идеалэз утчан, солэсь мќзмон. Одно кулэ тодыны «романтическое двоемирие» валатонэз, кытын кылдэ кык дунне: огез урод маке (кытын курадњыса улэ герой) но огез синмаськымон умой дунне (кытчы кыстћське герой, џемысь отчы нюръяськонъёс пыр мынэ). В. Скотт, Дж. Байрон, В. Гюго, Э. По, М. Лермонтов но мкт. Удмурт литератураын романтизмлэн тодметъёсыз кужмоесь К. Гердлэн, И. Гавриловлэн ужъёсазы, озьы ик М. Петровлэн («Италмас») поэмаяз.

САРКАЗМ (гр. sarсasmos – сильзэ кесясько). Сатиралэн одћгез амалэз, туж лек ултћян. Жаляз кион ыжез, соин ик кельтћз солэсь пичи сюръёссэ но быжзэ.

САТИРА (лат. satira – пќртэм емышъёслэсь дасям сиён). «Йыркуро» серекъян. Солэн амалъёсыз: сарказм, ирония, гипербола, гротеск, аллегория, пародия. Учкы озьы ик: «комизм». Дэмламын на: серекъяса куштон (А. Бутолин).

ЭРИКО кылбуран (свободное стихосложение). Озьы ик «верлибр». Кылбур но проза вискын сылэ; рифмаян радэз, кылбуркабез (размерез), уг чакла; чуръянэз юромо сќремын.

СЕНТИМЕНТАЛИЗМ (сентиментализм – гр. sentiment – шќдон). Европаын 18-тћ даурлэн кыкетћ љыныяз – 19-тћ даурлэн кутсконаз азинскем литература ќр. Вылће љутэмын «мылкыд», «шќдон» – талэсь азьло классицизмын вал рационализм, «йырвизь», «визьбур». С.-е пыро Л. Стерн, С. Ричардсон, Ж.-Ж. Руссо, Н. Карамзин «Бедная Лиза».

СИЛЛАБИКА (силлабика – гр. syllabe – слог). Слогъёслэсь лыдзэс чакласа радъям кылбуран амал. Тодмо луо 7, 9, 11 но 13 слогъем чуръёсын кылбуран. Россиын вќлмемын вал 17-18-тћ дауре, М. Ломоносов дырысен азьпал радэ силлабо-тоника потэ.

СИЛЛАБО-ТОНИКА (силлабо-тоника – гр. syllabe – слог). Кылбуран амал, кытын чаклало кужмо но ляб слогъёслэсь радъяськемзэс. Валтћсь кылбуркабъёсыз (размеръёсыз): ямб, хорей, дактиль, анапест, амфибрахий.

СИМВОЛ (символ – гр. symbolon – пус, тодман пус). Матын «кылсуред» («образ») но «архетип» валатонъёслы. Сыче пус, кудћз пуштросэзъя кыче ке но мукет малпанэз возьматэ. Кылсярысь, эмтодослэн (медициналэн) С.-эз – вож кый. Дэмламын на: пус.

СИМВОЛИЗМ, символистъёс (символизм, символисты). Лулчеберетысь 1870–1910-тћ аръёсысь нимысьтыз тулкым, кытын гожъясчиос возьматоно дуннелэсь «адскисьтэм», «лушкем» пуштроссэ но чеберлыксэ шараяны тыршо. Тужгес но тодмоесь литератураын: П. Валери, А. Рембо, С. Мелларме, А. Блок, А. Белый, Ф. Сологуб. Удмурт литератураын пусйымон луэ К. Герд, кудћз Валерий Брюсов символист дорын огвакыт дышетскиз.

СИНЕКДОХА (синекдоха – гр. synekdoche – соотнесение). Метонимилэн кыктоез, куке быдэсыз интые пичи люкетсэ нимало. «Быроз мынам йыры» – йыры гинэ ќвќл, ачим но быдэскын быро. Дэмламын на: люкетним.

СКАЗ, учк. МАДЬ-ВЕРОС

МАДЬ-ВЕРОС (сказ). Автор гожтэ текстсэ сыџе манерен – сое калыкысь потэм маскарчи маде кадь – юромо волятымтэ кылын. Тодмо луо Н. Лесковлэн, М. Зощенколэн, В. Шукшинлэн М.-в.-ёссы. Удмурт литератураын, кылсярысь, Кедра Митрейлэн «Пиме соризы» ужез М.-в. жанрен гожтэмын.

МАДЬ (сказание). Фольклорын мадьыса (повествуя) верано жанръёслэн огъясь нимзы: (преданиос, легендаос, быличкаос). Дэмламын на: веран кыл (К. Герд).

ВЫЖЫКЫЛ (сказка). Паймымон яке осконтэм пуштросо, улонын зэмос луисьтэм учыръёс сярысь верос. Удмурт кылосын паськыт вќлмемын паймытћсь но пудо-животъёс сярысь выжыкылъёс. Дэмламын на: мадён кыл, пќртман кыл, вожо мадь.

ПАЙМЫТСЬ ВЫЖЫКЫЛ (волшебная сказка). Магической сям-йылолъёслы матын, куке «сопал дуннелэн» ванезлы оско; адямилы отын сыџе быгатонлыкъёс сётћсько, кудъёсыз зэмос улонын луыны уг быгато. П. В.-лэсь ёзсознэтсэ-кабзэ усьтћз В. Пропп. Дэмламын на: пќрмаськись выжыкыл.

