Сценарий: Гаж «Чолöм, дзолюкъяс» (Праздник Привет, малыши!) в Ижемском районе.
Авторы: , заведующий лабораторией национальных проблем дошкольного образования, , научный сотрудник лаборатории национальных проблем дошкольного образования, , научный сотрудник лаборатории национальных проблем дошкольного образования, , главный редактор редакционного отдела КРИРО
ЗАЛ: гажöдöма гожся серъясöн; гöсьтъяс лöсьöдчöны залын. Воспитательяс вочасöн вайöдöны челядьöс да пуксьöдалöны. Залын ворсö музыка – коми сьыланкывъяс.
Фонограмма Трек № 1
(Кикуруллю петö, аддзö операторöс да чуймö, ветлöдлö сы гöгöр)
Кикуруллю: Ки-ку-ру-ллю! Ваня дядь? Бара уджалан?
Д. В.: Да.
К.: Камераыд бур? Вай видзöдла! А ме нö кыдзи петi? (видзöдö камераö) А тайö нö ме али мый? Кикуруллю. А челядьыс кöнi? (матыстчö челядь дорö)
(Петö нуöдысь, юрас дзоридзьясысь юркытш, гожся паськöма)
Ведущий: Кикуруллю, мый бара ставнысö шызьöдан?
К.: Видзöд, видзöд татчö, кымын челядь танi тыдалö. Аддзан?
Вед.: Аддза, аддза! Но и вильышпоз тэ, пыр мыйкö думыштан. Кикуруллю, а дзолюкъясыдкöд чолöмасин? Бара, кöнкö, вунöдiн.
К.: Ки-ку-ру-ллю, вай чолöмасям.
Вед.: Видза оланныд, дзолюкъяс!
К.: Чолöм, ёртъяс! («Рöдтi-гöнитi...»)
Рöдтiм-гöнитiм
Öшинь увтiным,
Карта сайтiным,
Паськыд туй кузя
Вöрса ордымöд
Гажа сиктö вои
Мича керкаö,
Челядь керкаыс ваш-ваш,
Танi олö шуд да гаж.
Телевизор öнi эм…
Сэсся нинöм оз ков мем!
Вед.: Кикуруллю, а кöн нö Шöвктугыд? Мыйла талун тэ öтнад?
К.: Кыдзи öтнам? Öтлаын локтiм да! Кытчöкö, ылалöма! Колö корны. А кыдз нö корнысö? А тöда! «Кекöнач» передачатö колö заводитны!
фонограмма Трек № 2 («Кекöнач» позывнöйяс, петö Шöвктуг.)
Шöвктуг: Чолöм, дзолюкъяс! Кикуруллю, бур лун! Мый, «Кекöнач» передачаыд заводитчö! Ме дась нин, дась! Меным сэтшöм нимкодь аддзысьны тiянкöд.
(петö Юмпель сьылігтырйи)
Ю.: А ме йылысь вунöдчинныд… «Дзолюк» передача нуöдысь йылысь. «Ме Юмпель, Юмпель…»
Вед.: Челядь, а ті тöдмалінныд, кодъяс тіян ордö воисны? Да, тайö Сыктывкарысь гöсьтъяс «Кекöнач» да «Дзолюк» передачаса геройяс. «Кекöнач» да «Дзолюк» передачаса геройяс ветлöдлöны республика пасьта да тöдмасьöны челядькöд, кодъяс велöдöны коми кыв. Со найö и тiян дорö воисны.
К.: Вай ворсыштам!
Ш. Т.: Ворсам! А мыйысь?
Ю.: Юмпельысь, Юмпельысь ворсам! (сьылöмöн) «Юмпель ворсö öти мöлöтöн, öти мöлöтöн, öти мöлöтöн»
К.: (перебивает) Огöй, «Кекöначысь» ворсам! (горöдö) Кикуруллю!
Ю.: Юмпельысь! «Юмпель ворсö кык мöлöтöн» (3 раза)
К.: Кекöначысь! (йöткасьöны, кыдзи кык петук)
Ш. Т.: Эн вензьöй! Вай бурджык дзолюкъясöс кывзыштам. Ноко, оз тусьяс, петкöдлöй асьнытö!
Вед.: Öні ставöн сувтам да ворсам «Кекöначысь».
(Кывбур «Кекöнач», сьыланкыв либö кытшын йöктöм, хоровод.)
КЕКÖНАЧ
Кекöнач! Кекöнач! (хлопают в ладоши)
Ыджыд мамыс (муса бабöй) ломтiс пач:
Пуö дзоля мортлы рок, (варит)
Шуö, гöститны пö лок. (зовет)
Кекöнач! Кекöнач! (хлопают в ладоши)
Мунам гöститны ми скач, (скакать)
Но оз котöрт дзоля кок…
Кöдзалас öд чöскыд рок.
