Лакку мазрал ва литературийсса буккаврил байбихьулул классирттансса к1улшиву дулаврил программарду(1-4 классру) (стр. 2 )

3.Цама инсаннал пикрилух, чил миллатрал тарихрах ва маданиятрах х1урмат буну ургаву х1асул даву.

4.Цала дуллалисса даврил, цала т1уллан жаваб дулун бюхъаву.

5.Анаварну даххана хъанахъисса ва оьрму хьхьич1унмай нанисса дуниялий ялапар хьун лахьхьин бюхъаву.

6.Цайминнан хъинбала хьуну ччисса, мяърипат, инсаншиву дусса, куннан кув бувч1айсса, цайми инсантурал дак1ниймур бувч1ин бюхъайсса инсантал шаву.

7.Цаярва хъуниминнащал ва ч1унарх1ал оьрч1ащал ч1умух, тагьарданух ва к1анттух бурувгун, ихтилат бан, маз лякъин к1улну бик1ан; бяс - ччаллу къабуллай, оьрмулул лич1и-лич1исса тагьарданух бурувгун, ххуллурду

ляхълан.

8.Чурххан зарал бакъа, дуллалисса давриву цукунсса - дунугу ккаккияртту хьунну зузаву.

Метапредметныйсса результатру

1. Цайнура цала гихуннайсса к1улшиву ласун бюхъаву, дуккаврихсса, за к1ул баврихсса мотивация дик1аву.

2.Лув ккаккан дурсса давуртту дан лахьхьин: лащан баву, анализ, синтез, журардайх бач1ин ва жям буллан, лавхьхьусса к1антту лич1и бан ва м. ц.

3.Гъалгъат1иманах вич1и дишин к1улну бик1ан, щищал - бунугу гъалгъа бан к1улну бик1ан. Гьарца инсаннал ссал - бунугу ялув цала - цала пикри бик1айшиву к1улну бик1ан. Цала пикри бусан, га бувч1ин бан бюхъан. Щищал - бунугу гъалгъа т1исса ч1умал диалограл ва монолограл журалийсса гъалгъа ишла бан бюхъаву.

4.Бяс бусса к1анттурдаву, циняннал мурадирттах бурувгун, т1айласса сант, ххуллу лякъин х1адурну ик1аву.

Предмет к1улшиврул результатру

1. Мукъурттивусса ч1урдал анализ даву, т1ивт1у ва лавкьу ч1урду лич1и баву.

НЕ нашли? Не то? Что вы ищете?

2. Предложениялува махъру лич1и баву.

3. Мюрщими ва хъуними х1арпру т1айлану, даччан къадурну чичаву ва гай кунниц1ун кув т1айлану лач1ун даву.

4. Печатьрай бивщусса ва канил чивчусса мукъурттих ва предложениярттах уруглай, гай т1айлану чичаву.

5. Махъру ва 3-4 мукъуя хьусса предложенияртту гъалат1 бакъа чичаву.

6. Предложениялул бак1рай - хъун х1арп, ахирданий к1унт1 бишаву.

7.Хъун бакъасса магьлух, ссигълух, назмулух, хаварданух вич1и дишин, учительнал буллусса суаллал ягу суратирттал кумаграйну вич1и дирхьумунил мурад бусаву.

8.Цала бувккумунил, вич1и дирхьуну бавмунил мурад бусаву.

9.5- 6 назму дак1них дуккаву.

10.Предложениялул дайдихьулий, инсантурал ц1ардал, фамилиярттал, х1айвантран дирзсса ц1ардал, шагьрурдал, щархъал, неххардил ц1ардал бак1рай хъунмур х1арп чичаву.

II класс

Фонетика, грамматика, чичрулул кьяйдарду ва гъалгъа магьир баву

Тикрал баву. Махъ. Предложение. Текст.

Махъ, предложение, текст гъалгъалул единицарду х1исаврай. Текстрал ва предложениярттал лич1ишиву.

Ч1урду ва х1арпру тикрал даву.

Гъалгъа. Текст. Текст гъалгъалул яла хъунмур единица х1исаврай. Текстрал журарду ( к1ул баву). Текст бут1райх дач1аву. Текстрал тема ва гьанумур пикри.