ПУШТРОСэз текстлэн (содержание текста). Ма сярысь вераськон мынэ текстын. -эз одно ик солэн вылкабеныз герњаськемын.

СОНЕТ (сонет – ит. sonare – кылћськыны). Кылбуранлэн одћгез кабез, кудаз 14 чур луэ, рифмаяське џемгес тазьы: абба абба ссд еед, со сяна вань на трос гинэ мукет рифмаяськон кабъёс. «Венок сонетов» – «сонет ТУГОКО», кытчы пыре 14+1 сонет, берпуметћез луэ мадригал, куке азьвыл 14 сонетъёслэн нырысетћ чуръёссы бќрсьысь бќрсьы кылдыто нимаз кылбур-сонет. Пуштросэзъя сонетысь нырысетћ срофа – со усьтон, кутскон яке итћськон (завязка), кыкетћ строфа – азьланьскон (развитие), куинетћ строфа – йыл, шорсюлэм (кульминация), ньылетћ строфа – йылпумъян (развязка) луыны кулэ. Куинетћ строфа азьвыл кыкезлы антитеза (пумитпуктон) шуыса но эскериське. Дэмламын на: сонет керттэт (А. Е.).

СОЦИАЛИЗМО РЕАЛИЗМ (социалистический реализм). Литератураысь, лулчеберетысь но огъя историысь вакыт (1932-тћ арысен – 1980-тћ аръёслэн шорозязы), куке гожъясьчиос азьын ужпум сылэ вал гожтыны сыџе ужъёс, кытын возьматћське шонер, умой но капчи улонэ вуттћсь улон.

СПОНДЕЙ (спондей – гр. spondeios – кисьтиськон). Силлабо-тоника кылбуран радын – «мултэс», радызъя кулэтэм луись ударение. «Швед, русский колет, рубит, режет...» () – нырысетћ кыкез слогъёс ударение улсын луо, нош ямбын ударение кыкетћяз слог вылэ гинэ усьыны кулэ.

ЏОШАТОН (сравнение). Кылэз чеберман амал (троп), кудћз пќрмемын одћг явлениез яке арбериез мукетыныз џошатон вылын. «Кадь», «выллем», «укшась» но мкт. сыџегес кылъёсын пќрме, али џемысь кутћське лэсьтон падежлэн кабез но. Вќлскем Џ. – развернутое сравнение.

СТИЛЬ литератураын, учк. ГОЖЪЯНМАНЕР.

ГОЖЪЯНМАНЕР (стиль – гр. stylos – гожъяськон понна векчи пу). Гожъясьчилэн творчествоезлэсь, текстлэсь, литература ќрлэсь, калык литературалэсь аспќртэмлыксэс возьматћсь образной сќзнэтлэн, чеберлыко амалъёслэн оглыксы (общностьсы). Висъясько «бадњым Г.-ёс» – вакытлэн Г.-ыз (возрождение, классицизм, романтизм но о. а.), озьы ик пќртэм литература ќръёслэн Г.-зы, нимысьтыз усточиослэн Г.-ез.

КЫЛБУРРАДЛЫК (стихосложение). Литература теорилэн ёзэз, кудћз кылбур тусын гожтэм ужъёсты эскере. «В удмуртском стихосложении... – Удмурт кылбуррадлык удысын...»

КЫЛБУР (стихотворение). Лирика дћньысь тужгес но паськыт вќлмем жанр: вакчи чуръёсын радъяса, рифмаяса гожтэм уж.

СТОПА, учк. КЫЛБУРВАМЫШ.

КЫЛБУРВАМЫШ (стопа). Кылбур чурысь висъяны луоно огвыллемесь люкетъёс; котькуд люкетэ огмында слог пыре (џемысь кык яке куинь). Анапест –- куинь слогъем кылбурвамыш, кудаз кужмо луо 3-тћ слогъёс. Дэмламын на: кылбурпыд (К. Г.)

СТРОФА (строфа – гр. strophe – кожон). Џемгес луэ ньыльчур, шергес – кыкчур но куатьчур. Кылбур текстлэн люкетэз, кытын кќня ке чуръёс герњасько куспазы вылтуссыя но пуштроссыя (одћг малпанэн но рифмалэн огкадь радъяськеменыз огазеям кќня ке чуръёс). Куддыръя вошто «куплет» валатонэн, кудћз возьматэ кырњанлэсь С.-зэ, яке «катрен»-эн, кудћз герњаськемын сонетэн.

СТРУКТУРА, учк. ЁЗСЌЗНЭТ.

ЁЗСЌЗНЭТ (структура – лат. structura – интыяськем, радъяськем). Малэн ке но (шуом, текстлэн) пуш ласянь герњаськемез, марлы луыса текст возиське, «уг куашка». Текстэз П. ласянь тужгес но мур эскере структурализм ќр, куке нимысьтыз эскерисько бинар оппозициос, пќртэм модельёс но о. а. Дэмламын на: пушгерњет, радъяськон сузьет (Л. Ф.), сќзнэтъёс (Б. К.).