Кекöнач! Кекöнач! (хлопают в ладоши)
Видлам лэбны ми вот тадз:
Кекö лэбис, лэбис, лэбис, (машут руками)
Сэсся вылö, вылö лыбис. (поднять руки и встать на носки)
Зарни туглы юр вылас
Шлыв пуксис. (руки на голову)
Ю.: Кутшöма гажöдiнныд! Аттьö тiянлы. Ёртъяс, а ме нöдкыв тöда!
Ывла вывсö он и тöд,
Паськöм йылысь абу тöжд.
Шондi ёнджыка пыр пöжö,
Мазi ма чукöртö-чöжö.
Ставыс öдйö кисьмö-воö.
Кодыр татшöмторйыс лоö?
(«Гожöм», Г. Торлопов)
Ш. Т.: А ме кывбур висьтала гожöм йылысь!
Воис гожöм Коми муö,
Ловзис ывла - ставыс веж.
Луныс ытваöн моз туö,
Оз и пемдыв, войыс - сэзь!
Вед.: Дзолюкъяс, Юмпельыд гожöм йылысь нöдкыв тöдö, Шöвктугйыд кывбур висьталіс…А гашкö ті тöданныд гожöм йылысь сьыланкыв? Вай сьылыштöй!
(… детсадса челядь сьылöны гожöм йылысь да йöктöны)
Фонограмма Трек № 3
(Челядь пуксигкостi петöны Кикуруллю да Шондi сьылiгтырйи.
!!! Тöд вылö: «Шондiö» колö пасьтöдны ичöт нывкаöс.
Вед.: Кутшöм гажа кадö ми тінкöд паныдасим! Июль - гожöм шöр, медся жар кад. Тайö кадö ставыс быдмö-дзоридзалö, воö вотöс, пуктöны турун... Абу öд прöста важöн шулывлöмаöсь: «Юльын кö жар, то декабрын - зэв кöдзыд».
К.: (горöдö) Дзолюкъяс, видзöдлöй, кодöс ме вайöді. Тöдмалінныд? (Челядьлöн вочакывъяс.) А кодi тöдö Шондi йылысь кывбур? Кодi висьталас, сiйöс Шондiным кутлыштас. (либö сетас козинтор)
(Челядь висьталöны кывбур.)
Ю.: Ме тöда жö Шондi йылысь кывбуртö.
(Позьö тшöтш Юмпельлы висьтавны)
Шондi, югыд шондi!
Коркö петан он тэ?
Петав вай, шонты
Куканьясöс, чаньясöс
Да и ичöт Танюкöс.
фонограммаТрек № 4
(Кылö шум-гам, «Яг-мортысь» шылад, петö йöктiгтырйи Яг-морт.)
Я. М.: Гажöдчанныд? (Аддзö шондiöс) Шондiкöд? Яг-морттöг? Оз ло тiян моз. Ме Шондiтö нуа аслам оланiнö. (Кватитö Шондiсö да дзебö пуяс, дзоридзьяс сайö.)
К.: Мый нö лои? Мый нö вöчны? Ки-ку-рул-лю! Кыдз Шондiтöгыс кута садьмöдны дзолюкъясöс?
Ю.: (матыстчö челядь дорö да юасьö): Кыдзи мездыны Шондiöс? Гашкö, зонка, тэ тöдан? А тэ, мича нывка?
Вед.: Вай Яг-мортлысь сьöлöмсö бурмöдам, сьылыштам да йöктыштам. Корам татчö … детсадйысь челядьöс.
(Челядьлöн сьылöм да йöктöм)
Ш. Т.: Яг-морт, эн ну Шондiтö, коль дзолюкъяслы. Со кутшöм бура найö сьылiсны да йöктiсны.
Я. М.: Но, ёна коранныд да, сета инö ме Шондiтö ...
К.: Сетан?! (Уськöдчö Шондiлань, а Яг-Морт сайöдö Шондiсö.)
Я. М.: Сета Шондiтö сöмын сэк, верманныд кö менö.
К.: Мый нö колö вöчны? Ставсö вöчам!
Я. М.: Медводз вермасям! Вай тöдмала вынаöсь-ö тi? Кодi мекöд вермасяс гезйöн?
К.: Ме, ме!
Ю.: Ме тшöтш! (Тшöтш петö да кутчысьö гезйö.)
Ш. Т.: И ме, и ме! (некыдзи оз вермыны Яг-мортöс.)
Вед.: Ноко, зонкаяс, кодi тiян пиысь медся ён да винёв? Локтöй, отсалöй миянлы вермасьны Яг-морткöд!
(петöны 5-6 зон, «перетягивание каната) колö гез!!!