Ч1урду ва х1арпру. Т1ивт1у ч1урду ва лавкьу ч1урду. Махъру т1айлану зумух ласун ва чичин бюхъаву.

Т1ирт1у х1арпру ва гайннул ккаккан байсса ч1урду.

Мукъурттиву аь, оь, я, ю, е, й х1арпру ишла даву.

Мукъурттил бак1рай аь, оь, э х1арпру чичаву, мукъурттил дянив (ларкьу х1арпирдал хъирив) аь, оь, э х1арпирдан к1анай я, ю, е чичаву.

Ларкьу х1арпру х1 ва гь, миннуч1а я, ю, е къачирчуну а, и, у х1арпру чичаву.

К1илийнусса х1арпру кк, пп, сс, тт, цц, чч, хьхь, хх ва миннул ккаккан байсса гуж бу ч1урду.

Аслийсса лакку х1арпру ва гайннул ккаккан байсса ч1урду.

Ь ва ъ, гайннул мяъна.

Оьрус мазрава лакку мазравун бувк1сса цаппара мукъурттил ахирданий ва дянив ь (к1ук1лу лишан) дишаву (пальто, учитель).

Лакку мукъурттиву т1ивт1у слограл хъирив ъ дишаву (бяъли, Муъминат).

Алфавит. Алфавитрал агьамшиву. Словарьданий аьркинсса махъру лякъин бюхъаву. Махъру алфавитрал низамрай чичаву так цалчинсса х1арп х1исав дурну.

Слог. Ударение. Махъру ххуттая ххуттайн ласаву. Махъру слогирттайх бач1аву. Махъру ххуттая ххуттайн ласаву, слогру х1исав бувну.

Предложение

Предложение гъалгъалул единица х1исаврай.

Гъалгъа предложениярттайх бач1аву. Предложениялуву щия ягу ссая гъалгъа т1ий буссарив бусласисса махъру лич1и баву. Суаллал кумаграйну предложениялувусса махъру кунниц1ун кув бавх1уну бушиву ккаккан бан бюхъаву (дак1них).

Предложениялул ахирданий к1унт1 ва ц1уххаврил лишан дишаву. Предложениялул бак1рай хъун х1арп дишаву.

Предложениялул члентру, цалчинмур даражалул члентру: подлежащее ва сказуемое. Предложениялул гьану.

Гъалгъалул бут1ри. Аьмсса характеристика.

Существительное. Существительнирал мяъна, суаллу. Аьмсса ва хасъсса существительнирду. Инсантурал ц1ардал, фамилиярттал, х1айвантран дирзсса ц1ардал, шагьрурдал, щархъал, неххардил ц1ардал бак1рай хъунмур х1арп чичаву. Гъансса ва къаршисса мяънарду дусса существительнирду.

Существительнирду аьдадирттайх баххана шаву (иширайну к1ул баву).

Глагол. Глаголданул мяъна, суаллу. Глагол лицордайх ва аьдадирттайх баххана шаву (иширайну к1ул баву). Глагол ч1уннайх баххана шаву

( иширайну к1ул баву). Гъансса ва къаршисса мяънарду дусса глаголлу.

Прилагательное. Прилагательнирал мяъна, суаллу. Прилагательнирал существительниращалсса дах1аву. Прилагательнирду гъалгъалуву ишла баву. Гъансса ва къаршисса мяъна дусса прилагательнирду.

Ц1анинк1анаймур. Ц1анинк1анаймунил мяъна, суаллу (иширайну к1ул баву).

Тикрал баву. 2-мур классраву лавхьхьумур тикрал баву.

Гъалгъа магьир баву. Текст ва махъру кунниц1ун кув бавх1усса гъалгъа.[1]

Ца темалия багьайсса суаллахьхьун (учитель ялув авц1уну) дак1них ва чичрулий жавабру дулаву.

Текст цирив к1улшиву. Бигьасса (150- ннийн бивсса махъру бусса) текстрал тема ва гьанусса мурад к1ул баву. Текстрал журарду (текст - бусаву, текст - ссал - дунугу сурат даву, текст - ссал - бунугу ялув цала пикри бусаву)

( к1ул баву). Абзацращал к1ул баву. Текстру сакин даврил ялув зун.

