Урок матэматыкі ў першым класе

Аддзел адукацыі

Нясвіжскага раённага выканаўчага камітэта

Установа адукацыі

“Навасёлкаўская дзяржаўная

агульнаадукацыйная сярэдняя школа”

Платун Аксана Уладзіміраўна,

настаўнік пачатковых класаў

УА “Навасёлкаўская дзяржаўная

агульнаадукацыйная сярэдняя школа”

Ст. Навасёлкі 2008

ТЭМА: Лік лічба 4

МЭТА:

· пазнаёміць вучняў з лікам і лічбай 4;

· працаваць з геаметрычным матэрыялам;

· развіваць прасторавыя ўяўленні вучняў, увагу, кемлівасць, матэматычнае мысленне;

· пашыраць кругагляд;

· выхоўваць у дзяцей назіральнасць, уменне працаваць у калектыве

АБСТАЛЯВАННЕ: каса лічбаў, дэманстрацыйны матэрыял, выявы геаметрычных фігур, герояў казак, дапаможнік па матэматыцы.

ХОД УРОКА

I. Арганізацыйны пачатак урока.

Праверка гатоўнасці да ўрока.

-Вось празвінеў званок на ўрок. Для многіх вучняў гэты ўрок самы цікавы і любімы. А калі ён такі, то мы яго вельмі чакаем і сустракаем з добрым і бадзёрым настроем. Таму я раю ўсміхнуцца адзін аднаму і жадаю вам добрага настрою на ўвесь урок. На ўроку мы адправімся ў падарожжа, але перш чым адправіцца ў падарожжа неабходна правесці размінку.

II. Актуалізацыя папярэдніх ведаў.

“Матэматычная размінка”

- Лічэнне ад 1 да 20 у прамым і адваротным напрамку.

- Назавіце суседзяў ліку 5.

- Назавіце лікі, якія стаяць паміж лікамі 1 і 4.

- Назавіце найбольшы і найменшы з лікаў 1, 2, 3, 4.

- Як з ліку 3 атрымаць лік 4?

- Як з ліку 5 атрымаць лік 4?

- Назавіце і пакажыце геаметрычныя фігуры, у якіх 4 вуглы, 4 стараны, 4 вяршыні.

- Якія яшчэ геаметрычныя фігуры вы ведаеце? Пакажыце іх.

- Хто на працягу года 4 разы пераапранаецца? (Зямля)

- Колькі пор года вы ведаеце?

- Колькі старон свету вы ведаеце?

- Колькі стыхій вядома ў прыродзе? Назавіце іх. (Агонь, Зямля,

Паветра, Вада)

III. Паведамленне тэмы і задач урока.

- А зараз адгадайце загадку: “Адно брушка, чатыры вушкі”. Што гэта? (Падушка)’

- Якія лікі выкарыстоўваюцца ў загадцы? (Лікі 1 і 4).

- Як вы лічыце, пра які лік мы будзем гаварыць на ўроку? (Лік 4)

- Сёння, дзеці, у нас незвычайны ўрок. Мы пазнаёмімся з жыхарамі вялікай краіны Матэматыкі – лікам і лічбай 4. Будзем лічыць, рашаць задачы і прыклады і нават адправімся ў казачнае падарожжа.

IV. Фарміраванне новых ведаў, уменняў, навыкаў.

-Паглядзіце на дошку і скажыце, на што падобна лічба 4?

Глядзі, чатыры – гэта стул,

Які я тут перавярнуў.

- У старажытнасці людзі лічылі лік 4 сімвалам устойлівасці, трываласці. Паспрабуйце знайсці прыклады з нашага штодзённага жыцця, якія б адлюстроўвалі гэту думку. ( 4 ножкі ў стала, 4 нагі ў большасці жывёл і г. д.)

- А цяпер прыгадайце прыказкі, прымаўкі, якія звязаны з лікам 4.

Без чатырох вуглоў хата не будуецца.

Конь на чатырох нагах ды і то спатыкаецца.

Пайсці на ўсе чатыры бакі.

