Народный праздник «Вежадырся гажлöн ловыш»
(«Раз в крещенский вечерок»)
Авторы–,
специалисты МАУК «Центр коми культуры г. Сыктывкара»
Кад: январ (тöв шöр) 19 лун, 2009 во
Нуöданiн: Сыктывкарса коми культура шöрин
Ворсысьяс: кöзяйка, Ёма баба, Мути, колядуйтысьяс
Дасьтыны: Ёмалы пызан, кык улöс, дозмукын картупель да пöжалöм нянь, гöликлöн ньöръяс. Пызан вылын сись, пöжалöм пирöгъяс. Вöрöта серпасавны ватман вылö.
Кöзяйка.
Воис вежадырся гаж
Ывла вылын кöдзыд
Аскöд ваим вежа ва
Сьöлöм вылын лöсьыд.
Керка тырыс уна йöз,
Öтув ставöн шойччам
Важся кадсö казьтігмоз
Нывъяс, удал зонъяс
Кöзяйка. Со и бара аддзысим! Бур рыт, дона гöстьяс! Ставнытö чолöмалам Выль воöн, öш воöн! А талун ми чукöртчим Вежадырся гаж вылö!
Быдöн тöданныд, мый Рöштво войö петöны лёк вынъяс. Мутияс вермöны вöчны лёктор йöзлы, гортса пемöслы. Рöштво войсянь Вежадырöдз ставöн куттяасьöны. Он кö керкаад куттясö лэдз, сiйö мыйкö вермас лёктор вöчны: зыр да гöликтö пышйöдны либö öддзöстö игнавны.
Тöвшöр 14-öд лунö коми йöз тунасьлiсны, а Вежадырйи ветлісны керкаысь керкаö да славитісны Кристосöс, сьылісны, гажöдчисны (кылö шум).
Пырö Ёма-баба, киас – дозмук, сэнi пуöм картупель, пöжас), пуктö дозсö пызан вылö да öзтö сись, пуксьö улöс вылö да видзöдö дозыслöн пыдöсас.
Ёма баба. Кутшöм нö тайö олöм менам лоис?(синвасö чышкö). Кутшöмкö омöльтор сиктын лоас – пыр ме, коньöр Ёма, шань ань мыжа. Сиктын йöлыс кодлöнкö шоммöма – Ёма сьöд синмöн ёрöма, картупель сисьмö гöбöчын – бара ме туналi, кодлöнкö верöсыс мунöма вöрö кыйсьыны да вошöма, бара ме туйсö сылы вуджи. Сё мат! Дыр-ö менö кутасны омöльтны? А ме öд став бурсö йöзлы вöча! Со и талун гöсьтинеч вайи. Коми культура шöринад пö аслад сёян-юанöн корисны. Гажтöм öд меным öтнамлы, ме öд морт жö, тшöтш гажöдчыны кöсъя!
Друг Ёма лёкысь горöдö, повзьö.
Пызан улысь чеччыштöмöн петö Мути да пуксьö пызан вылö.
Ёма баба. Уф! Мути (Ёма кутлö Мутиöс), тэ нö мый менö повзьöдлан! Важöн нин тан пукалан?
Мути. Важöн, важöн, весиг бöкъясöй мудзисны. А тэ нö кытчö вошлін, пöрысь выжыв?
Ёма баба. Тэд нö кутшöм шог, мути? И ешö, нöшта, ме абу выжыв, талун медся мича сарапанöс пасьталі. Висьтав бурджык, мый тэ талун вöчин, кодöскö повзьöдлін эн?
Мути. Ок, кöзяйка, тöрыт эськö войбыд уджалі, дöзмöдчи, а талун ывла вылын сэтшöм кöдзыд! Ассьым гöна табъя кокъясöс весиг кынталі!
Ёма баба. Кöдзыд кö, сійö и бур. А куттяясыс мыйкö тай эз на и волыны!