Сюжет дусса суратирттах буруглай, предложенияртту сакин даву. Учительнал кумаграйну дуллусса пландалийн бувну,пунктрая сакин хьусса, хъун дакъасса, махъ бусса) текстрал мурад чичаву, суратирттах буруглай, ягу ми дакъана.

Оьрч1ал цала т1урк1урдая (учительнал кумаг бувну) хавар сакин бан бюхъаву.

Марц1ну чичаву[2]

Мюрщи х1арпру чичаву ва ми кунниц1ун кув лач1ун дан лахьхьаву:

1) и, ш, г, п, т, р, у; 2) л, м, и, щ, ь ; 3) гь, п1, т1, ц1, ы; 4) о, оь, а, аь, ю; 5) ф, д, б, я; 6) с, е, е, ч, ч1, ъ, в; 7) э, х, х1, хь, хъ; 8) ж, з, к, к1, кь, къ.

Хъуни х1арпру чичаву ва гай лач1ун дан лахьхьаву.

1) И, Ш, Ц, Щ, Ч; 2) М, Л, А; 3) Ц1, Ч1, Аь; 4) О, Оь, С, З, Х; 5) Х1, Хь, Хъ; 6) Е, Е, Э, Я; 7) Ж, У, Н; 8) К, К1, Къ, Кь; 9) Ю, Р, В, Ф; 10) Г, Гъ, Гь; 11) П, П1, Т, Т1; 12) Б, Д.

Чичрулул бущи, чан-чанну т1ий, анавар буккан баву. Хъуними ва мюрщими х1арпру алфавитрал низамрай чичаву. Махъру ва предложенияртту ххуттайх саргъунну чичаву.

Дуклаки оьрч1ан к1улну бик1ан аьркинсса шинал мутталий правиларттал кумаграйну чичин зах1мат шайсса махъру: алх1ат, аьнак1и, аьрщи, ах1вал, Ах1мад, барх1, варакъи, вяркъу, вярч1у, гъи, гъилисса, дараччи, дежурный, доска, ляълу, мяъдан, нехъа, нюжмар, ппиринж, пальто, рах1, рах1му, рах1у, Саэд, стол, х1алу, х1илла, х1исилу, шаэр, эбрат, элму, Эса, эяллу, ят1улсса, ях1.

К1илчинмур класс къуртал буллалисса дуклаки оьрч1аясса т1алавшиннарду.

ФГОС - райн бувну, к1илчинмур класс къуртал буллалисса дуклаки оьрч1ан к1улну бик1ан аьркинссар:

Гьарца дуклаки оьрч1ан хасъсса (личностьныйсса ) результатру.

1.Цува Аьрасатнал х1укуматрал инсан ушиву к1улну бик1ан, цала Ватандалухлу, Аьрасатнал халкьуннахлу, тарихрахлу пахру бан к1улшиву х1асул даву. Дуклаки оьрч1ру ч1яву миллатру бусса Аьрасатнал обществалул яла ххуймунийн чул бивщуну, инсантал ххирану ва демократикийну тарбия баву.

2.Цува дуклаки оьрч1 ушиву бувч1уну ик1аву, дуккаврихсса гъира багьаву, ганил агьамшиву бувч1аву.

3.Цама инсаннал пикрилух, чил миллатрал тарихрах ва маданиятрах х1урмат буну уругаву х1асул даву.

4.Цала дуллалисса даврил, цала т1уллан жаваб дулун бюхъаву.

5.Анаварну даххана хъанахъисса ва оьрму хьхьич1унмай нанисса дуниялий ялапар хьун лахьхьин бюхъаву.

7.Цаярва хъуниминнащал ва ч1унарх1ал оьрч1ащал ч1умух, тагьарданух ва к1анттух бурувгун, ихтилат бан, маз лякъин к1улну бик1ан, бяс - ччаллу къабуллай, оьрмулул лич1и-лич1исса тагьарданух бурувгун, ххуллурду ляхълан.

8.Чурххан зарал бакъа, дуллалисса давриву цукунсса - дунугу ккаккияртту хьунну зузаву.

