Канон святой равноапостольной княгине Ольге
Тропарь
глас 1-й
Крилами богоразумия вперивши твой ум, возлетела еси превыше видимыя твари, взыскавши Бога и Творца всяческих: и Того обретши, паки рождение Крещением прияла еси: древа животнаго наслаждающися, нетленна во веки пребываеши, Ольго приснославная.
Канон
глас 5-й
Песнь 1
Ирмос: Величаваго фараона в мори потопивша со оружием и всадники, Израиля же преславно спасша и по суху проведша, поем Христа, яко прославися.
Припев: Святая равноапостольная великая княгине Ольго, моли Бога о нас.
Величие наше и похвала ты еси, Ольго богомудрая: тобою бо идольския лести свободихомся, ныне молися за род и роды, ихже Богу привела еси, поющи Христа: яко прославися.
Святая равноапостольная великая княгине Ольго, моли Бога о нас.
Величаваго диавола из России прогнала еси, нечестивыя кумиры отнюд сокрушивши: вся люди от беззакония свободила еси, мудростию научающи, пети Христа, яко прославися.
Слава: Черность греховную банею Крещения отнюд отмыла еси, Христа возлюбила еси: Емуже предстоящи, молися за рабы твоя, верно славящия тя.
И ныне: Исаия тя Жезл нарицает, Пречистая, Давид же тя Престол Господень, Аввакум приосененную Гору, Купину же Тя Моисей: мы же Тя Матерь Божию нарицаем.
Песнь 3
Ирмос: Державною рукою и сильным словом Небо и землю сотворил еси, юже Твоею Кровию искупил еси, Церковь Твою, яже о Тебе утверждается зовущи: яко несть свят, разве Тебе, Господи.
Святая равноапостольная великая княгине Ольго, моли Бога о нас.
Державною рукою, и мудрыми словесы, и сильным словом, учила еси твоего сына закону Христову, и людем возбранила еси жрети идолом, Ольго преславная: в память твою ныне сошедшеся, тебе прославляем.
Святая равноапостольная великая княгине Ольго, моли Бога о нас.
Ты яко пчела добру разуму далече цветущия Христовы веры взыскала еси, и яко породный мед Крещение, в царствующем граде обретши, твоему граду и людем даровала еси: егоже вси насыщени, горести греха отбегают.
Слава: Весь похвальный глас, и мольбу ти, Ольго, приносим, тобою бо Бога познахом. Емуже ныне предстоиши, проси мира отечеству, и на поганыя победы, и душам нашим оставления грехов, поющим тя, присноблаженная.
И ныне: Приятелище явилася еси, Дево, неприступнаго Бога, тем Тя поют непрестанно Ангельстии Чини, повинующеся Владыце: Ты бо родила еси Слово Отчее, Собезначальное, без отца: о чудо! Святый Дух осени Тя.
Господи, помилуй (трижды).
Седален
глас 1-й
Крилами богоразумия вперивши твой ум, возлетела еси превыше видимыя твари, взыскающи Творца всяческих: и Того обретши, паки порождение Крещением прияла еси: и древа животнаго Креста Христова наслаждшися, нетленна во веки пребываеши, Ольго преблаженная.
Слава, и ныне: Руце Твои Божественнии, имиже Создателя понесла еси, Дево Пресвятая, воплощшагося благостынею, простерши умоли Его, избавити нас от искушений, и страстей, и бед, хвалящих Тя любовию и вопиющих: слава Всельшемуся в Тя, слава Прошедшему из Тебе, слава Избавльшему нас Рождеством Твоим.
Песнь 4
Ирмос: Духом Божиим очищся пророк дыхающим в нем, Аввакум Божественный, бояся, глаголаше: внегда приближатся лета, познан будеши, Боже, на спасение человеков.
Святая равноапостольная великая княгине Ольго, моли Бога о нас.
Дух Божий почи на тебе, яко на Девворе пророчице древле: Имже просветившися, укрепляющи Владимира разумнаго, Сисару диавола низложила еси в сети его крещением, яко и Вараком в потоце Киссове прежде.
