Месяца декабря во 2-й день
Священномученика Константина Некрасова
Тропарь, глас 3:
Образ верным во святем житии твоем являя,/ Христа ради пострадал еси даже до крове,/ священномучениче Константине,/ моли Милостиваго Бога/ в вере Православней нас утвердити/ и от смертоносных страстей избавити.
Кондак, глас 8:
Воздержанию, чистоте и благочестию/ страждущих от винопития научая,/ изгнания и темничная заключения,/ от безбожных беззаконное убиение/ за Христа претерпел еси, священномучениче Константине,/ моли даровати нам грехов оставление.
Величание:
Величаем тя,/ священномучениче Константине,/ и чтим честная страдания твоя,/ яже за Христа/ претерпел еси.
