http://mari-el. in/uver-ana/4510-kok-jjylme-denat-vozat-pagalymashym. html
Кок йылме денат возат – пагалымашым ончыктат
Марий Эл Республикын Виктер пелен чумырымо кугыжаныш йылме-влак шотышто комиссийын ик заседанийыштыже тӱрлӧ тӧнеж да организаций, сатулыше предприятий-влакын лӱмыштым республикысе кок кугыжаныш йылме дене – рушла да марла – возаш кӱлмӧ йодышым ончымо ыле. Тидым ышташ темлымашан серышым республикысе кажне муниципал образованийыш колтымо. Палемдыме комиссийын кодшо изарнян эртыше погынымаштыже районлаште да Йошкар-Олаште тидын шотышто таче марте могай паша ышталтмым иктешлыме. Рашемын, верлаште ты темлымашым сайлан шотлен вашлийыныт. Шуко вере лӱмын пунчалым луктыныт. Ынде вывеска-влак кок йылме дене возалтыт. Советский район веле тидым ышташ кӱлешлан шотлен огыл, ик йылме дене возымо дене законым огыт пудырто манын умылтарат.
Ыштышаш паша эше шуко. Мутлан, район-влакын Интернет-порталыштым кок йылме дене ышташ лиеш. А теве Йошкар-Ола округын администрацийже ончыкыжо «Йошкар-Ола» газет пелен марий йылме дене приложенийым лукташ тӱҥалаш палемдымыж нерген увертарен.
Заседанийыште тыгак республикысе школлаште кугыжаныш марий йылмым туныктышо-влакын квалификацийыштым нӧлталме йодышым ончымо. Тиде пашам Марий туныктыш институт виктара. Тыге, пытартыш кум ийыште чылаже 139 туныктышо шинчымашыжым келгемден. Тидлан институтышто тӱрлӧ йӧным кучылтыт. Нунын коклаште курсым, семинарым, педагогический мастарлык шотышто конкурсым, конференций-влакым палемдаш лиеш. Тыгак дистанционный тунеммаш илышыш шыҥдаралтеш.
Таче ме информационный технологий вияҥ толмо жапыште илена. Тушко кажне калык шке йылмыж дене ушнышаш верч тырша. Тидын шотыштак марий йылме денат программым кумдан кучылташ палемдалтеш. Тиде йодышымат комиссийын заседанийыштыже тарватыме.
С. Белкова