Святая равноапостольная великая княгине Ольго, моли Бога о нас.
Быстрине подобящися, Ольго Богомудрая, сокрушенным сердцем ста молящися к Богу, избавила еси род твоих людей от оскорбления кумирскаго, и от пленения вражия свободила еси, Христа призывающи на помощь нашу.
Слава: В нарочитый день святаго твоего преставления, радостно празднуем, песнь молебную Христу возсылающе, нетленным венцем венчавшему тя, Ольго Богомудрая: проси нам оставления грехов, славящим тя верно.
И ныне: Тя от корене Иессеева процветшую, Исаия якоже прорече, Христа цвет прозябшую, и Первоначальнаго плотию носившую и жезл Божия Духа, хвалим Тя, яко Божию Матерь, и Чистую Деву.
Песнь 5
Ирмос: Слово Божие Всесильное, мир всему миру посли и светом истинным освещая и просвещая вся, из нощи Тя славящия.
Святая равноапостольная великая княгине Ольго, моли Бога о нас.
Яко голубица целомудренная, на финикс добродетелей возшла еси, криле священне посребренне имущи: имиже возлетевши в райстей пищи вогнездилася еси, славная Ольго.
Святая равноапостольная великая княгине Ольго, моли Бога о нас.
О тебе пояше Соломон прежде: вне винограда царская маслина процвете. Ты бо святый грозд Крещением в России насадила еси, творящи плод покаяния, о немже Сам Христос веселится.
Слава: Умилосердися, Владыко, на новопросвещенныя люди Твоя, не предаждь нас в руки поганых, за множество беззаконий наших: но молитвами наставницы нашея Ольги избави ны от всякия напасти.
И ныне: Кропите вси, якоже пишется, облацы веселия земным: Божий бо Детищь Христос, очищаяй мир от грехов, воплотися от Девы, и дан бысть нам.
Песнь 6
Ирмос: В Церковь Небесную Святую Твою да приидет молитва моя, вопию Ти, яко Иона, из глубины сердца морскаго: от грех моих возведи мя, молюся Тебе, Господи.
Святая равноапостольная великая княгине Ольго, моли Бога о нас.
Ревность Святаго Духа в сердцы приемши, отеческое зловерие возненавидела еси: и Христа Истиннаго Бога взыскавши, чадо света явилася еси, и с первенцы святых на небесех ликуеши
Святая равноапостольная великая княгине Ольго, моли Бога о нас.
Новая ученица Христова в России явилася еси, обходящи грады и села, кумиры сокрушающи, и люди учащи Единому Богу покланятися: Егоже моли за поющия тя.
Слава: О богоблаженная Ольго, помолися за твоя чада к Богу, мир неподвижимый отечеству нашему испроси: и нам отпущение грехов, присно тя прославляющим.
И ныне: Познавше тобою неописанное Слово Божие, Сына Единочадаго Вседержителева, вопием Ти земнии: радуйся, Благословенная Богородице, упование душ наших.
Господи, помилуй (трижды). Слава, и ныне:
Кондак
глас 6-й
Подвиги во страдальчестве, подвиги в вере положила еси тепле за Христа Жениха твоего. Но и ныне, якоже ереси, и врагов шатание под ноги воинству нашему покорити моли Богородицею, яже от шестисот тридесяти Богоносных отец предел приемшая, и хранящая, всехвальная.
Икос
Что твоих страданий, или что исправлений, или что твоего девства, или жития непорочнаго твоего? Ты бо возвеселила еси Отца, яко Сыну уневестившися, и Духу Святому себе украсивши. Кто довлеет к сим? Кто глаголати ныне возможет, колики тя осиявают добродетели незаходимы? Яко от востока бо гробу возсиявшу, всем сияеши, и лучи пущяеши на земли и в мори, и во всю подсолнечную, освещаеши и благоухаеши концы. Темже и свиток, вверенный от шестисот и тридесятих богоносных отец предел приемши, сохранила еси, всехвальная.