Мути. Став том йöзыс ывла вылын. Ветлöдлöны, сьылöны, оз повны кöдзыд поводдясьыс. Кöсйи öтиясöс повзьöдны, турöб да ру кыпöді, сэсся кыдзи горöді, а найö (дузнитчöмöн) сералöны да ешö менсьым кузь бöжöс кватитісны, тайкö сытöг коля!
Ёма баба. Ой-я, да ой-я, но и öнія том йöз, некушöм воспитанне абу, нинöмысь оз повны, кöть керкаö эн лэдз.
Мути (матыстчö öшинь дорö, пельсö гыжъялö, мыйкö быттьö кылö). Ёма, видзöдлы, со тай нö, куттяяс татчö матыстчöны! (Кавшасьö пызан вылö, бöжсö öтарö-мöдарö бергöдлö) Вай дзебсьылам наысь.
Ёма да Мути дзебсьöны. Куттяяс («Томлун» ансамбль) мунöны зал пыр, гöстьясöс ньöрйöн кучкыштöны, гильöдыштöны да сьылöны сьыланкыв, а Ёма Мутиöс дзебö ас мышкö)
Куття.
Моляда-коляда,
Гилöда, гольöда
Зепъяснытö гугöдлöй
Миянöс ті чöсмöдöй,
Сукар, прениксö мыччöй.
Горшъясöс ми ньöръялам,
Öдзöснытö тупкалам,
Он кö нинöм ті сетöй,
Йöткыштам да тойыштам.
Куттяяс сьылöм бöрас корсьöны Ёмаöс.
Куття (шыöдчöны гöстьяс дорö) Ёма баба татчö кежавліс эз? Скöрмöдыштны эськö кöсъям сійöс! Миянöс тай дöзмöдö-а!
(Гöстьяс вочавидзöны)
Куття. Дзебсис? Кытчö нö? Матыстчö öдзöс дорö, тотшкöдчö.
Ёма баба. Мый нö клёнöдчанныд? Этша али мый сёянсö сетісны?
Куття. Ёма, петкöдчыв, сёрни тэ дорö эм!
Ёма оз пет. Куттяяс выльысь тотшкöдчöны.
Ёма баба (лöгасьöмöн) Мый нö тіянлы месянь колö? Ёма петö, Мути сыкöд петö Ёмалöн мышкас дзебсигмоз.
Куття. Гöстьясыс быдтор нин сетісны, а тэ, тай, Ёма, миянлы нинöм он сет. Мутиöс на дзеблалан мыш саяд дай!
Ёма баба (дзебö сёян дозмуксö) Абу менам нинöм, сё зöлöтаяс, абу. Ставныслысь корыся моз дзайга. А, а, а мутиыд ачыс сирасис ме дорö.
Мути: Колантор!
Куття. Зыксьöм дорсьыд эськö сьылыштанныд да йöктыштанныд кö бур йöзыслы, лöгасьнытö дугдам!
Ёма баба йöктö, Мути сьылö. Куттяс орчччöн йöктöны.
Куття. Ок и бура гажöдiнныд! (Ошкöны Мути да Ёмаöс)
Кöзяйка. Мути да Ёма бурмöдісны сьöлöмсö Куттяяслысь. Налöн йöктöмысь кокныс печласьö миян войпукысьяслöн. Корам петкöдчыны «Эжва катыд» сьылан котырöс.
«Эжва катыд» сьылан котыр (3 сьыланкыв).
Куття. Ёна-й йöктiм да сьылiм! Аттьö ставныдлы! А ми водзö ветлам! Гашкö и пыралам на.
Куттяяс мунöны. Сэк кості Ёма-баба пукталö картiяс пызан вылö, гадайтчöны. Мути сы дорын бергалö.
Мути. Тэ нö мый вöчан? Тунасян öтнад?
Ёма баба. А мый, шуисны, мый менам ставыс на водзын, жöникöс корся да верöс сайö пета! Öтнамлы зэв гажтöм, некод дорö весиг топöдчывнысö, юрöс окота мужичöйлöн пельпом вылас пуктывны!
Мути. Но сідзкö вай öтлаын гадайтчам!
