Молебен перед началом добраго дела
строительства храма в с. Мохово
Священник: Благословен Бог наш всегда, ныне и присно, и во веки веков.
Лик: Аминь. Царю Небесный:
Таже чтец: Трисвятое. Пресвятая Троице: Отче наш: Возглас: Яко Твое есть Царство: Чтец: Аминь. Господи, помилуй, 12. Слава, и ныне: Приидите, поклонимся: трижды.
Псалом 142
Господи, услыши молитву мою, внуши моление мое во истине Твоей, услыши мя в правде Твоей и не вниди в суд с рабом Твоим, яко не оправдится пред Тобою всяк живый. Яко погна враг душу мою, смирил есть в землю живот мой, посадил мя есть в темных, яко мертвыя века. И уны во мне дух мой, во мне смятеся сердце мое. Помянух дни древния, поучихся во всех делех Твоих, в творениих руку Твоею поучахся. Воздех к Тебе руце мои, душа моя, яко земля безводная Тебе. Скоро услыши мя, Господи, исчезе дух мой, не отврати лица Твоего от мене, и уподоблюся низходящым в ров. Слышану сотвори мне заутра милость Твою, яко на Тя уповах. Скажи мне, Господи, путь воньже пойду, яко к Тебе взях душу мою. Изми мя от враг моих, Господи, к Тебе прибегох. Научи мя творити волю Твою, яко Ты еси Бог мой. Дух Твой благий наставит мя на землю праву. Имене Твоего ради, Господи, живиши мя, правдою Твоею изведеши от печали душу мою. И милостию Твоею потребиши враги моя и погубиши вся стужающыя души моей, яко аз раб Твой есмь.
Слава Отцу и Сыну и Святому Духу, и ныне и присно и во веки веков. Аминь. Аллилуиа Аллилуиа Аллилуиа.
Мирная ектения
Великая ектения
Д: Миром Господу помолимся.
Н: Господи, помилуй (на каждое прошение)
- О свышнем мире, и спасении душ наших, Господу помолимся.
- О мире всего мира, благостоянии святых Божиих Церквей и соединении всех, Господу помолимся.
- О святем храме сем, и с верою, благоговением и страхом Божиим входящих во нь, Господу помолимся.
- О великом Господине и Отце нашем святейшем Патриархе Алексии, и о Господине нашем преосвященнейшем епископе (имярек) , честнем пресвитерстве, во Христе диаконстве, о всем причте и людех, Господу помолимся.
- О Богохранимей стране нашей, властех и воинтсве ея, Господу помолимся.
- О веси сей, всяком граде, стране, и верою живущих в них, Господу помолимся.
- О благорастворении воздухов, о изобилии плодов земных и временех мирных, Господу помолимся.
- О плавающих, путешествующих, недугующих, страждущих, плененных, и о спасении их, Господу помолимся.
- О еже благословити доброе намерение рабов своих (раба) имярек, и благоизволити благополучно начати и спешно, кроме всякаго препятия, во славу свою скончати, силою, действом и благодатию пресвятаго Духа, Господу помолимся.
- О еже труждающимся делателем благоспоспешство в сем подати, и дела рук их исправити и в совершение силою, действом и благодатию пресвятаго Духа спешно произвести, Господу помолимся.
- О еже ко благому тщанию рабов своих (раба) имярек, благопоспешство со всяким довольством, силою, действом и благодатию пресвятаго своего Духа подати, Господу помолимся.
- О еже приставити делу сему и делателем ангела хранителя, еже невидимо отразити вся противныя вещи, видимых и невидимых врагов, и во всем благопоспешество, к сооружению же мудрость, и к совершению силу, силою, действом и благодатию пресвятаго своего Духа подати, Господу помолимся.
- О избавитися нам от всякия скорби, гнева и нужды, Господу помолимся.
Заступи, спаси, помилуй и сохрани нас, Боже, Твоею благодатию.
Пресвятую, Пречистую, Преблагословенную, Славную Владычицу нашу Богородицу и Приснодеву Марию, со всеми святыми помянувше, сами себе, и друг друга, и весь живот наш Христу Богу предадим.
НАРОД: Тебе, Господи....