Фонограмма Трек № 5
(Ставöн) Öтик-кык-куим! Вермасямöй! (вермöны)
Я. М.: Но, öтчыд верминныд. Водзö вермасям. Вынныд тiян унджык. А кодi вермас кыйны тэрыб кöрöс? Ме, дерт!
Вед.: Челядь, вай Яг-мортыдкöд ворсам «Кöр кыйöмысь», мед Шондітö сетас. (колö обручöн веськавны улöс мышкö - «кыйны кöрöс»)
!!! Тöд вылö: колö дасьтыны ворсöм нуöдöмлы коланатор
Фонограмма Трек № 6
Я. М. (чышкалö плешсьысь пöсьсö): Уп, пöсялi, мöдысь верминныд! Но коймöдысьсö он нин вермöй! Ме öд медся бур чери кыйысь!
Вед.: Вайö сувтам кытшö да «Чери кыйöмсьыд» и ворсам. Корам татчö зонкаясöс да нывкаясöс.
(Ставныс сувтöны кытшö, нуöдысь бергöдлö скакалкаöн кытшöд, кодлöн кокö скакалкаыс инмö, петö ворсöмысь. Некымынысь чеччыштöм бöрын Яг-морт усьö, нёль кокöн кыссьöмöн)
Фонограмма Трек № 7
Я. М.: Ог, водзö сэсся ог вермы. (кыссьö) Верминныд менö! Босьтöй ассьыныд Шондiтö. (Кыссьöмöн петö залысь, ставöн радлöны, Кикуруллю уськöдчö Шондiлань.)
Вед.: Дзолюкъяс, мед оз нин гусявны Шондiнымöс, вай босьтам сійöс ас дорö.
Ю.: Люба Николаевна, вай ворсам «Чикабукаысь». («Чикабука, чикабу», сьыл. да кыв. Г. Поповлöн)
1. Чикабу – сьыланкыв лöсьыд.
Чикабу – сьыланкыв ён.
«Чикабука» - сьылö нывка.
«Чикабука» - сьылö зон.
Вед.: Ворсны кутам öтвылысь. Медводз ме сьыла, а кор лэпта киöс, ті кутанныд ме бöрся шуавны «Чикабука-чикабу»(повторяйтны). Вай видлам! … Нокö нöшта! Но артмö тай, сідзкö заводитам.
2. Ставöн сьылам: «Чикабука,
Чикабука, Чикабу» (сьылöны челядь)
Гажаджыка ««Чикабука,
Чикабука, Чикабу» (сьылöны челядь)
3. (кыз гöлöсöн) Ош моз сьылам «Чикабука, (переваливаться)
Чикабука, Чикабу» (сьылöны челядь)
Кöч моз сьылам «Чикабука, (чеччавны, кияссö водзö)
Чикабука, Чикабу» (сьылöны челядь)
4. Кань моз сьылам «Чикабука,
Чикабука, Чикабу» (сьылöны челядь)
Пон моз сьылам «Чикабука,
Чикабука, Чикабу» (сьылöны челядь)
5. Ставöн сьылам: «Чикабука,
Чикабука, Чикабу» (сьылöны челядь)
Гажаджыка «Чикабука,
Чикабука, Чикабу» (сьылöны челядь)
Ворсiгкостi локтö Вöрса, корöсь нöбъя, пырö тшöтш кытшö да йöктö.)
(!!! Тöд вылö: Вöрса - детсадйысь воспитатель лöсьöдны паськöм.)
Вöрса: (кор лöньö ворсöмыс) Ок кутшöм гажа тiян! Вöрсянь кылi да локтi. Менö босьтöй жö кытшö.
К.: Лок, лок, Вöрса! Гажöдчы!
Вöрса: Ме со тiянлы вайи корöсь нöб. (Ме эг жö куш киöн лок, вайи со корöсь ньöр нöб) (Пуктö нöбсö кытш шöрас.)
Вед.: Вöрса, миянлы стöч корöсьыд колö. Иван лун öд матыстчö, колö выль корöсьöн пывсьыны!
Вöрса: Вай инö корöсьтö кöрталам! Ме быдöнлы разöда корöсь ньöр, сьыланкыв улö ветлöдлам на гöгöр, а кор сьыланкывйыс юргынысö дугдас, босьтам быдöн корöсь ньöрсö. Но корöсь ньöрйыс пыр лоö этшаджык. Та мындаыслы оз тырмы. Кодi медуна чукöртас, сiйö лоö вермысьöн. Кодлы оз тырмы ньöрйыс - пуксьö.
Вед.: Корам татчö нывкаясöс, видзöдлам, коді öдйöджык чукöртас корöсьсö!