СТРУКТУРАЛИЗМ (структурализм – лат. structura – интыяськем, радъяськем). 1920-тћ аръёсысен кылдэм ќр, кытын уже куто пушгерњетэз эскерон амалъёсты (структурный метод), моделированиез, семиотикалэсь амалъёссэ, формализациез но математика амалъёсты – кылтодонын, литературатодонын, этнографиын, историын. Дэмламын на: пушгерњетлык.

СЮЖЕТ (сюжет – фр. sujet – арбери). Текстын возьматћськись учыръёсты возьматон, дыръя кыстиськемзэс но бќрсьысь бќрсе мынэмзэс чакласа. Но куддыръя С. нимкыл интые куто: «фабула». С.-лэн ёзнэтъесыз: экспозиция – мытэт – сюжет ќръяськон – сюжетгерд – пумъяськон – пумлэт. Дэмламын на: ортчись югдуръёс, мадем-верам суред, радъям учыръёс, мадьгож.

ТВОРЧЕСТВО (творчество). Чеберлыко текстэз кылдытон. Дэмламын на: выльпќрет, выльдонуж, выльсќзнэт, удысбур.

ТЕКСТ, учк. КЫЛКУЭТ.

КЫЛКУЭТ литератураын (текст в литературе). Дэмламын на: куэт (В. Кельмаков).

ТЕМА (тема – гр. thema – со, мар дћняз понэмын). Ма сярысь гожтэмын. Авторлэн малпанэз; улонысь со юанъёс, кудъёсыз шоры со аслаз произведенияз саклыксэ висъя. Кылсярысь, О. Четкарёвлэн повестьёсыз сярысь вераськыкуз тазьы шуэ: «О. Четкарёвлэн аслаз темаез…– со гурт но город вискы шедем адямилэсь драмазэ сэрттон-пертчон».

ТЕРМИН (лат. terminus – висъян) – УДЫСКЫЛ, НИМКЫЛ. Кыл яке кыл сочетание – аслаз сюбег, нимысьтыз научной пуштросэныз. Дэмламын на: кылним (К. Г.).

ТЕРЦИНА – ТЕРЦИНА. Ямбен гожтэм куинь кылбур чурлэсь кылдэм строфа. Терцинаын рифма кечевыл луэ: нырысетиез чур кыкетиеныз рифмая тупа, кыети чурез – кыкети строфаысь кыкети чурен. Рифмаослэн радъяськемзы таче: ава, всв, сдс.

ТИП (тип – гр. typos – каб, вашкала каб). Кќня ке муртлы тупась тодметъёсын, сямъёсын адямилэн огазеям образэз.

ТИПИЗАЦИЯ, ТИПИЧЕСКОЕ (гр. typos – тус, пытьы) – ТИПИЗАЦИЯ АМАЛ. Реализм понна валтись валатон. Кыче ке мер котыретлы, калыклы, кузёяськись учыръёслы тупасез чеберлыко огъян. Кылсярысь, Г. Красильниковлэсь «Вуж юртсэ» лыдзыса адзиськомы, кыче малпанъёсын но кызьы улэ вал со вакытэ удмурт гурт.

ТРАГЕДИ(Я) (трагедия – гр. tragos ode – кечтакалэн кырњамез). Драма дћньлэн жанрез, кытын валтћсь герой џемысь бырыны шеде; трагизмлэн но быронлэн мугез – асмуртлэн (личность) но Адњонлэн (Рок) ваче пумит вуэмзы.

ТРОП, учк. КЫЛЧЕБЕРМАН.

КЫЛЧЕБЕРМАН (троп – гр. tropos – оборот). Вераськонысь оборот, куке кылэз яке кылтэчетэз воштэм пуштросэн, валатонэн куто. К.-лэн инъетэз луэ кыџе ке тодметъя ог-огзылы матын луись кык явлениосты ваче пуктон. Одћг учырлэн тодметэзъя асьмеос мукетсэ суредаськом, сое валэктыны тыршиськом, син азе яркыт пуктон понна. Таџеесь К.-ёсты висъяло: капчиосыз (простейшие) – џошатон, эпитет; кушетоосыз (сложные) – метафора, метонимия, синекдоха, аллегория, ирония, гипербола, литота, перифраз но мкт. Куд-ог К.-ёс верано макелы витьымтэ шорысь мукет пуштрос-валатон сёто. Озьы, гожъясьчилэн К.-ты уже кутэменыз, кылбурлэн чеберлыкез но будэ, пуштросэз но муроме.

ТРИОЛЕТ (триолет – ит. trio – куинь). Тямыс чуръем кылбур каб, кудћз 4 кылбурвамышъем ямбен гожтэмын. Триолетлэн 1-тћ чурез нош ик потэ 4-тћ но 7-тћ чуръёсын, нош 2-тћ чурез – нош ик 8-тћын.

Дугдылытэк кошке сюрес.

Шулдыр крезьгур кадь жингыртэ.

Со котькинэ сьќраз чортэ,

Дугдылытэк кошке сюрес.

Кин ке сюрес сьќры сюре,

Кин ке дћсьтэ – сьораз дыртэ.

Дугдылытэк кошке сюрес,

Шулдыр крезьгур кадь жингыртэ. (Флор Васильев)

УДАРЕНИЕ (ударение). 1) Фонетика амалъёсын кылэз, кылтэчетэз яке слогез висъян. 2) Логической ударение – веранысь кыџе ке кылэз висъян, малпанэз возьматон понна: Тон-а книгадэ вунэтћд? Џем дыръя ударной слогез «кужмо слог» шуыны луэ. Дэмламын на: юн веран куара. (П. Воронцов), слогвисъян.