Яко подобает Тебе:
Затем поем "Бог – Господь:" на глас тропаря,
глас 4
Бог Господь и явися нам, благословен Грядый во имя Господне.
Стих 1: Исповедайтеся Господеви, яко благ, яко в век милость Его.
Стих 2: Обышедше обыдоша мя и именем Господним противляхся им.
Стих 3: Не умру, но жив буду и повем дела Господня.
Стих 4: Камень, егоже небрегоша зиждущии, сей бысть во главу угла, от Господа бысть сей и есть дивен во очесех наших.
Тропарь, глас 2: Творче и создателю всяческих, / Боже, дела рук наших, ко славе Твоей начинаемая / Твоим благословением спешно исправи / и нас от всякого зла избави // яко един Всесилен, и Человеколюбец.
Слава Отцу и Сыну и Святому Духу, глас 6-ый:
Скорый в заступление и крепкий в помощь / предстани благодатию силы Твоея ныне / и благословив укрепи / и в совершение намерения благаго дела рабов Твоих произведи / вся бо елика хощеши // яко сильный Бог творити можеши.
И ныне и присно и во веки веков. Аминь, глас той же:
Предстательство христиан непостыдное, / ходатайство ко Творцу непреложное, / не презри грешных молений гласы, / но предвари, яко Благая, на помощь нас верно зовущих Ти: / ускори на молитву и потщися на умоление, // предстательствующи присно, Богородице, чтущих Тя. Запевы (дважды)
Пресвятая Троице, Боже наш, слава Тебе
Пресвятая Богородице, спаси нас
Святителю Отче Николае, моли Бога о нас
Преподобне отче наш Сергие, моли Бога о нас
Святая великомученице Варваро, моли Бога о нас
Вси святии, молите Бога о нас
Слава Отцу и Сыну и Святому Духу
Избави от бед рабы Твоя, Многомилостиве,/
яко мы усердно к Тебе прибегаем,\ милостивому
избавителю, всех Владыце, Господу Иисусу.
Спаси от бед рабы Твоя, Богородице,/яко вси
по Бозе к Тебе прибегаем,\яко к нерушимой
стене и предстательству.
Призри благосердием, всепетая Богородице,/ на мое лютое телесе озлобление,\и исцели души моея болезнь.
Молите Бога о нас,
святителю Отче Николае,
преподобне отче наш Сергие,
святая великомученице Варваро
и вси святии,
яко мы усердно к вам прибегаем, скорым помощникам и молитвенниках о душах наших.
Прокимен, глас 4-й:Буди светлость Господа Бога нашего на нас, и дела рук наших исправи.
Стих: И призри на рабы твоя и на дела твоя.
К Филиписием послания святаго Апостола Павла чтение.
[Зач. 241.] Возлю́бленнiи мои́, я́коже всегдá послýшасте менé, не я́коже въ пришéствiи моéмъ тóчiю, но ны́нѣ мнóго пáче во отшéствiи моéмъ, со стрáхомъ и трéпетомъ своé спасéнiе содѣвáйте: Бóгъ бо éсть дѣ́йствуяй въ вáсъ и éже хотѣ́ти и éже дѣ́яти о благоволéнiи. Вся́ твори́те безъ роптáнiя и размышлéнiя, да бýдете непови́нни и цѣ́ли, чáда Бóжiя непорóчна посредѣ́ рóда стропти́ва и развращéна, въ ни́хже явля́етеся я́коже свѣти́ла въ мíрѣ, слóво живóтно придержáще, въ похвалý мнѣ́ въ дéнь Христóвъ.
(Фил.2:12-16)
Свящ.:Премудрость, прости…
Мир всем.
Хор: И духови твоему.
Св.: От Матфеа святаго Евангелия чтение.
Вонмем.