Песнь 7
Ирмос: Пламень пещный поработиша благочестивии отроцы, тем свыше ороси я, готовы палимы по естеству, но паче естества мужески пояxy: благословен еси, Господи, на Престоле Славы Царствия Твоего.
Святая равноапостольная великая княгине Ольго, моли Бога о нас.
Подобно Иудифи сотворила еси, посреде кумирских телищь вшедши, тех начальника сокрушила еси, и демоночетцы посрамила еси, вся же люди научила еси в чистоте вопити Христу: благословен еси, Господи, на Престоле Славы Царствия Твоего.
Святая равноапостольная великая княгине Ольго, моли Бога о нас.
Похвальными цветы, аки царский венец Богомудрой твоей главе, в память твою приносим: юже Христос нетлением венча, Ольго досточудная, молися за твое стадо, избавитися от всякаго зла, вопиющим: благословен еси, Господи, на Престоле Славы Царствия Твоего.
Слава: Ливанскую ли гору наречем тя? На тя бо роса Небесная сниде. Или Фисон реку, добрейший сапфир камень честный, Владимира имущую, имже просветися Российская земля? Но молитеся за ны взывающе: благословен еси, Господи, на Престоле Славы Царствия Твоего.
И ныне: Кивот позлащен Тя Духом именуем, спасшую мир от потопа разумнаго, Дево, спаси нас. На Тя бо надеемся и к Тебе прибегаем. Отчаянныя в пучине от грех и напастей избави вопиющия: благословен еси, Господи на Престоле Славы Царствия Твоего.
Песнь 8
Ирмос: Крепцыи отроцы трие суще, силою оболкшеся Святыя Троицы, уловиша и победиша халдеи, и дивно изменися естество: како огнь в росу прелагашеся? Без туги я сохрани яко пеленами, о пролиявый мудрость на всех делех Твоих, Боже, Тя превозносим во веки.
Святая равноапостольная великая княгине Ольго, моли Бога о нас.
Крепка яко львица, силою Святаго Духа оболчена, едина устремися всюду истерзати кумиры, и дивно на небеси и на земли: како жена прежде Бога познавает, еюже исперва всему роду падение бысть, тою же ныне спасени поем: о пролиявый мудрость на всех делех Твоих, Боже, Тя превозносим во веки.
Святая равноапостольная великая княгине Ольго, моли Бога о нас.
Премудрость Божия прежде о тебе написала есть: се еси добрая Моя и прекрасная, и порока несть в тебе. Блеск лица твоего яко мира обоняние, назнаменоваше твое, Ольго, крещение: еже посреде кумирския лести на тебе обоня Христос, и всех нас от смрада демонскаго к покаянию милостию Своею привел есть.
Слава: Помяни мене, госпоже Ольго, убогаго твоего раба, окраденнаго от врага, и согрешившаго паче человек: и помолися Христу, подати ми прощение о всех согрешениих, яже нечувственно содеях окаянный, да покаянием вопию: о пролиявый мудрость на всех делех Твоих, Боже, Тя превозносим во веки.
И ныне: Не презри, Дево, Твоих раб мольбы, о Тебе бо хвалимся, Твое малое стадо мы есмы: потщися в заступление наше, и изми ны от враг наших, ущедри знающия Тя Матерь Божию, и Сыну Твоему вопиющия: о пролиявый мудрость на всех делех Твоих, Боже, Тя превозносим во веки.
Песнь 9
Ирмос: Из Едема изыде род наш прабабы ради Евы, призван же Тобою, рождшею нам новаго Адама — Христа, во двою естеству, Дево Чистая. Взыграся Адам прадед, яко избыв первыя клятвы, мы же Тобою хвалящеся, яко Тебе ради Бога познахом, и Тебе величаем.
Святая равноапостольная великая княгине Ольго, моли Бога о нас.
Веселися Ево прародительнице, иже бо тя прельстив из Едема изведе, ныне же попран есть твоим исчадием. Се бо Ольга Животное Древо Крест Христов в России водрузи, имже всем верным рай отверзеся: мы же хвалящеся, яко тоя ради Бога познахом, со Владимиром сию величаем.
Святая равноапостольная великая княгине Ольго, моли Бога о нас.
