Творческяй работа
«Монь кельгома поэтозе»
Сермадозе: Разгуляева Ангелинась,
Торбеевскяй райононь
Дракинскяй средняй школань
10 – це классонь тонафнись
2
Мазы локстинь ваймонь эжди вайгяль
Мокша эрзянь масторланга кайги.
Хоть поэтсь минь ётксонк эрясь аф куватьс,
Лятфнембяльда тейнек лама – лама кадсь.
Л. Зеленова
Сидеста эрси тяфта, што кой-кона стихотворениятнень лувондолеть и лувондолеть, марят эздост кати-кодама ваймопожф, эрьгя. Стамот, монь койсон, произведениянза. Содасань сонь стихотворениянзон нинге идькс пингстон, а сембось, кодак панчса стихонь сборниконц, то няян кати-мезе одня, инголе апак содак, бъта васенцеда васедень мархтонза. Ся пингста кульса живой вайгяленц, няйсань то пяк весяла, то пичефксу сенем и ёню сельмонза. И вов ни, бъта тяфта эряви, корхнян мархтонза.
Мон арьсян, што Александр Степанович Малькин сувась литературазонк станя, кода ломанць сувси эсь кудозонза: аф пелезь, но кайги валфтома. Сонь поэзияц пяшксе кельгомада: шачема ширти, ломаттненди, перьфпяльти.
Кие тя ломанць? Мезе мон содан кельгома поэтозень колга? Сон шачсь Атюрьевскяй райононь Кяшал велеса 1923 кизонь 26 майста. Эсь велесонза аделазе сисем кизонь школать и тусь тонафнема Темниковскяй педагогическяй техникуму. 1939 кизоня кучфоль работама эсь велезонза начальнай классонь учителькс. Эсь работадонза башка, А. Малькин вяти общественнай тев: ноляй колхозса стенгазетат, вяти велеряйхнень еткса беседат кода велень Советонь депутат и кода агитатор. Сембонь, кие содазе Малькинонь, дивандафнезе сонь аф азовомшка простойшиц, виде – вайме характероц. Сон ашезь машта кяжень кирдема, ялганди ваймоц панжадоль. Кельгозень лятфнематнень. Весть кати – кода пеетькшнезь мярьгсь: «Аш, юмси эряфозе стакащемда, въдь тнярс мон, улема, аралень ни кодамовок ученай – математикокс». Математикати оцю кельгоманц колга сон лятфнесь аньцек пингонь – пингонь, мала ялга еткса. «Одкс пингста, - корхнесь сон, - Атерень сембе маластонь велетнень еткса тейне мярьгондельхть Пифагор. Математическяй олимпиадаса монь сяськиезе ашель. Сърхксень ни тя киге, да кати – кода аф няемга поэзиясь саламань». Катк юмась ёню математик, но мокшень сембе аймаксь музе сембода лац эсь морайнц.
Поэтть васенце стихонза появайхть печатьса 1937-1939 кизотнень. Ся пингонь ламоц стихонза музыкальнайхть, лац мяляфтовихть. Сяда сидеста эста удалакшнесть пейзажнай зарисовкатне. «Шобдава» стихотворениясонза валда ванфса авторсь лац приметазе, кода «шись ни сардонь ёряма кармась модать бокс», «моли мокшавать вармась палси якстерь щёка прянц». Тяфтапт и «Тумстон мезевок изь корхта», «Лисян мон саду», «Панчса вальмязень» и лия стихотворениянза.