(Мф.7:7-11). [Зач.19)
Проси́те, и дáстся вáмъ: ищи́те, и обря́щете: толцы́те, и отвéрзется вáмъ: ся́къ бо прося́й прiéмлетъ, и ищя́й обрѣтáетъ, и толкýщему отвéрзется. Или́ ктó éсть от вáсъ человѣ́къ, егóже áще воспрóситъ сы́нъ егó хлѣ́ба, едá кáмень подáстъ емý? ли́ áще ры́бы прóситъ, едá змiю́ подáстъ емý? Аще ýбо вы́, лукáви сýще, умѣ́ете дая́нiя блáга дая́ти чáдомъ вáшымъ, кольми́ пáче Отéцъ вáшъ небéсный дáстъ блáга прося́щымъ у негó.
Запевы
Пресвятая Троице, Боже наш, слава Тебе
Пресвятая Богородице, спаси нас
Святителю Отче Николае, моли Бога о нас
Преподобне отче наш Сергие, моли Бога о нас
Святая великомученице Варваро моли Бога о нас
Вси святии, молите Бога о нас
Слава Отцу и Сыну и Святому Духу
Избави от бед рабы Твоя, Многомилостиве,/
яко мы усердно к Тебе прибегаем,\ милостивому
избавителю, всех Владыце, Господу Иисусу.
Спаси от бед рабы Твоя, Богородице,/яко вси
по Бозе к Тебе прибегаем,\яко к нерушимой
стене и предстательству.
Призри благосердием, всепетая Богородице,/ на мое лютое телесе озлобление,\и исцели души моея болезнь.
Молите Бога о нас,
святителю Отче Николае,
преподобне отче наш Сергие,
святая великомученице Варваро
и вси святии,
яко мы усердно к вам прибегаем, скорым помощникам и молитвенниках о душах наших.
Помилуй нас, Боже, по велицей милости Твоей, молим Ти ся, услыши и помилуй.
Еще молимся о братиях наших, священницех, священномонасех, и всем во Христе братстве нашем.
Хор: Господи, помилуй Господи, помилуй Господи, помилуй( на каждое прошение).
Еще молимся о блаженных и приснопамятных святейших Патриарсех православных, и блаженных создателех святого храма сего, и о всех преждепочивших отцех и братиях, зде лежащих и повсюду, православных.
- Призри, человеколюбче, милостивым твоим оком на рабы твоя имярек, к твоему благоутробию верою припадающыя, и услышав моления их, благое намерение и дело их благослови, и благополучно начати и спешно кроме всякаго препятия во славу твою совершити, яко всесильному царю молимтися, услыши и помилуй.
- Во всем споспешествуяй всем во благое, Господи, милостивно и рабом твоим имярек, поспешествуй, Спасе, и во благополучное совершение делу их спешно произвестися, благослови, молимтися, всемогий Владыко, услыши и помилуй.
- Ангела твоего хранителя пристави делу сему, благоуветливе Господи, и еже воспятити вся препятия видимых и невидимых врагов, поспешство же во всем ко благополучному совершению делающым сотворити, молимтися, преблагий Спасе, услыши и помилуй.
- Во славу твою вся творити повелевая, Господи, рабом твоим (имена), ко твоей славе дело свое начинающым, благословением твоим поспешество благополучное с довольством к совершению подаждь, здравие им со благоденствием даруя, молимтися, вседаровитый Творче, услыши и помилуй.
Еще молимся о милости, жизни, мира, здравии, спасении, посещении, прошении и оставлении грехов рабов Божиих настоятеля, братии, сестер и прихожан Святого храма сего.
Еще молимся о плодоносящих и добродеющих во святем и всечестнем храме сем, труждающихся, поющих и предстоящих людех, ожидающих от Тебе великия и богатыя милости.
Св.: Господу помолимся.
Хор: Господи, помилуй
Молитва
Господи Иисусе Христе, Боже наш, приими усердное моление наше и благослови благое намерение и дело рабов твоих (раба) имярек, яже благополучно начати, и без препятия всякаго ко славе твоей совершити. Делателем благопоспеши и дела рук исправи, и в совершение силою пресвятаго твоего Духа спешно произвести сотвори! Твое бо есть, еже миловати и спасати ны, Боже наш, и тебе славу возсылаем, со безначальным твоим Отцем, и пресвятым и благим и животворящим твоим Духом, ныне и присно и во веки веков. Аминь.
Св.: Господу помолимся.