Жену по естеству нарицаем тя, но паче силы женския подвиглася еси. Тмы твоего злата истощила еси, да Христов закон и Учителя приобрящеши, имже просветила еси землю Российскую: мы же тобою хвалящеся, яко тебе ради Бога познахом, с мученики тя величаем.
Слава: Закона наставнице чистая, и учительнице веры Христовы, приими похвалу от раб недостойных, и молитву о нас сотвори к Богу, честно творящих твою память: да от напастей, и бед, и печалей, и лютых грехов свободимся: еще же и мук ждущих нас избави, молимся ти, тебе непрестанно величающии.
И ныне: Се Церковь, се Дверь, се Божия Гора Святая, се Жезл, и Сосуд злат, се Источник печатан, се Рай Святый новаго Адама, се Престол страшный, се Мати Божия Пречистая, Заступница всех нас, поющих Ю.
Акафист святой и равноапостольной великой княгине Русской Ольге
Кондак 1
Первоизбранней от всего русскаго рода, славней и равноапостольней угоднице Божией Ольге составим похвалу, яко заре во тьме идолопоклонения светом веры возсиявшей и путь ко Христу всем людем русским показавшей. Ты же, яко имущая дерзновение к прославльшему тя Господу, ограждай нас от всяких бед молитвами твоими, да зовем ти:
Радуйся, святая равноапостольная княгине Ольго богомудрая.
Икос 1
Ангелов и человеков Творец, времена и лета во Своей власти положивый и судьбы царств и народов по Своей воли управляй, егда восхоте род русский Святым Крещением просветити, тогда, видя благое изволение сердца твоего, призва тя первее в познание Себе, да будеши всем русским людем образ и наставница в христианстей вере. Сего ради восхваляем тя сице:
Радуйся, русскаго небесе утреннее звездо, от Первозваннаго апостола на горах Киевских предвозвещенная. Радуйся, пречудная леторасле, из нея же велие правоверия древо на земли нашей возрасте. Радуйся, первоучительнице и просветительнице наша; радуйся, яко тобою познахом покланятися в Троице Творцу. Радуйся, яко тебе ради Пресвятое Имя Господне от всех русских людей прославляется; радуйся, яко и твое преславное имя вкупе с равноапостольным Владимиром во всех пределех мира восхваляется. Радуйся, страны нашея Русския духовное сокровище; радуйся, всея Христовы Церкве преславное украшение. Радуйся, градов Киева и Пскова изрядная доброто; радуйся, людем нашим на враги благая помощнице.
Радуйся, святая равноапостольная княгине Ольго богомудрая.
Кондак 2
Видяще тя, святая Ольго, яко крин в тернии прозябший: ты бо аще и в роде язычестем рождена еси, обаче закон Божий в сердце твоем написан всегда имела еси, и целомудрие твое яко зеницу ока блюла еси; благодарно поем Дивному во святых Своих Богу: Аллилуиа.
Икос 2
Разумом твоим вся добре ведящи, познала еси, богомудрая Ольго, яко идоли, рукама человеческима сотвореннии, не суть бози, темже, отвергши тыя, потщалася еси познати Бога истиннаго. Сего ради, похваляюще сицевое твое благоразумие, вопием ти сице:
Радуйся, добрая жено, первее всех заблуждение русских людей познавшая и тщету идолопоклонения разумевшая. Радуйся, истиннаго Богопознания и правыя веры усердно искавшая. Радуйся, прежде разумения закона Божия, по закону совести праведно жившая; радуйся, прежде приятия христианския веры дела христианом подобающая творившая. Радуйся, державу твою от нашествия супостат мужественно защитившая; радуйся, в подчиненных ти людех суды праведны творившая. Радуйся, царственною славою на земли и на небеси почтенная. Радуйся, яко равноапостольная от Бога прославленная.
Радуйся, святая равноапостольная княгине Ольго богомудрая.
Кондак 3
Силою благодати Божией движима, потщалася еси, богомудрая Ольго, достигнути Царьграда, идеже зрящи красоту церковнаго благолепия, и послушающи учения словес Божественных, распалялася еси всем сердцем твоим в любовь Христову, благодарственно вопиющи Ему: Аллилуиа.