ТАНОН (умолчание; таныны – утаивать). Юромо вератэк кельтон амал.

УТОПИЯ, учк. СИНМАЛЬДУННЕ.

СИНМАЛЬДУННЕ (утопия). Кык пќртэм валэкто: 1) дунне, кудћз ќвќл но 2) туж узыр дунне. Малпам, туж шудо но чебер улон дунне, кудиз чеберлыко гожтосын возьматэмын. Солы пумит луэ сьќдмальдунне (антиутопия).

СЬЌДМАЛЬДУННЕ (антиутопия). Учк. СИНМАЛЬДУННЕ.

ФАБУЛА (фабула – лат. fibula – верос). Гожтосын возьматэм учыръёсты дыр ласянь борсьысь борсе радъян. Ф. матын луэ сюжет валатонлы, но автор куддыръя учыръёсты юромо сураса, интыенызы вошъяса сётэ.

ФАНТАСТИКА (фантастика – гр. phantastike – малпаны быгатон). Фантастика пуштросо гожтос, кытын осконтэм паймымон учыръёс наукалэсь азинсконзэ лыдэ басьтыса кылдытъямын. О. Четкарев «Пиртэш толэзь». Фантастикалэсь тодметъёссэ умой усьтћз П. Захаров «Инвожо» журналын (2004, № 1). Фантастическое – ФАНТАСТИКАЁ, осконтэм маке. Малпам, мар зэмос улонын ќвќл.

ФЕЛЬЕТОН (фельетон – фр. feuille – листок). Серемес но сатира пуштросъем гожтос, очерк. Дэмламын на: пелеетон.

ФЕМИНИЗМ (феминизм – лат. femina – нылкышно). Туала тодосын но лулчеберетын: мар ке шоры «нылкышно синмын» учкон.

КАЛЫК КЫЛОС (фольклор). Калык кылосын улћсь но азинскись эпос, лирика но драма текстъёс, соос профессиональноесь уг луо. Верасько-мадисько яке кырњасько сям-нергеос ортчытъяку, озьы ик калыклэн нуналмысь огшоры улоназ – ужакуз, шудыкуз, шутэтскыкуз, шумпотыкуз но куректыкуз. Та текстъёс ымысь ыме, пельысь пеле выжыятскыса уло. Дэмламын на: калык кылбурет.

ФОРМА, учк. ВЫЛКАБ.

ВЫЛКАБ (форма – лат. forma – вылтус). Гожтосэсь пуштроссэ возьматон амал. Литератураын произведениез эскерыкумы юаськом, кызьы маке возьматэмын (вылкаб) но ма возьматэмын. Дэмламын на: вылтус, кабет.

ФУТУРИЗМ, футуристъёс (футуризм, футуристы – лат. futurum – азьланез). Литератураын 1910–20-тћ аръёсысь нимысьтыз тулкым (Маринетти, Маяковский, В. Хлебников). «Вуоно вапумлэсь» лулчберетсэ кылдытон, куке вашкала йылолъёсты палэнто, урбанизм (карын улон) культураез лыдэ басьто, огинэ вутто документализмез но фантастикаез. Та текстъёсын пумиськыло кыллэн удысысьтыз кыдёкысь формаос: крезьгур нотаос, математикаысь пусъёс но мкт.

ХАРАКТЕР литератураын (характер литературный). Нимысьтыз геройлы гинэ тупась сямъёс, мылкыдъёс, малпанъёс. Дэмламын на: напсћ.

ХОРЕЙ (хорей – гр. choreios – эктон). Кык слогъем кылбурвамыш, кудаз кужмо луо 1-тћ слогъёс (ударение нырысетћ слогъёсы усе): (__ __). Кылсярысь, «Њеч-а, бур-а выль ю-нянь» (Ф. Кедров), яке «Со умме усем, пересь, / Со куака сюдэм, пересь» (А. Клабуков).

ХРОНОТОП, учк. ИНТЫДЫР.

ИНТЫДЫР (хронотоп – гр. chronos – дыр, topos – инты). Текстлэн интылык но дыр ласянь радъяськемез. Учкы озьы ик «дыр» но «инты». М. Бахтинлэн дышетэмезъя, та кык валатонъёсты умойгес огинын учкыны но эскерыны, угось куспазы соос кужмо герњаськемын.

.

ЧЕБЕРЛЫКО ЛИТЕРАТУРА (художественная литература). Дэмламын на: чеберлыко кылбурет. (К. Г.)

ЦЕЗУРА (цезура – лат. сaesura – рассечение, куараен висъян). Кылбурын кылъёсты куараен висъян.

СУЗЬЕТ (цикл – гр. kyklos – котырес). Кќня ке текстъёс, кудъёсыз кыџе ке тодметъёсъя огинэ герњамын. С. луэ «сонет тугоко» но. Гожъямъёссэ сузьет шуыса нима автор, но сое висъяны, ёзнаны быгатэ эскерись мурт но (тодосчи). Таџе кылбуръёсыз авторлэн быдэс сузьет луо но книгаосызлэсь берло бамъёссэ узырмыто. (А. Е.)