Ёма баба. Ак ті дона картiяс, аслад местаö водöй, мый лоö водзын висьталöй, нинöм энö вунöдöй…
Мути чеччалö Ёма дорын да чирзö.
Ёма баба. Мый нö, мути, мешайтчан, вешйы ме дорысь.
Мути мыйкö шöпкöдö Ёмалы пеляс, Ёма сералö.
Ёма (Мутилы): Мый? Куттяслы? Но видлы, оз кö асьтö йöртны.
Мути пышйö, петö залысь. Кöзяйка матыстчö Ёма дорö, шыöдчö гöстьяс дінö
Кöзяйка. Ёма тай гадайтчö нин, гашкö бур олöм миянлы туналас, мути пышйис, а сы косттi корам петкöдчыны «Хорошее настроение» сьылан котырöс.
Сьылö да петкöдлö гадайтчöм «Хорошее настроение» сьылан котыр.
Локтöны куттяяс, ыджыд картупель мешöкöн - пытшкас мыйкö ыджыдтор, ворсöны бубенъяс да жыннянъясöн, матыстчöны Ёма дорö.
Куттяяс. Ывла вылын ешö ёнджыка кöдздöдöма. Ёма, видзöдлы мешöк пытшкö.
Ёма (матыстчö). Мый сэнi? Ёма гыжъялö балябöжсö, нюмъялö.
Куттяяс (сералігмоз) Козин, козин, тэныд, дона Ёма.
Мешöкысь друг чеччыштöмöн петö Мути да дзебсьö Ёма сайö.
Ёма (чуймöмöн). Мöдысь нин тайö рытö повзьöдiс, Лешак! Ме чайті, мый меным козин ваисны! Кыдз нö тэ татчö веськалін?!
Мути (повзьöмöн элясьö). Куттяяс дöзмöдчигöн бöжöд кыйисны.
Куттяяс. Мути, тырмас дöзмöдны да вирсö юны гöстьяслысь. А тэ Ёма, водзöвылö, этшаждык горшась. Сэк и тэныд сьöлöм вылад лоö долыдджык, и гажöдчыны кутан шöринö волыны.
Ёма (перйö дзебасьыс сёян дозмуксö да пуктö пызан вылö). Да. Мыжа. Ог сэсся кут. Некор.
Мути. Ме тшöтш. Ог эсся. Ог кут. Ми Ёмакöд отсасьны кутам. Эсканныд?
Куттяяс. Видзöдлöй кутшöм войтыр локтöмась гаж вылö. Öти мöдысь бурджык. Найö кö эскасны, и ми эскам.
Ёма. Кывзы, куття, ме бур йöзыслы тунала, кутшöм лоö выль воыс. Корöсь вылын (корö залысь некымын мортöс).
Ёма кыскö зептысь гöликлысь ньöръяссö, лыддьöдлö «Гöль, озыр, дыш удал…». Сэсся босьтö чышъян да тупкö ньöръяссö
Ёма. Дона гöсьт, кыскы öти ньöр. Кутшöмöс кыскан, сэтшöм воыс и лоö!
Кузь ньöр – озыр, бур во кежлö , дженьыд – сьöкыд, омöль урожая во кежлö. Ешö коді кöсйö тöдмавны, кутшöм лоö сылöн выль во? (корö ешö öти гöстьöс).
Мути. А ме, а ме, позьö ме сьылышта да гудöкöн ворсышта тiянлы.
«Бабки-Ёжки» шылад улö сьылö Мути.
Припев:
Сьылам, Ёма, гора сьылам
Гажöдчыштам гудöкнас
Кадсö лöсьыда коллялам
Сьылыштам частушкаяс
Котöрта ме вöр туйті
Аддза, бöрсянь лешак пи
Чайті, мый мужтшина
Аттö, чертовшина
Припев
Бара котöрта вöрті
Конъяси да клоп уси
Аскöд куті пинясьны, бум (Ёма шыбитö плешкас коль)
Кольяс плешкöс дойдісны
Припев
Куттяяс аттьöалöны Мутиöс да Ёмаöс.