Икос 3
Имея сердце яко добрую землю, удобь восприяла еси, Ольго, семя святая веры, познавши Христа Бога истиннаго. Темже и Крещение Святое прияла еси от руку патриарха Царьграда иже и предрече ти, яко отныне блажите тя имут русстии сынове. Исполнити убо хотя проречение сие, взываем ти сице:
Радуйся, безконечныя пагубы верою избежавшая. Радуйся, жизнь вечную во Христе стяжавшая. Радуйся, благодатию Святаго Духа духовно родившаяся. Радуйся, разумная горлице, от когтей душепагубного врана излетевшая; радуйся, под криле Орла Небеснаго прилетевшая. Радуйся, множество душ Крещением с собою ко Христу приведшая. Радуйся, с верою несумненною приходящих светом от честных твоих мощей осиявающая; радуйся, душам и телесем тех, яже на пользу, подавающая.
Радуйся, святая равноапостольная княгине Ольго богомудрая.
Кондак 4
Како можем не удивитися благоразумию твоему, Ольго преблаженная, ибо ты предложение царя еллинов о браце с ним разумно отвергла еси, рекши тому: не брака ради приидох семо, и не соцарствования ради с тобою, но да уневещуся Крещением Безсмертному Жениху Христу Богу: Его же паче всего возлюби душа моя и Ему же отныне во веки не престану воспевати: Аллилуиа.
Икос 4
Улышавши от крестившаго тя патриарха напутственное слово о чистоте, посте, молитве и о всех добродетелех, христианом подобающих, слагала еси сия в сердцы твоем, делы вся та исполняти обещаваяся. Темже убо по долгу воспеваем ти сице:
Радуйся, ниву сердца твоего очистившая от терния душевредных страстей; радуйся, оросившая ю слезами покаяния. Радуйся, яко семя слова Божия в сердцы твоем, яко на земли добрей, укоренися. Радуйся, вдовственную твою чистоту непорочно сохранившая; радуйся, воздержанием и молитвою Богу угодившая. Радуйся, милостынею Творца умилостивившая; радуйся, нищия и убогия потребами снабдившая. Радуйся, просвещение земли Русския светом Христова учения провидевшая.
Радуйся, святая равноапостольная княгине Ольго богомудрая.
Кондак 5
Боготканною одеждою Святаго Крещения облекшися нетленною пищею Пречистаго Тела и Крове Христовы духовно укрепльшися, Ольго преблаженная, не убоялася еси потещи к неверным соотечественником твоим, предком нашим, проповедати им Единаго Истиннаго Бога, Ему же ныне вся Русь, яко едиными усты, воспевает: Аллилуиа.
Икос 5
Видевши, святая Ольго, вся люди земли Русския во идолослужения погруженныя, усердно потщалася еси просветити тыя светом Христовы веры и сотворити я сыны и наследники Царствия Небеснаго. Поминающе убо сицевое твое попечение о них, благодарственно зовем ти: Радуйся, премудрая властительнице народа русского.
Радуйся, первей христианстей царице Елене в ревности Божественней подражавшая; радуйся, и имя тоя во Святем Крещении приявшая. Радуйся честный крест Христов и святыя иконы из Царьграда во град Киев принесшая; радуйся, иереи и клирики с собою в Русь приведшая. Радуйся мудрыми твоими глаголы поучавшая люди оставити тму языческаго нечестия и восприяти свет христианского благочестия. Радуйся, многия русския люди светом веры Христовы просветившая. Радуйся, первая от земли Русския лику святых причтенная.
Радуйся, святая равноапостольная княгине Ольго богомудрая.
Кондак 6
Проповедником духоносным апостолом подражавши, Ольго богомудрая, обходила еси грады и веси державы твоея, приводящи, елико мощно бе, люди к вере Христовей и научающи их воспевати Единому в Троице славимому Богу: Аллилуиа.