1940 кизоня А. Малькин тертьфоль работама Саранскяи «Колхозонь эряф» журналу. Тя лиссь тяфта. 1940 кизоня кармась работама тя журналть редакциясонза Ф. Дурнов. Мъзярда школаса шумордавсть занятиятне, сон сась Саранскяи, васедсь ялганц мархта. Федор Дурнов шназень Александр Малькинонь стихонзон. Эсь лятфнеманзон эса поэтсь тяшти: «Сексенда мон ётань эряма Саранскяи. Ушедонь работама «Колхозонь эряф» журналса. Федор Дурнов ульсь монь начальникозе. Эрь шиня улеме марса. Эздонза тонафнень аф аньцек стихонь сёрмадома, но и рузоннеста стихонь ётафтома…» 1941 кизоня журналсь сёлкфоль, Александр Малькин мърдай эсь велезонза, нинге кой – мъзярс работай учителькс. А 1942 кизоня тунда сонга сявфоль фронту. Пимляй велень эряйсь , сонга тяни аш шиса: «Минь сисемнек тертьфтолеме Атерень военкомату. Ялга пачфтемазь Торбеева станцияв. Тяса озафтомань товарнай поездс. Малькинонь мархта повоме фкя вагону, нльня утцеме фкя полка лангса. Фронту ардомста сон фалу лувондсь «Кодекс законов СССР» книганя, мезенкса теенза вагонца макссть «кодекс» прозвища. Мокшень поэтсь ашезь кяжиякшне тянкса. Явоме Малькинонь мархта Сталинградть маласа фкя ошкаса».
Александр Степанович воявась Прибалтийскяй фронтса, старшина званияса. Фронтса, аф ламос тонафнемда меле, сонь путозь топографокс, аноклакшнесь военнай полевой картат. Аф весть мокшень поэтсь яксесь разведкав, участвондась вишке бойса. Боевой заслуганзон инкса Александр Малькин казьфоль Якстерь Звездань орденца и лама медальса.
Войнань пингонь сембода удалаф стихонзон ёткс сувси «Тядязти» стихотворениясь, конань эса поэтсь рисовандай тядянь образ, кона учсесы фронтста кельгома цёранц саманц. Тя стихотворениять А. Малькин кучезе велеряйнзонды фронтста, сонь лувозь колхозонь пуромксса. Кода азонкшнесазь, сонь лувомста аватне авардсть.
«Ули Польшаса калма» стихотворенияса поэтсь азонды, кода алятнень мархта ряцок воявасть и од стирнят. Фашистонь кяжть, маряк, топафксоцка, ломанень ваймопожфоцка аш:
… Пси тяште ронгозонза тись.
Илять, мъзярда ушесь явась,
Тисть вракне коське шуфтонь крез,
Стирть кядензон пси эськса шавозь
И пондазь, кодане Христозть.
Лувсайть ня строчкатнень – сембе саннятне търнатозевихть: кодама сталмот савсь кирдемс эстонь од ломаттненди. И сембось тя тиендевсь сянкса, штоба Родинаньконь сай пингоц улель валда, штоба тячи минь афолеськ сода, мезе тяфтамсь войнась.
Войнань темась сяда тов мольфтеви «Лямбе пильгокит» поэмаса. Тяса авторсь седиень токазь азонды тядять колга, кона лисенди ки рашкти цёранц войнаста учсемонза, хуш содасы: идец шавф.
Коза ниле кизот лисендсь
Шаржу ава эрь шиня,
Ашезь сотце порф и пизем
Сире тядясь – гуленясь.
Ки трваса палондсь, ванондсь
Учи нармонькс мянь илядьс…
Но изь сашенда Иваноц,
Ашель эздонза куляц.
Тядять сединь сярятьфонц колга азондыхть и сонь корхнеманза вакска лии нармоттнень мархта:
Пади, церанязень колга
Тейне канттада куля?
Шять, Иванозень тинь няесть
Коса – коса лиембачк.
И вов лисенди чуда: тядясь няйсы «аськоляй Иванонц». Сон «сякокс мазы, стамка од». Аньцек тяни сон валф бронзаста. Тядясь и церац седишкава корхнихть фкя-фкянь мархта. Но ламос тядять мархта тейнза улемс аш кода. Сон кенордай – тейнза эряви арамс «вастозонза дозорс» мирть ваномонза Берлин ошть кучкас. Тя фантастическяй сценать вельде поэтсь азонды питни мяль, што тядянь кельгомась эсь иденцты вечнай. Сон кармай эряма снярс, мъзярс модать лангса кармайхть улема тядят.