Займіце месцы ў цягнічку, мы адпраўляемся ў падарожжа.

Фізкультхвілінка

Работа па вучэбнаму дапаможніку с.18-19

Наш цягнік прыбывае на станцыю “Матэматычная паляна”.

- Якая лічба гаспадарыць на палянцы?

- Які лік абазначае лічба 4?

- Ці сустракаліся вы з лікам і лічбай 4 раней?

- А зараз, дзеці, гаспадыня прапануе нам цікавыя заданні. Дапамагаць ёй будуць казачныя героі.

Заданне 1.

Кот Матроскін прапануе па малюнку скласці задачу. Рашэнне запісваем у сшытак.

Заданне 2

Дапаможам Нязнайку параўнаць лікі.

Заданне 3.

- Глядзіце, хто да нас завітаў? Бураціна.

- Ён прапануе нам здагадацца, як трэба правільна злучыць стрэлкамі палачкі і фігуры, што з іх пабудаваны.

Заданне 4.

Чырвоная Шапачка, гуляючы па лесе лічыла птушак. Ці ведаеце вы такіх птушак. Дзеці лічаць птушак і запісваюць лікі ў пустыя клеткі.

Фізкультхвілінка.

На дошцы вывешаны дэманстрацыйны матэрыял. Дзеці лічаць, колькі на малюнку елачак, зорачак, цацак, і столькі разоў робяць нахілы, скачкі на месцы, пляскаюць у далоні.

Заданне 5.

-Нас сустракае Электронік, які зрабіў вылічальную машыну. Дзеці шукаюць памылку, выпраўляюць яе.

Заданне 6.

-Свае вершаваныя задачы прапануе вам рашыць кот Леапольд.

Паляўнічы лесам ішоў,

У гушчу лесу ён зайшоў.

І сустрэлісь яму тут

Заяц, воўк, ліса, барсук.

Звяры ўсе да аднаго

Паўцякалі ад яго.

Хто з вас, дзеці, ужо гатоў,

Палічыць усіх звяроў? (Чатыры.)

Да вароны на ўрок

Прыляцелі сем сарок.

Але толькі тры сарокі

Добра вывучылі ўрокі.

Колькі гультаёў сарок

Прыляцела на ўрок? (Чатыры.)

-Два бананы дам табе,

Два – тваёй сястрычцы.

Колькі будзе?

Хутка, Глеб,

З Таняй палічыце. (Чатыры.)

Заданне 7.

-Пакуль мы выконвалі заданні, да нас завітаў Пятачок. Ён просіць, каб вы навучылі яго пісаць лічбу 4. (Вывешваецца плакат, з дапамогай якога вядзецца тлумачэнне напісання лічбы 4)

-Умоўна падзелім клетку дзвюма лініямі на 4 часткі. Лічба 4 складаецца з дзвюх нахіленых і адной гарызантальнай ліній. Першыя два элементы пішуцца безадрыўна. Дзеці спрабуюць пісаць лічбу ў “паветры”, а затым у сшытках.

V. Падвядзенне вынікаў урока, рэфлексія.

- Вось і закончылася наша падарожжа. Час вяртацца ў клас. Паглядзіце на гадзіннік у падручніку. Колькі гадзін ён паказвае?

- Колькі разоў у суткі гадзіннік паказвае 4 гадзіны?

- А цяпер давайце падвядзём вынікі нашага ўрока.

- Ці спадабалася на ўроку?

- Што асабліва запомнілася?

- Якое заданне было найбольш цікавым?

- А зараз пакладзіце свае ручкі на галоўкі і пахваліце сябе за добрую працу на ўроку.

Урок закончаны, вялікі дзякуй.

ВЫКАРЫСТАНАЯ ЛІТАРАТУРА

1. Драздова, В. Я. У свеце лікаў і лічбаў.

2. Зайцаў, для малодшых школьнікаў.

3. Пярова гульні і практыкаванні па матэматыцы.

4. Труднеў работа па матэматыцы ў пачатковай школе