НЬЫЛЬЧУР (четверостишие, сонетын – катрен). Ньыль чурен гожтэм кылбур. Кырњанысь Н.-ез џемгес куплет шуо.

ШАРЖ, учк. МАСКАРИ.

МАСКАРИ (шарж – фр. charge) – МАСКАРИ. Сатираё серекъян. Отын автор њеч мылкыдын учке гожъясьчилэн творчествоез но гожтосъёсыз шоры, нош соин џош ик отысь шедьтэ кыџе ке но серекъяно интыоссэ, соосты нимысьтыз ик лыдњись азе поттыны тырше яке уката но вылэ љутыса, ушъяса яке ултћяса возьматэ. М.-ын сыџе возьматон юрттэ аслыз гожъясьчилы но ужез шоры выль синмын учкыны, лыдњисьёслы трос выльзэ валэктэ. Кылсярысь, А. Богомоловалы таџе М. гожтэ: «Њеч сюлмысь гинэ лыдње, / Њеч синмын гинэ адње. / Њеч мылкыд гинэ кузьма, / Њеч кылэз гинэ возьма».

КУАТЬЧУР (шестистишие). Кылбур, кудћз стофикаез ласянь быдэн куать чурен висъяллямын.

СЕРЕМКЫЛ (шутка). Калык кылослэн жанрез, кудћз кылдэмын малпаса, серемес йылпумъяса, капчи мылкыдо исаськонэн. Џемысь вачекыл-диалог амалэн кутћське, кылсярысь: «– Вай мыным мар ке но сиыны». – «Возьма ќжытак, али картэ вуоз».– «Тау, адямиосты мон уг сииськы».

ЭКСЛИБРИС (экслибрис – лат. exlibris – книгаосысь). Книгаысь пус, кудћз лякемын книга вылбамлэн пуш палаз; со валэктэ книгалэсь кинлэн луэмзэ.

ЭКСПОЗИЦИЯ (экспозиция – лат. expositio – юромо возьматон). Эпической текстын учыръёслэн но конфликтлэн кутскемезлэсь азьло вылэм югдурез, геройёсты, соослэсь кусыпъёссэс но кызьы улэмзэс возьматон.

ЭКСПРОМТ (экспромт – лат. expromtus – дась). Азьвыл дасяськытэк, љог гожтэм кылбур яке кќня ке чуръем кылъёс, џемысь сатира, серемес шќмо. Паськыт валатонэн – азьпалаз дасяськытэк, мае ке шуак быдэстон.

ЭЛЕГИ(Я) (элегия – гр. elegeia). Туала вакытэ: мќзмыт-малпаськытћсь кылбур, џем дыръя сайкыт-пессимизмо пуштросэн. Кылсярысь, К. Гердлэн «Мон кулћ ке…», «Љыт гырлы» элегиосыз жанрзы ласянь ик пусъемын.

ЭЛЛИПСИС (эллипсис – гр. elleipsis – усён). Стилистикалэн удысысьтыз – веранлэн ёзсќзнэтаз кулэ луись люкетэз вератэк кельтон. Контекстын со куштэм кыллэн валатонэз уг ышы.

.

ЭПИГРАММА (эпиграмма – гр. epigramma – вылаз гожтэм). Сатира пуштросо вакчияк кылбур, паськыт вќлмиз классицизм вакытысен. Дэмламын на: бышкет, бышкы.

ЭПИГРАФ, учк. НЫРЪЯНКЫЛ.

НЫРЪЯНКЫЛ (эпиграф) (Бюллетень №1). Вашкала грекъёслэн: памятникъёс вылысь гожтосъёс. Бќрысь Э. шуыны кутскизы мукет авторлэн гожтосысьтыз пичи люкетсэ, кудзэ гожъясьчи ас ужезлэн кутсконаз яке йыретъёс азьпала интыя. Дэмламын на: азьчур.

БЕРПУМКЫЛ (эпилог – гр. epilogos – берло веран). (Бюллетень №1). Антикаын – берпуметћ монолог, кытын учкисьёсты жаляны куро яке вакчияк мадё, мар луиз геройесын азьланяз. Дэмламын на: йылпумъян, йылпумъян кыл, ватсан, беркыл, сьќркыл, ватсаса веран, пумлэт.

ШАЙВЫЛКЫЛБУР (эпитафия – гр. epitaphios – шайпул вылысь). Шайгу из вылэ гожтыса кельтэм кылбур, кытын кулэм муртлэн аспќртэмлыкез вакчияк но мур усьтэмын луэ. Дэмламын на: шайизкылбур.

ЭПИТЕТ, учк. ЧЕБЕРЛЫКО ТОДМЕТ.

ЧЕБЕРЛЫКО ТОДМЕТ (эпитет – гр. epitheton – ватсамын). Чебер, «образной» определение, тодмет. Аспќртэмлыко «ватэм» џошатон, кудћз арберилэсь суредзэ син азе пуктыны, кылыны, шќдыны юрттэ: лэчыт кыл сюлэме пыре: «пурысьтам нунал», «йырез поромытћсь возьёс» (К. Герд).

ЭПИФОРА (эпифора – гр. epiphora – выльысь веран). Ваче пумит анафоралы. Кылбур чурлэн пумаз кыче ке люкетъеслэн выльысь потылэмзы. Эпифора пќлы пыре рифма но.