Икос 6
Утверждая в державе твоей начаток веры христианския, создала еси храмы Божии во граде Киеве и в стране рождения твоего, при реце Велицей у града Пскова. И тако начаша русские людие прославляти повсюду Христа Бога нашего, тебе же, просветительнице своей, похвальная воспевати:
Радуйся, яко от чистаго источника Святыя Соборныя и Апостольския Церкве чистое учение прияла еси. Радуйся, идольских требищ и кумиров низложительнице. Радуйся, яко же и Первозванный апостол, с проповедию Евангелия землю Русскую обходившая. Радуйся, на местех проповеди твоея честныя кресты водрузившая и от тех многая знамения и чудеса, уверения ради неверных, силою Божиею содевахуся. Радуйся, яко тобою Всеблагий Господь сыновом русским познание Свое явил есть; радуйся, яко чрез них и прочия многия народы светом веры просветил есть. Радуйся, яко от корене твоего честного Господь святаго равпоапостольнаго князя Владимира показал нам есть; радуйся, яко образом жития твоего святый князь Владимир подвигся прияти христианскую веру.
Радуйся, святая равноапостольная княгине Ольго богомудрая.
Кондак 7
Хотя избавити сына твоего Святослава от пагубы вечныя, прилежно увещевала еси его оставити почитание идолов и веровати в Бога истиннаго. Но той не внят матернему наказанию твоему и не восхоте нечестие свое пременити на благочестие. Темже, яко неверный, очуждися жизни вечныя и не сподобися с тобою в Горнем Царствии воспевати: Аллилуиа.
Икос 7
Новое знамение благоволения Своего яви тебе Господь, егда, во образ Пресвятыя Троицы, три пресветлыя луча с небесе облиста на месте дубравне, ихже не точию едина ты зрела еси, но и вси сущии тамо людие видеша, и вкупе с тобою прославиша Триединаго Бога. Мы же, ведуще сбытие проречения твоего о создании на месте оном храма Живоначальныя Троицы и града, ублажаем тя сице:
Радуйся, великая Божия угоднице, дара пророчествия сподобльшаяся. Радуйся, трисияннаго небеснаго света зрительнице; радуйся, всеблагия воли Божией о просвещении народа русскаго по апостоле Андрее первая исполнительнице. Радуйся, града Пскова начальная основательнице; радуйся, всея Русския державы заступнице и покровительнице. Радуйся, яко изволением Божиим держава Русская ныне от моря до моря распространися; радуйся, яко в храмех твоих Безкровную Жертву о людех Богу приносят и хвалу Святей Троице воспевают. Радуйся, яко обитателие града Киева и Пскова сугубо тя превозносят и ублажают.
Радуйся, святая равноапостольная княгине Ольго богомудрая.
Кондак 8
Странствия земнаго течение скончавая, тепле Господа молила еси, Ольго блаженная, да не оставит Он земли Русския по преставлении твоем во тме неведения пребывати, но да возложит на сердце людем русским, обратитися к Богу, да воспоют Ему: Аллилуиа.
Икос 8
Вся объята бывши благодатию Божественною, достохвальная Ольго, мысленными очесы зрела еси просвещение всего народа твоего и пророчески предрекла еси, яко мнози велиции угодницы Божии, яко звезды светлыя, в земли Русской возсияют, еже и сбыстся изволением и благодатию Всемогущаго Бога. Сего ради по долгу воспеваем ти сице:
Радуйся, духовная наша мати, испросившая у Бога просвещение праотцем нашим; радуйся, яко Всеблагий Господь, зря доброту души твоея, тебе ради вся люди русския возлюби. Радуйся, яко тя обрете Христос достоин сосуд, чрез негоже нача изливати благодать Свою земли Русской. Радуйся, яко прозорливо предзрела еси величие и славу державы твоея. Радуйся, яко по проречению твоему, мнози святии от рода нашего возсияша; радуйся, дома Живоначальныя Троицы устроительнице. Радуйся, молитвами твоими в скорбех и напастех нас заступающая; радуйся, во обстояниих злых Отечество наше сохраняющая и от врагов избавляющая.