Хор: Господи, помилуй
Господи Иисусе Христе, Сыне Божий, Ты рекл еси пречистыми усты Твоими: Аминь, глаголю вам, яко аще два от вас совещаета на земли о всяцей вещи, еяже аще просита, будет има от Отца Моего, Иже на Небесех: идеже бо еста два или трие собрани во имя Мое, ту есмь посреде их. Непреложны словеса Твоя, Господи, милосердие Твое безприкладно и человеколюбию Твоему несть конца. Сего ради молим Тя: даруй нам, рабом Твоим (имена молящихся) православным христианом села Мохово, согласившимся просити Тя о воздвижении дома Твоего Небоподобнаго – храма Святаго Духа сошествия на апостолов – в веси сей, исполнения нашего прошения, для прославления Твоего Пресвятаго Имени, для укрепления и спасения душ и телес наших.
Предстательством Пречистыя Твоея Матере, Пресвятыя Богородицы, силою Честнаго и Животворящаго Креста, молитвами святителя и чудотворца Николая, архиепископа Мирликийскаго, святаго преподобнаго Сергия игумена Радонежскаго и всея России Чудотворца, и всех святых Твоих умудри власть имущих, открой сердца доброхотных жертвователей, укрепи в единомыслии, твердой вере, взаимной любви и молитве всех нас, молящихся Тебе о сем великом и благом деле.
Но обаче не якоже мы хотим, но якоже Ты, Господи. Да будет во веки во всем воля Твоя. Аминь.
Премудрость. Пресвятая Богородице, спаси нас.
Хор: Честнейшую Херувим, и славнейшую без сравнения Серафим, без истления Бога Слова рождшую сущую Богородицу Тя величаем.
Свящ.:Слава Тебе, Христе Боже, упование наше, слава Тебе.
Слава Отцу и Сыну и Святому Духу, и ныне и присно и во веки веков. Аминь.
Господи, помилуй (3 раза) благослови.
Свящ.: Христос, истинный Бог наш…
_________________
Молебен перед началом добраго дела
строительства храма в с. Мохово
ЕСЛИ НЕТ СВЯЩЕННИКА, ТО ЧИТАЕТ ХРИСТИАНИН:
Чтец: Молитвами святых отец наших Господи Иисусе Христе, Сыне Божий, помилуй нас. Аминь.
Лик: Аминь. Царю Небесный:
Таже чтец: Святый Боже, Святый Крепкий, Святый Безсмертный, помилуй нас.
Святый Боже, Святый Крепкий, Святый Безсмертный, помилуй нас.
Святый Боже, Святый Крепкий, Святый Безсмертный, помилуй нас.
Слава Отцу и Сыну и Святому Духу, и ныне и присно и во веки веков. Аминь.
Пресвятая Троице, помилуй нас; Господи, очисти грехи наша; Владыко, прости беззакония наша; Святый, посети и исцели немощи наша, имене Твоего ради.
Господи, помилуй. Господи, помилуй. Господи, помилуй. Слава Отцу, и Сыну, и Святому Духу и ныне, и присно, и во веки веков. Аминь.
Отче наш, Иже еси на небесех! Да святится имя Твое, да приидет Царствие Твое, да будет воля Твоя, яко на небеси и на земли. Хлеб наш насущный даждь нам днесь; и остави нам долги наша, якоже и мы оставляем должником нашим; и не введи нас во искушение, но избави нас от лукаваго.
Господи, помилуй, 12. Слава, и ныне: Приидите, поклонимся: трижды.
Псалом 142
Господи, услыши молитву мою, внуши моление мое во истине Твоей, услыши мя в правде Твоей и не вниди в суд с рабом Твоим, яко не оправдится пред Тобою всяк живый. Яко погна враг душу мою, смирил есть в землю живот мой, посадил мя есть в темных, яко мертвыя века. И уны во мне дух мой, во мне смятеся сердце мое. Помянух дни древния, поучихся во всех делех Твоих, в творениих руку Твоею поучахся. Воздех к Тебе руце мои, душа моя, яко земля безводная Тебе. Скоро услыши мя, Господи, исчезе дух мой, не отврати лица Твоего от мене, и уподоблюся низходящым в ров. Слышану сотвори мне заутра милость Твою, яко на Тя уповах. Скажи мне, Господи, путь воньже пойду, яко к Тебе взях душу мою. Изми мя от враг моих, Господи, к Тебе прибегох. Научи мя творити волю Твою, яко Ты еси Бог мой. Дух Твой благий наставит мя на землю праву. Имене Твоего ради, Господи, живиши мя, правдою Твоею изведеши от печали душу мою. И милостию Твоею потребиши враги моя и погубиши вся стужающыя души моей, яко аз раб Твой есмь.