ЭПОПЕЯ (эпопея – гр. epos – мадён; poieo – лэсьтћсько). Историысь тодмо учыръёсты возьматћсь кылбурен яке прозаен бадњым веран. (Гомер «Илиада», Э. Лённрот «Калевала»; «Война и мир»).

ЭПОС (эпос – гр. epos – повествование). 1) Литературалэн одћгез дћнез (родэз): лирикаен но драмаен артэ. 2) Эпопея валатонлы синоним.

ЭСТЕТИКА (эстетика – гр. aisthetikos – шќдћсь). Чеберез шќдон, валан но сое эскерись тодос. Дэмламын на: чебертодос.

ЭССЕ (эссе – фр.). Кыџе ке гожъясьчи яке солэн гожтосэз сярысь эркын малпанъёс. Э.-лэн авторез гожтэ, кызьы со шќдэ но дунъя текстэз, маиз отын кельше, маиз паймытэ-синмаськытэ. Озьыен, Э.-ын аслаз гожтись муртлэн но дуннешодонэз яркыт адњиськыны кулэ, критикаё статьяын сярысь.

ЭТНОФУТУРИЗМ (этнофутуризм – гр. ethnos – калык, лат. futurum – азьланез, вуоноез). Социализмо реализм ќр куашкам бере огъя культурае кылдэм выль ќр, куке ќжыт лыдъем калыкъес выль сямен љуто этносэн герњаськем ужпумъёссэс (аспќртэмлыко неоромантизм), со дыре ик лыдэ басьто туала постмодернизм вакытлэсь куронъёссэ но. Кылдћз та валатон Эстониын 1980-тћ аръёслэн пумазы. «Этнофутуризм – со асьме вашкала культурамы шоры выль синмын учкон форма но амал». (П. З.)

ЮМОР, учк. СЕРЕМБУР

СЕРЕМБУР (юмор – гр. hymor). Учыръёсты, адямиосты но соослэсь ужъёссэс серемес возьматон. Лулчеберетын зэмлыко луо, малы ке шуоно зэмос улонысь серемес учыръёсты суредало. Улонэ умойзэ пычатыны юртто. Серекъян – трос пќртэм литература жанръёсын кутћське (комедиын, водевильын, басняын, серемес веросын, юморескаын, пародиын, фельетонын, памфлетын). Учкы озьы ик «комизм». Дэмламын на: тупатон вылысь серекъян (А. Бутолин).

ЮМОК (юмореска). Литератураын – юмоке вуэм сярысь вакчияк серемес верос, гожтэмын прозаен яке кылбурен. Пальыштыклы (анекдотлы), бытовой выжыкыллы, фельетонлы матын. Чутрак висъясь гожъёсыз та жанрлэн ќвќл, соин ик татчы кытћяз пырто на серемес шќмо веросъёсты но кылбуръёсты.

ЁЗ (явление). Драма текстын люкет, куке сцена вылын шудћсьёслэн лыдзы уг воштћськы.

ЯМБ (ямб – гр. iambos – вамыш лэсьтыны). Кык слогъем кылбурвамыш, кытын ударение 2-тћ слогъёсы усе: (__ __). «Гуртын буран, / Гуртын пурга – / Вуж гурт урам / Питыр берга...» (К. Г.).

ПЌРТМАНКЫЛ, ВЫЖЫКЫЛ – со паймоно яке осконтэм пуштросо мадёс, кытын возьматэмын огшоры адямилэн улонэз, ужамез, пќртэм шуг-секытъёсын пумиськылэмез, пеймыт кужымъёсын но социальной тушмонъёсын ваче пумит вуылэмез но соосты вормемез. Удмурт фольклористикаын та нимкыллэн пуштросэз «сказка» пуштросэн гинэ кутиське на. Нош азьло солэн пуштросэз паськытгес вылэм. Выжыкыл термин кык кыллэсь пормемын: выжы – огъя перм. кыл (В. Лыткинъя), со род, родство, основание шуэмез возьматэ, нош кыл – татын кутиське веран, мадён пуштросэн. Выжыкыл – со родлэн (пиосмурт линияя кыче ке выжылэн) кылдэмез но улэмез сярысь выжыятыса верам мадёс.

МИФОЛОГИЧЕСКОЙ ВЫЖЫКЫЛЪЁС, адями но инкуазь кузёос сярысь мифологической пќртманкылъёс – тужгес но вашкалаосыз пќлы пыро. Џемысь татын возьматћське адямиослэн но пеймыт кужымъёслэн (миф лулосъёслэн) кусыпъёссы. Та выжыкылъёсын адями уг сётћськы ни инкуазь кузёлы, быгатэ вормыны Вумуртъёсты, Нюлэсмуртъёсты аслаз визьмыныз, кескич луэменыз, адями соосты шузие кельтэ.

ПУДО-ЖИВОТЪЁС СЯРЫСЬ ВЫЖЫКЫЛЪЁС озьы ик вашкалаосыз луо. Персонажъёс кык туркымлы (группалы) люкисько: кыр пќйшуръёс но гурт пудо-животъёс. Соослэн ваче пумит вуылэмзы вылын аллегория амал пыр калык возьматыны тырше адямилэсь сямъёссэ, выросъёссэ. Гурт пудо-животъёс пыр возьматћське ужез яратон но мукет умой сямъёс, нош кыр пќйшуръёс вылын серекъяса сётэмын умойтэм сямъёс.