Мон арьсян, што минь солдатоньке, конат кулость тяниень пингонь мазы эряфть инкса, фалу лядыхть шиса ломаттнень мялямсост.
А. Малькин творчествасонза оцю мяль шарфни Родинать образонцты; эрь афкуксонь поэтсь тя темать вакска аф ётави:
Шумбранят, шачем – касом васта,
Тонь вельхкссот моли лайме порф,
И марян ляйстот, лихтибрястот
Сиянь монетакс кайги горьф.
Поэтти пяк малаль и питниель шачем ширец. Мъзярда сашендовсь улемс эздонза ичкозе, сон лажаткшнесь теенза, кода ёмла иднясь тядяти:
Мон пяле мастор шаронь – ётань
И няень ёфксста мазы крайхть,
Но кизе козонга изь лотка
И киньге пяли ашезь пра.
Поэтть ваймоц сядонга панжевсь мекольдень лирикасонза. Лемоцка ламонь колга арьсефти – «Сексень пизелхт». Азондозе ли седиец, што мекольцеда корхни лувиензон мархта? Тя тейнек ни аф содави, но сембе цикласа маряви пичедема ётаф кизотнень колга. Поэтсь ужяльдезь азонды ётаф кить колга, ульсть ёшмотка, эльбятькстка, конат аф видептевихть ни. И лажнай сянксовок, мес лама апак тик:
Минь шяяреньке акшемсть марнек,
Прась, мярьгат, прязонк васень ловсь.
Одксшиньке, кода паксянь нармонь,
Тусть эздонк лиезь кати – ков…
… Фкя шиня шобдава, кода фалу, Малькин сувась редакцияв. Аськолдась порогть вельф, ёрась молемс шранц ваксс. Тя пингть прась. Тошказевсь, азсь кафта – колма вал, но синь исть шарьхкодев. Сельмонза коневсть. Седиец лоткась шавомда. Тя ульсь 1976 кизонь 24 майста. Теенза цють изь топоде 53 киза. Сонь калмазь Кяшалу, коса калмафт поэтть мала ломаненза. Тоса, сери шуфта ала уды мокшень масторть мораец – Александр Малькин. Кяшел веле. Тяста сон аськолдась оцю кис. Тяза мърдась куломдонза мелевок. Пингсь моли. Малькинонь кельгома шуфтонянза стаки венептьсазь лопаву тарадснон шинь сюролдатненди.
Кодама ломанькс ульсь А. Малькин? Мезе сонь пичефнезе – кеняртьфнезе, минь, тячиень лувихне, содасаськ литературоветтнень, критикнень статьястост, ялганзон, содаензон лятфнемастост. Ули Кяшал велеса ломань, кона лац содазе А. Малькинонь. Тя – Любовь Митрофановна Мустайкинась (стирень фамилияц – Майорова), сон шачсь Дракина велеса. Авась азондсь: «Мирдезень мархта марса касозь сереснон. Мон эста ашень арьсекшне, што Малькинонь лемоц мокшэрзянь литератураса арай тяшкава содафокс. А минь семьяньконди сон эста ни ульсь пяк малакс. Сон въдь тееньге лемнесь стихотворения. «Люба» лемоцоль».
1954 кизоня Мустайкиттнень семьяса шачсь стирнясна, конань лемдезь
Малькинонь лемса Александракс. Тя куляти поэтсь пяк кенярдсь. И стихса
азозень эсь мялензон – арьсеманзон:
И тячемс ялгатама сембе,
Аш кальдяв валоньке минь весть.
И оттне идьснон лемсон лемдезь.
Конешна, тейне тяшка честь.