Радуйся, святая равноапостольная княгине Ольго богомудрая.
Кондак 9
Всяких добродетелей исполнена бывши, Ольго блаженная, с молитвою во устех предала еси дух твой в руце Божии, Иже всели тя в Небесныя обители и первую от русских людей сопричте лику равноапостольных угодников Своих. Темже испроси убо и нам у Господа мирную христианскую кончину, да предадим души наша в руце Христа Бога нашего, поюще Тому хвалебную песнь: Аллилуиа.
Икос 9
Витии многовещаннии не могут достойно восхвалити тя, Ольго богомудрая: како ты, ни ким же от человек учима и увещеваема, познала еси тщету идолослужения, правыя же веры взыскала еси и, якоже равноапостольная Елена, обрела еси безценный бисер, Христа, Егоже лицезрения небеси наслаждаяся ныне, не забуди нас, прелестьми мира сего омрачаемых и о благах вечных забывающих, да, тобою на путь правый наставляеми, взываем ти радостно:
Радуйся, добрыми твоими делы и правым ума и сердца изволением приуготовившая себе жилище Божественной благодати; радуйся, яко Сам Дух Святый учитель тебе бысть к познанию Христа Сына Божия. Радуйся, ни киих же знамений и чудес видевшая и во Христа веровавшая. Радуйся, совершенную покорность воле Божией показавшая и звавшему тя гласу благодати Святаго Духа послушна явившаяся; радуйся, с единонадесятаго часа в вертограде Господнем потрудившаяся и мзду с первыми получившая. Радуйся, яко умудри тя Господь, честь царскую, богатство и славу, сочетати со смирением христианским; радуйся, яко сим образом яве показавшая нам, яко блага земныя не суть препятие души боголюбивей к достижению благ небесных. Радуйся, крепостию веры и целомудренною чистотою жития твоего пророчества дар от Бога восприявшая.
Радуйся, святая равноапостольная княгине Ольго богомудрая.
Кондак 10
Путь спасения сыновом русским устрояя и предсмертное прошение твое исполняя, Всеблагий Господь возрасти во внуце твоем Владимире всеянное тобою семя веры, и чрез него всю землю Русскую просвети Святым Крещением. Темже убо прославляем тя, Ольго блаженная, яко виновницу просвещения нашего светом святыя веры. и умильно поем Христу Спасителю нашему: Аллилуиа.
Икос 10
Прияв Святое Крещение, внук твой Владимир, потщася изъяти из земли нетленныя, исполненныя чуднаго благоухания, мощи твоя, и со святителем Леонтием и всем множеством народа постави я в церкве Пречистыя Богоматери, и оттоле начаша источатися от них цельбы всяким недугом, притекающим с верою. Сего ради восхваляем тя сице:
Радуйся, яко благодать Святаго Духа, в тя всельшаяся, сотвори в мощех твоих цельбоподательный источник всяким недугом. Радуйся, с маловерием к ним приходящих видети я не попускавшая. Радуйся, явлением мощей твоих младенствовавшую Церковь Русскую возвеселившая; радуйся, прославлением их внука твоего Владимира зело обрадовавшая. Радуйся, яко и до ныне благочестнии людие земли Русския славною памятию твоею услаждаются; радуйся, яко твоим к Богу ходатайством вернии люди русские многих благ or Господа сподобляются. Радуйся, молитвами твоими о просвещении земли Русския Бога умолившая; радуйся, вскоре многим великим святым явитися на земли Русской прорекшая.
Радуйся, святая равноапостольная княгине Ольго богомудрая.
Кондак 11
Пение умиленное приносим ти, угоднице Божия, и смиренно тя молим: моли о нас Единаго Человеколюбца Бога, да не отвратит лица Своего от нас, недостойных, присно согрешающих и преогорчевающих благость Его, но да накажет нас зде, яко Отец чадолюбивый, онаможе, в будущем веце, да спасет и помилует, яко Судия и Мздовоздаятель праведный, да тако, избавльшеся вечнаго мучения, сподобимся с тобою в райских обителех воспевати Ему: Аллилуиа.