ВУКУЗЁ – удмурт мифдуннеысь демонологической персонаж. Вулэн кузёез, удмурт калыклэн мифдуннеяз ву сильтќллэн кузёез, нырысетћ кылдэм бадњым вуын (океанын) улћсез. Дуалистической, дунне кылдэм сярысь мифъёсын В. (мукет вариантъёсын Керемет, Луд, Шайтан) Инмарлэн тушмонэз.

ВУМУРТ, ВУ-МУРТ – удумрт мифдуннеысь демонологической персонаж, кузь сьќд йырсиё, адями вылтусо (антропоморфной) лул. Куддыръя тыбыраз одћг синмын, туж бадњым пыдо. Быгатэ чипейлы берытскыны. Сое кылдытэм Вукузё. Улэ бадњым тыослэн но шуръёслэн пыдсазы, соин џем дыръя сое отысь адњыны луэ, пе. Чем дыръя улэ вукоос дурын мур кожын. Яратоно адямиосызлы со быгатэ пайда вайыны, умой лэсьтыны. Нош кинэ ке уг ке яраты, солэсь пудозэ выйтыны быгатэ, нош аслыз адямилы пќртэм черъёс ыстэ. Ву улын вань солэн коркаез, туж чебер кышноез но нылыз, трос узырлыкез, пудо-животэз. Тудву дыръя сюанъёс ортчытэ. Куддыръя адямиос пќлы но потаны быгатэ. Вузаськонниосы (ярмарка) вуылэ, адямиослэсь сое висъяны луоно дћськутысьтыз паллян сќзулызлэн котэзъя. Џем дыръя В. уг адњиськы паймытћсь (чудодейственный) зыраськонэзлы (мазь) луыса. Солэсь мозмытскон понна, адямилы њечсэ гинэ карон понна курбон сёто (џем дыръя ыж, тылобурдо, нянь-табань).

МУНЧОКУЗЁ, МУНЧОМУРТ – удмурт мифологиысь лек лул, кудћз мунчоысь гур сьќрын яке лапча улын улэ. Џем дыръя со адскисьтэм луэ. М.-эз шодоно адямилы кыџе ке урод лэсьтэм ужъёсызъя. М. адями азе потыны яке аслэсьтыз адямиен артэ луэмзэ возьматыны быгатэ соку, куке адямиос тћяло вашкала дырысен тупатэм куронъёсты яке уг быдэсто соосты: уйшоре яке куинь пол веникен пырем бере мунчоын пыласько. М. воштыны быгатэ, пе, мунчое кельтэм вож нуныез но, соин ик уг яра пичи нуныез огназэ мунчое кельтыны.

ИНМАР – удмуртъёслэн мифдуннеязы валтћсь инмар. Ваче пумит пуктэмын Керемет агаезлы (Лудлы яке Шайтанлы). И.-лэн куремезъя, Керемет океан пыдсысь ымаз поныса музъем поттћз. И. Кереметэз ымпушкысьтыз музъемез сялњыны косыкуз, Керемет ваньзэ сялњымтэ. И. музъемез бадњыматыны кутскем но таин валче Кереметлэн но ымаз музъем будыны кутскем. Озьы Керемет ватоссэ сялњоно луэм, соин ик џошкыт интыосы гурезьёс кылдћллям. И. будосъёслэн но пќйшуръёслэн кылдытћсьсы. Удмурт антропогонической мифъёсын И. нырысь ик алангасаръёсты кылдытэ. Мукет вариантъёсъя (христиан осконлэн влияниез улсын), И. нырысь кылдытэм горд сюйлэсь Уром адямиез но сое синмаськымон садэ интыям. Уром адямилэсь мќзмемзэ адњыса, И. солы нылкышно кылдытэм. Адями музъем вылын улыны кутскем бере, И. инме улыны выжем. Адямиос куро солэсь умой куазь, емышъёслы, будосъёслы удалтонлык, адямилы – тазалык.

КЕРЕМЕТ – удмурт калыклэн мифдуннеяз уродзэ ваись инмар, пумит пуктэмын Инмар агаезлы. Лек висёнъёс вќлмон вакытэ лудъёсын (кереметъёсын) адямиос К.-лы вќсьёс ортчыто. Туно К.-лы сьќд пудо-животэз курбон сётэ. К.-лы оскон тупа поръёслэн мифдуннезылы но (отын К. уродзэ ваись инмар, пумит сылэ Кугу-юмо агаезлы).

КЫЛДЫСИН – удумрт калыклэн мифдуннеяз инмар, кудћз инмын улэ но вань дуннеен кивалтэ. Нырысь со улэм адямиос пќлын. Тќдьы дћсен пересьлы берытскыса, музъем котырысь ужасьёслэн бусыосазы ветлыны яратэм; межаос кузя мынэмъяз, нянь шепъёсты тупатъям. Огвакытэ адямиос кќтырмостэм луиллям (межаоссэс трослы бадњыматћллям), соин К.-лы ветлыны инты кыльымтэ. К.-лы тупатскыса дћсяськемысь дугдћллям, дћсьсэс тќдьы интые лыз буёло кариллям. К. тае сантэманэн лыдъям но инме тубем (мукет вариантъёсъя – музъеме). Кема дыр џоже вќсь кызьпу дорын адямиос К. восяськиллям на, доразы мед берытскоз шуыса. Берло ини К. калыклы горд коньы тусын кызьпу йылын возьматскем. К. доразы мед кылёз шуыса, пойшурасьёс ыбиллям коньыез, нош К. усьыса сялалы берытскем, собере турлы, берло юш тусын шуре ватскем.