Алешкин тяштсь: «…Малькинонь аф весть лемнезь ни кайги и лямбе валса. Кодама эпитет аньцек ашельхть, лемнезь и цёфксокс, и оцю талантокс, и афкукс национальнай поэтокс, и нльне сембода оцю лемсовок – классикокс. Шять, сембось тя и виде. Въдь ня определениятнень эса – оцю кельгома поэтти. Семботь тянь эса ули афкуксонь видеши. Но, тейне – арам, Малькин, васендакиге, поэтсь народнай…»
И. Калинкин лятфни: «Мъзяра ломань мархта сашендови васьфнемс эряфонь килангса… Ульсть васедемат моньге эряфсон. Финцне, ванат, ётайхть селмингольгат и солазь солайхть шонгара качамонь цильфокс. А лиятнень ламос кирдьсайть мялямсот; арьсезеват колгаст и бъта кунардонь пингть пачк няйсак ваймонь валдснон, марясак седиень лямбоснон. Тяфтама ломанькс мондейне ульсь и тячемс лядсь Шкаень толняса казьф мокшень пяк смузю поэтсь Александр Степанович Малькин…»
Нинге фкя лятфнема. «Лувса прязень павазу ломанькс – корхтай педагогическяй ветеранць . - Мъзярда сашендсь вели, вестевок ашезь етне кудоньконь вакска. Ломанць пяк ару ваймоль, порядочнаель. Седишкава кельгозе мокшень кяльть и литературать».
Илья Девин пяк мала ялгакс ульсь Малькинонди. Илья Максимовичень лятфнеманзон коряс: «Малькин пяк маштсь ялгакс арама, улеза ломанць командир или эсь лацонза виде вайме, лангозонза весть варжакстозь тушендсь кинь кельк мяльс и кинди повсь няевсь кунара содафокс».
Мокшень содаф драматургсь, Григорий Яковлевич Меркушкин, пяк кельгозе А. Малькинонь. Ректоркс улемстонза Григорий Яковлевич кошардозе Малькинонь сермадомс заявления университету заочна тонафнеманц примаманц колга.
Улема, тяфта ни ладязе сонць эряфсь май ковста Кяшалсь арси ваймонь панчсема вастокс, панжада книгакс сятненди, кинди питни и кельгови мокшень афкуксонь оцю поэтть – Александр Малькинонь поэзияц. Поэтонь эсь виенц сонцьке, конешна, шарьхкодезе, сяс эсь творческяй асувонц колга сермадсь тяфта:
Поэтонь седиста тейть казьса
Эрь стихсон эрек, лямбе валть…
Эрь кизоня маень мекольдень шитнень Атюрьевскяй райононь Кяшал велеса ётафневихть Малькинскяй лувомат, конат лемневихть мокшень содаф поэтти . Поэтти вяти кинясь мъзярдовок аф юкстави, сяс мес сонь лемоц фалу эряй минь седисонк – ваймосонк.
Малькинонь сембе поэзияц – тя седиень пети и кеняртьфти музыка. Сонь можна путомс ряцок Есенинонь, Твардовскяень и Исаковскяень мархта. Аф стак кой - кит колганза корхнихть: «Малькин – тя минцень мокшэрзянь Есениноньке». Тя поэтть портретоц нюрьгсь Малькинонь рабочай шранц вельхксса.
Мон поэтонь эсь куднясон
Пингонь ётазь ладянь мор.
Поэтть куднястонза лисьф пильгокитне ашесть юмафта пря литератураньконь кели и оцю ки лангсонза. Синь коряваст тячи вешендихть поэзияв эсь янцнон од поколениянь лирическяй и эпическяй поэтоньке.
Эрь тевти, кодама сон афоль уле, оцю или ёмла, эряви путомс вайме пакшкя. Эста покодемась стак аф юмай. А. Малькин эсь «ремесланц» пяк цебярьста содазе и кельгозе, макссезе сембе эрьганц. Поэтть ёнень – ваймонь пожфоц цебярьста шарьхкодеви творчествастонза:
Мон ся ломанть кельгса, кие
Содасы эсь ремесланц,
Лямбе кядьса пара тии,
Кадсы лемонц модать лангс…