Слава Отцу и Сыну и Святому Духу, и ныне и присно и во веки веков. Аминь. Аллилуиа Аллилуиа Аллилуиа.
Господи, помилуй (12 раз)
Слава Отцу и Сыну и Святому Духу, и ныне и присно и во веки веков. Аминь. Тропарь, глас 2: Творче и создателю всяческих, / Боже, дела рук наших, ко славе Твоей начинаемая / Твоим благословением спешно исправи / и нас от всякого зла избави // яко един Всесилен, и Человеколюбец.
Слава Отцу и Сыну и Святому Духу, глас 6-ый:
Скорый в заступление и крепкий в помощь / предстани благодатию силы Твоея ныне / и благословив укрепи / и в совершение намерения благаго дела рабов Твоих произведи / вся бо елика хощеши // яко сильный Бог творити можеши.
И ныне и присно и во веки веков. Аминь, глас той же:
Предстательство христиан непостыдное, / ходатайство ко Творцу непреложное, / не презри грешных молений гласы, / но предвари, яко Благая, на помощь нас верно зовущих Ти: / ускори на молитву и потщися на умоление, // предстательствующи присно, Богородице, чтущих Тя. Запевы (дважды)
Пресвятая Троице, Боже наш, слава Тебе
Пресвятая Богородице, спаси нас
Святителю Отче Николае, моли Бога о нас
Преподобне отче наш Сергие, моли Бога о нас
Святая великомученице Варваро, моли Бога о нас
Вси святии, молите Бога о нас
Слава Отцу и Сыну и Святому Духу
Избави от бед рабы Твоя, Многомилостиве,/
яко мы усердно к Тебе прибегаем,\ милостивому
избавителю, всех Владыце, Господу Иисусу.
Спаси от бед рабы Твоя, Богородице,/яко вси
по Бозе к Тебе прибегаем,\яко к нерушимой
стене и предстательству.
Призри благосердием, всепетая Богородице,/ на мое лютое телесе озлобление,\и исцели души моея болезнь.
Молите Бога о нас,
святителю Отче Николае,
преподобне отче наш Сергие,
святая великомученице Варваро
и вси святии,
яко мы усердно к вам прибегаем, скорым помощникам и молитвенниках о душах наших.
Прокимен, глас 4-й:Буди светлость Господа Бога нашего на нас, и дела рук наших исправи.
Стих: И призри на рабы твоя и на дела твоя.
К Филиписием послания святаго Апостола Павла чтение.
[Зач. 241.] Возлю́бленнiи мои́, я́коже всегдá послýшасте менé, не я́коже въ пришéствiи моéмъ тóчiю, но ны́нѣ мнóго пáче во отшéствiи моéмъ, со стрáхомъ и трéпетомъ своé спасéнiе содѣвáйте: Бóгъ бо éсть дѣ́йствуяй въ вáсъ и éже хотѣ́ти и éже дѣ́яти о благоволéнiи. Вся́ твори́те безъ роптáнiя и размышлéнiя, да бýдете непови́нни и цѣ́ли, чáда Бóжiя непорóчна посредѣ́ рóда стропти́ва и развращéна, въ ни́хже явля́етеся я́коже свѣти́ла въ мíрѣ, слóво живóтно придержáще, въ похвалý мнѣ́ въ дéнь Христóвъ.
От Матфеа святаго Евангелия чтение.
Вонмем.