АЛАНГАСАР – калыкъёслэн мифдуннеязы туж бадњым, љужыт адями. А.-лэн тушмонъёсыз, мугор люкетъёссэ вандылыса, пасьтана музъем вылтћ сэрпалляллям. Солэн кышноез кыткем лызалэс-пурысь (серосивый) валэн мугор люкетъёссэ огазе люкаса ветлэм. А.-ез кышноез улњытыны быгатымтэ: џогыса куштэм йырзэ ќвќл шедьтэм. А. озьы ик удмуртъёслэн но (џемысь лымшор удмуртъёслэн) мифдуннеязы пумиське. А. – со туж бадњым, љужыт адями (великан). Туж љужытэнызы, соос нюлэскытћ пушнер пќлтћ кадь ветлћллям, визьмынызы ушъяськыны быгатћллямтэ. Пичи адямиез пумитаса, солэсь котьма ужез ужаны быгатэмзэ адњыса, кошкиллям. Кошкыкузы изъёслы пќрмиллям яке воксё туж мур гуосы усьылыса быриллям. Собере гинэ огшоры адямиос вќлмиллям: муш вордыны, пудо утьыны, музъем ужаны кутскиллям.

АНИМИЗМ (анимизм – лат. – лул). Вашкала оскон, котырысь улосэз, дуннез улэпен адњон, вань арбериослэн, инкуазь явлениослэн луло луэмзылы оскон.

АНТРОПОМОРФИЗМ (антропоморфизм – грек кылысь «адями + тус/вылтус»). Калык кылосын пќртэм лулъёсты, пќйшуръёсты, будосъёсты вылтуссыя адямилы кельшытон, адями манеръёсын но сямъёсын возьматон.

ИМПРОВИЗАЦИ(Я) (импровизация – гр. – «пудо-живот, пќйшур + тус/вылтус»). Калык кылосын пќртэм лулъёсты, будосъёсты, адямиосты вылтуссыя пудо-животъёслы, пќйшуръёслы кельшытон, соослэн манеръёсынызы но сямъёсынызы возьматон.

ИМПРОВИЗАЦИЯ (импровизация – латынь кылысь «шќдтэк шорысь, шуак»). Кырњан дыръя яке мадьыку-вераку быдэсак выль текст кылдытон.

ИНФОРМАНТ, ИНФОРМАТОР (информант, информатор – латынь – валэктон). Калык кылосысь текстъёсты верась мурт, кудизлэсь соос гожтћсько.

КОНТАМИНАЦИ(Я) (контаминация – латынь – огазеян). Одћг мадён-веранын одћг но солэсь тросгес мотивъёслэн, сюжетъёслэн яке быдэс текстъёслэн одћге сураськемзы, люкаськемзы.

ГЕРОЙ культурной (герой культурный). Калык эпосысь калыклы пайда ваись герой. Со поттћз тыл, корт, сиёно будосъёс, лэсьтћз ужан тћрлыкъёс но мкт.

МАГИЯ антропейная (магия антропейная – гр. – шудтэм учырлэсь, черлэсь, висёнлэсь палэнтон/возьман). Вылћ кужымъёслы оскон, котыр улосысь вань урод учыръёслэсь сям-йылолъёсты, нимысьтыз арбериосты, кылан-буранъёсты уже кутыса утиськон.

ТУНКЫЛЪЁС – кыллэн кужымезлы оскон, фольклорын кылдытэ пќртэм муген кутћськись веран-мадёнъёсты (юриськон/каргаськон, оскытон, сизён, утиськон но мкт).

ЙЫР БЕРЫКТОН КЫЛЪЁС – кыллэн кужымезлы оскыса, гажан муртлэсь мылкыдзэ ас палад карон понна юрттэт курыса веран-мадь.

ВАЗИСЬКОНЪЁС – инкуазь кужымъёсты вакчияк ќтёнъёс. Азьло дыръя соос нимысьтыз вќсь нергеосы (зор курон, зор дугдытон сяме) пыро вылэм. Али та ќтёнъёс ваньмыз сямен нылпи фольклоре выжемын.

СЌРОН КЫЛ – та кылъёсты вераны быгато вылэм сьќд кужымен герњаськем адямиос гинэ (вединъёс). Кылын соос юнматозы вылэм сьќд кужымзэс лэзёно арбериез (сиён-юонэз, адямилэсь йырсизэ но мкт).

КУРИСЬКОНЪЁС. Шудбур, дэлет-азинлык, тазалык курыса, инкуазь кужымъёслы, инмаръёслы вазиськонъёс.

ВЌСЬКЫЛ, учк. КУРИСЬКОНЪЁС.

ТУНАТСКОН КЫЛ – кылдэмын вашкала дырысен. Инъетэз языческой религия луэ. Татын шќдћське кыллэн но вырослэн магической кужымезлы оскон. Тунатскон кыл кутћське соку, куке тодыны тыршо вуоно улонзэс, палэнын ортчись учырез, явлениез.