фонограмма Трек № 8
(Медводдзасьыс ньöрсö пуктыны ворсысьяслöн лыд серти, мöдысьсö этшаджык да с. в.
Геройяс: (ошкöны вермысьöс, помасьöм бöрын - пуксьöдöны челядьöс)
(Водзвыв дасьтыны корöсь)
Вöрса: (петкöдлö выль корöсь) Со öд öтвывтö кутшöм корöсьяс артмисны, сöмын вачкы-корöсясь! (корöсясьыштö) Ок и радейта корöсьтö! Кодi мекöд корöсясяс? Кикуруллю, гашкö, тэ да?
К.: Ме ог, менам став гöнöй лэбас!
Вöрса: Юмпель, тэ?
Ю.: Менам... , менам юмов пельöй сылас.
Ш. Т.: Ме ог жö, ме жарсьыс пола.
К.: А вай, Вöрса, воспитательясöс корам.
Вöрса: Позьö и воспитательясöс.
(лöсьöдны 4 важ корöсь)
(Корöны воспитательясöс. Найö корöсясьöны. Кодлöн медэтша коляс корйыс, сiйö и вермас. Козин сетö - коз коль либö кутшöмкö вöрса козин.)
фонограмма Трек № 9
Вед.: Аттьö, Вöрса, ёна и ворсöдiн!
Дзолюкъяс, важысянь Иван лунлы паныд чукöртлöмаöсь уна сикас турун, дзоридз да косьтывлöмаöсь найöс. Тайö турунъясыс бурдöдлiсны став висьöмысь. А тi тöданныд дзоридзьяслысь нимъяссö? (Челядьлöн вочакывъяс)) Ноко, кыдзи рочöн лоö катшасин, кодi тöдö? (ромашка)
Ю.: А пöлöзнича (василёк)
Кик.: Петшöр (крапива)
ШТ.: Вижъюрыс рочöн мый лоö? (мать-и-мачеха)
Ю.: Йöла турун (одуванчик)
КИК.: Юмпель, а гашкö ачыд он тöд? Бобöнянь (клевер)
ШТ.: Маръямоль (пион).
(Кор оз тöдны челядь, отсалöны передачаса геройяс.)
Вед.: Но ставсö тöдінныд, молодечьяс!
К.: Маръямоль? Тайö öд сьыланкыв.
Вед.: Дугдöй вензьыны! Маръямоль – тайö и дзоридз, и тöдса сьыланкыв. Иван лун дырйи видз вылын гажöдчылiсны: сьывлiсны да йöктывлiсны. Вай и ми «Маръямольтö» сьылыштам!
(… детсадйысь челядь сьылöны «Маръямоль» кытшын ветлöмöн.)
Ю.: Ёртъяс, а ті нöдкывъястö тöданныд? (Челядьлöн вочакывъяс)
Ш. Т.: Ме тöда жö! И ме тöда!
Ю.: Нöдам инö!
Тöлын ни гожöмын
Паськöм оз вежлыны. (пожöм, коз)
ШТ.: Мича ныв енэжтiыс ветлöдлö. (шондi)
КИК.: Зэрöм бöрын чужис шмак
Коз пу улын кодi...? (тшак)
ШТ.: Ветлö-тапикасьö вöрöд,
Пемыд пармаын оз вош,
Он кö дзерöд - оз и вöрöд,
Кодi зверыс тайö? ... (ош)
Ю.: Гортысь петавтöг
Ылöдз нулывлö.
«Бур вой» - меным
Быд рыт шулывлö. (телевизор)
КИК.: Ой, ой, вунi менам, передача снимайтöмыд вунi (котöртö оператор дорö) Иван дядь, бура-ö артмö передачаным. Хорошая, мися, передача то получается?
Д. В.: Хорошая, Кикуруллю, хорошая!
Ш. Т.: Гашкö, позяс видзöдны «Изьваса гажтö»?
Д. В.: Да, да!
Кик.: Дзолюкъяс, кодi кöсйö веськавны телевизорö, лыддьöй кывбуръяс, сьылöй сьыланкывъяс.
(Лöсьöдöны телевизор экран. Челядь, лыддьöны кывбуръяс, сьылöны сьыланкывъяс.) (Ошкыны быдöнöс выступайтöмысь. Молодеч, Саша! Ыджыд аттьö, Маша! да с. в.
Вед.: Со тадзи и артмö телепередачаыд. А передача дасьтысьыс . Вай кекöначöмöн корам татчö сiйöс!
(Кыв сетсьö , челядьöс тöдмöдö ворсысьяскöд, козинъяс разöдöм - плакаты, открытки))
Вед.: Ставлы шуам öтвылысь «Ыджыд аттьö!», «Аддзысьлытöдз!», «Став бурсö!».
Пом фонограммаТрек № 10