(Мф.7:7-11). [Зач.19)
Проси́те, и дáстся вáмъ: ищи́те, и обря́щете: толцы́те, и отвéрзется вáмъ: ся́къ бо прося́й прiéмлетъ, и ищя́й обрѣтáетъ, и толкýщему отвéрзется. Или́ ктó éсть от вáсъ человѣ́къ, егóже áще воспрóситъ сы́нъ егó хлѣ́ба, едá кáмень подáстъ емý? ли́ áще ры́бы прóситъ, едá змiю́ подáстъ емý? Аще ýбо вы́, лукáви сýще, умѣ́ете дая́нiя блáга дая́ти чáдомъ вáшымъ, кольми́ пáче Отéцъ вáшъ небéсный дáстъ блáга прося́щымъ у негó.
Запевы
Пресвятая Троице, Боже наш, слава Тебе
Пресвятая Богородице, спаси нас
Святителю Отче Николае, моли Бога о нас
Преподобне отче наш Сергие, моли Бога о нас
Святая великомученице Варваро моли Бога о нас
Вси святии, молите Бога о нас
Слава Отцу и Сыну и Святому Духу
Избави от бед рабы Твоя, Многомилостиве,/
яко мы усердно к Тебе прибегаем,\ милостивому
избавителю, всех Владыце, Господу Иисусу.
Спаси от бед рабы Твоя, Богородице,/яко вси
по Бозе к Тебе прибегаем,\яко к нерушимой
стене и предстательству.
Призри благосердием, всепетая Богородице,/ на мое лютое телесе озлобление,\и исцели души моея болезнь.
Молите Бога о нас,
святителю Отче Николае,
преподобне отче наш Сергие,
святая великомученице Варваро
и вси святии,
яко мы усердно к вам прибегаем, скорым помощникам и молитвенниках о душах наших.
Господи, помилуй (40 раз)
Слава Отцу и Сыну и Святому Духу, и ныне и присно и во веки веков. Аминь.
Господи Иисусе Христе, Боже наш, приими усердное моление наше и благослови благое намерение и дело рабов твоих (раба) имярек, яже благополучно начати, и без препятия всякаго ко славе твоей совершити. Делателем благопоспеши и дела рук исправи, и в совершение силою пресвятаго твоего Духа спешно произвести сотвори! Твое бо есть, еже миловати и спасати ны, Боже наш, и тебе славу возсылаем, со безначальным твоим Отцем, и пресвятым и благим и животворящим твоим Духом, ныне и присно и во веки веков. Аминь.
Господи Иисусе Христе, Сыне Божий, Ты рекл еси пречистыми усты Твоими: Аминь, глаголю вам, яко аще два от вас совещаета на земли о всяцей вещи, еяже аще просита, будет има от Отца Моего, Иже на Небесех: идеже бо еста два или трие собрани во имя Мое, ту есмь посреде их. Непреложны словеса Твоя, Господи, милосердие Твое безприкладно и человеколюбию Твоему несть конца. Сего ради молим Тя: даруй нам, рабом Твоим (имена молящихся) православным христианом села Мохово, согласившимся просити Тя о воздвижении дома Твоего Небоподобнаго – храма Святаго Духа сошествия на апостолов – в веси сей, исполнения нашего прошения, для прославления Твоего Пресвятаго Имени, для укрепления и спасения душ и телес наших.
Предстательством Пречистыя Твоея Матере, Пресвятыя Богородицы, силою Честнаго и Животворящаго Креста, молитвами святителя и чудотворца Николая, архиепископа Мирликийскаго, святаго преподобнаго Сергия игумена Радонежскаго и всея России Чудотворца, и всех святых Твоих умудри власть имущих, открой сердца доброхотных жертвователей, укрепи в единомыслии, твердой вере, взаимной любви и молитве всех нас, молящихся Тебе о сем великом и благом деле.
Но обаче не якоже мы хотим, но якоже Ты, Господи. Да будет во веки во всем воля Твоя. Аминь.
Честнейшую Херувим, и славнейшую без сравнения Серафим, без истления Бога Слова рождшую сущую Богородицу Тя величаем.
Слава Отцу и Сыну и Святому Духу, и ныне и присно и во веки веков. Аминь.
Господи, помилуй (3 раза)
Господи Иисусе Христе, Сыне Божий, молитв ради Пречистыя Твоея Матере, преподобных и богоносных отец наших и всех святых помилуй нас. Аминь.