Икос 11
Трисиянным светом осияваема, со всеми святыми предстоиши ныне на Небеси Престолу Царя царствующих, Ольго всеблаженная, и оттуду, яко светозарное светило, просвещаеши всю страну Русскую, разгоняя мрак заблуждений и показуя путь к истинному просвещению и Небесному блаженству. Сего ради прославляюще тя глаголем:
Радуйся, путеводительнице, правую стезю к вечному спасению нам показующая. Радуйся, мощная споспешнице и укрепительнице проповедников православныя веры; радуйся, присная покровительнице благих наставников благотрудящихся на пользу общую. Радуйся, крамол и раздоров потребительнице; радуйся, всех обидимых и неправедно гонимых заступнице. Радуйся, скорбящих скорая утешительнице; радуйся, болящих милостивая исцелительнице. Радуйся, людем нашим помощь молитвами твоими от Бога подавающая; радуйся, всея страны Русския предстательнице и заступнице.
Радуйся, святая равноапостольная княгине Ольго богомудрая.
Кондак 12
Благодать Пресвятаго Духа испроси нам, наставнице наша, от Всещедраго Бога и Спаса нашего, вразумляющую и укрепляющую нас в деле спасения, да не безплодно будет в нас всеянное тобою семя Святыя Веры, но да прозябнет и плод сотворит, имже бы возмощи нам питати души наша в будущей вечной жизни, идеже вси святии воспевают Богу: Аллилуиа.
Икос 12
Поюще твоя многая и преславная благодеяния, явленная стране Русской в просвещении того светом веры Христовой, благодарственно приносим ти, с любовию зовуще сицевая:
Радуйся, несокрушимое ограждение земли Русския; покров и защищение. Радуйся, девам русским образ целомудреннаго жития; радуйся, матерем наставнице законнаго сожития и добраго чад воспитания. Радуйся, вдовицам правило спасения; радуйся, соучастнице на Небеси жребия проповедников веры Христовы. Радуйся, усердная о спасении нашем ходатаице. Радуйся, в час смерти нашея о нас к Богу молитвенница; радуйся, по исходе нашем от смертнаго сего телесе помощь и утешение подающая.
Радуйся, святая равноапостольная княгине Ольго богомудрая.
Кондак 13
О святая равноапостольная, великая княгине Ольго, приими милостивно от нас хвалебное благодарение сие о всех, яже тобою воздаде Господь нам, отцем и праотцем нашим и всей державе Русской, и моли всеблагаго Бога умножити милость Свою на ны и на роды родов наших, утвердити ны в правоверии и благочестии, хранити же от всех напастей, бед и зол, да сподобимся с тобою, яко чада с материю, во веки воспевати Богу: Аллилуиа.
(Этот кондак читается трижды, затем икос 1 и кондак 1)
Молитва к равноапостольной великой княгине Русской Ольге
О святая равноапостольная великая княгине Ольго, первоугоднице русская, теплая о нас пред Богом ходатаице и молитвеннице. К тебе прибегаем с верою и молимся с любовию: буди нам во всем ко благу помощница и споспешница и якоже во временней жизни тщалася еси просветити праотцы наша светом святыя веры и наставит я творити волю Господню, тако и ныне, в небесней пребывая светлости, благоприятными твоими к Богу молитвами, вспомоществуй нам в просвещении ума и сердца нашего светом Евангелия Христова, да преспеваем в вере, благочестии и любви Христове. В нищете и скорби сущия утеши, бедствующим подаждь руку помощи, обидимыя и напаствуемыя заступи, заблудшия вразуми, и испроси нам у всещедраго Бога вся благая и полезная жизни временней и вечней, да тако благоугодне зде поживше, сподобимся наследия благ вечных в безконечном Царствии Христа Бога нашего, Емуже со Отцем и Святым Духом подобает всякая слава, честь и поклонение всегда, ныне и присно и во веки веков. Аминь.
Величание
Величаем тя, / святая равноапостольная княгине Ольго, / яко зарю утреннюю в земли нашей возсиявшую, / и свет веры православныя народу своему предвозвестившую.