Куттяяс. Но ладнö, Ёма да Мути, öні воис кад мöдöдчыныны. Кöсъяныд кö, миянкöд мунам!
Мути. Вай купайтчыны ветлам! Ваыс пö талун зэв шоныд!
Ёма. Но лок, Мути лэччылам, Сыктыв ю дорö.
Куттяяс. А ми водзö мунам куттяасны. Аддзысьлытöдз!
(Ёма баба, Мути, Куттяяс мунöны)
Кöзяйка.
Пызан дорö гöстьöс
Корам нимöн-вичöн
Югыд самöварлань,
Коді быттьö ичмонь.
Кöзяйка корö гöсьтъясöс пызан сайö тшай юны. Пызан сайын юргöны коми сьыланкывъяс.
Чунькытшöн гадайтчöм:
Корам петны верöстöм на нывъясöс.
1. Нывъяс, менам киын шыдöс тасьтi. Öнi ме кута матыстчыны нывъяс дорö, а найö пуктасны тасьтiас ассьыныс чунькытшсö. Ме ставсö (сорлала) гудрала. Öнi видзöдлам, кодлы кутшöм чунькытш шедас? Быдöн гумовтöй китыр шыдöссö да видзöдлöй, кутшöм чунькытш шедiс:
Дона изъя – зонмыс озыр,
зарни – петан озыр верöс сайö,
аслад чунькытш – мый кöсъян – сiйö збыльмас,
кык чунькытш – кыкысь петан верöс сайö,
нинöм – верöс саяд таво он на пет,
ыргöн (меднöй) – верöсыд лоö гöль,
эзысь – ёна радейтысь тэнö зон.
Вед 2: Гадайтчыштiм, а öнi позьö и ворсыштны.
«Пидзöсъяс эмöсь, а пуксьыны некытчö»
Корам став мужичöйяслы корсьны аслыныс пöв – нывъясöс. Кодi аддзис аслыс пöвсö, матыстчöй ме дорö. Мужичöйяс сувтöны öти пидзöс вылö. А пидзöс улад, медым мича гачьясныд эз лякöссьы, пуктöй листбок (разöда ставлы). Нывъяс сулалöны аслас зон дорын. А öти нывлöн параыс абу, лишнöй. Сöмын заводитас ворсны музыка, нывъяс йöктöны кытш гöгöрыс. Кыдз сöмын мызыкаыс дугдö ворсны, нывъяслы колö аддзыны зэв öдйö любöй мужичöйлысь пидзöссö. Ныв, кодi эз удит пуксьыны пидзöс вылас, бöрйö сьöлöм вылö воысь зонмöс. Найö кутлысьöны, мунöны пельöсö да мелiа шöпкöдчöны, оз торйöдчыны.
Ёма. Мунам, но медводз ёшö на öти тунасьöм. Коляда, сетав гöстьяслы серпасъяссö.
Гöстьяс босьтöны öти карточкаöн.
Ёма. Видзöдлöй карточкаяс вылад да менö нöшта кывзыштöй: (Комментирует каждый рисунок на карточке.)
Сердечко - любовь, сьöлöм - радейтчöм
колечко - к свадьбе, чунькытш – кöлысь кежлö
ключик - новоселье, ключ – регыд лоö выль оланін
пуговка - обнова в одежде, кизь – регыд шкап пытшкад лоас зэв уна выль паськöм
соска – рöдын выль воын öти мортöн лоö унджык
конфета - сладкая жизнь, кампет – юмов, чöскыд да кокни во
копейка - денежный год, ур – уна сьöма во
лист - успехи в производстве, лист бок – уджын выль вермöмъяс
елка - отпуск, каникулы на природе, коз – регыд мунанныд шойчыны
булка хлеба - сытный год, нянь – пöтöса во
рубль - к премии, шайт – регыд ыджыд премия
рюмка - частое застолье, румка – во быд гулятан да пöттöдзыд юан
собака - новый друг, пон – выль ёрт
бусы - памятный подарок. Сикöтш – виччысь козин (нывбабасян, мужичöйсянь)