Метапредметныйсса результатру

1. Цайнура цала гихуннайсса к1улшиву ласун бюхъаву, дуккаврихсса, за к1ул баврихсса мотивация дик1аву.

2. Лич1и-лич1исса стильллайн дагьлагьисса текстру мяъна бувч1инсса куццуй дуккин бюхъаврил вардишру хьун дан. Буллалисса гъалгъалул мурадрах бурувгун, дак1них ва чичрулийну текстру сакин дан бюхъаву.

3.Лув ккаккан дурсса давуртту дан лахьхьин: лащан баву, анализ, синтез, журардайх бач1ин ва жям буллан, лавхьхьусса к1антту лич1и бан ва м. ц.

4.Гъалгъат1иманах вич1и дишин к1улну бик1ан, щищал - бунугу гъалгъа бан к1улну бик1ан. Гьарца инсаннал ссал - бунугу ялув цала - цала пикри бик1айшиву к1улну бик1ан. Цала пикри бусан, га бувч1ин бан бюхъан. Щищал - бунугу гъалгъа т1исса ч1умал диалограл ва монолограл журалийсса гъалгъа ишла бан бюхъаву.

5.Бяс бусса к1анттурдаву, циняннал мурадирттах бурувгун, т1айласса сант, ххуллу лякъин х1адурну ик1аву.

Предмет к1улшиврул результатру

1. Махъру ва предложенияртту каллиграфиялул чулуха т1айлану ва саргъунну чичаву.

2. Махъру ца ххуттая гамур ххуттайн ласайсса куццуй бач1аву.

3. Мукъурттил дянив аь, оь, э х1арпирдан к1анттурдай я, ю, е чичаву.

4. х1, гь х1арпирдач1а а, и, у чичаву.

5. Лакку мукъурттиву х1арп ъ чичаву: Муъминат, бяъли, Сяъдуллагь, Люъман.

6. махъ бусса предложенияртту дусса текстрал изложение чичаву.

7. Дуллусса темалун хасъсса предложенияртту сакин даву, гай чичаву.

8.Гъалгъалул бут1ри (существительное, глагол, прилагательное, ц1анинк1анаймур) ва гайннул мяъна, суаллу, дак1нихсса ва чичрулийнусса гъалгъалуву гай лякъин к1улну бик1аву.

9.Предложение гъалгъалул единица х1исаврай. Предложениялул гьану.

III класс

Хьхьич1ми классирттаву лавхьхьумур тикрал баву.

Гъалгъа. Предложение. Ч1урду ва х1арпру. Слогирттал, ч1урдал ва х1арпирдал анализ даврил вардишру тихуннайгу магьир даву.

Махъру, предложенияртту чичаврил вардишру ц1акь даву.

Гъалгъа. Текст.

Гъалгъа. Текст, ганил журарду. Текст бут1райх дач1аву, гайннун ц1арду дизаву.

Предложение

Предложение.

Бусай, ц1уххай, буюр бай предложенияртту. Оьвчай предложение.

Предложениялул цалчинмур даражалул члентру: подлежащее ва сказуемое. Предложениялул грамматикийсса гьану.

Предложениялул к1илчинмур даражалул члентру (ц1арду къакуну). Лархьхьусса грамматический формардащал предложенияртту сакин даву, гай лахъи даву.

Простойсса ва сложныйсса предложениярттая аьмсса к1улшиву дулаву.

Бавх1умахъру. Бавх1умукъурттил сакиншинна: гьанулулми ва гьанулул бакъами махъру. Бавх1умукъурттил ва предложениялувусса мукъурттил дянивсса дах1аву.

Махъ

Мукъул бут1ри. Мукъул мархлуя, суффиксрая ва дайлит1улия аьмсса к1улшиву дулаву.

Мархха ва дайлит1у. Ца мархлуя хьусса махъру. Ца мархлуя хьусса махъру лякъин бюхъаву.

Мукъул гьану. Мукъул гьану лякъин бюхъаву.

Суффикс. Мукъурттиву суффикс лич1и бан к1улшиву.

Гъансса мяънарду дусса махъру.

Ца мархлуя хьусса махъру ва мукъурттил формарду. (цач1у дирхьуну, ххал даву)

Лексика[3]

Мукъул лексикийсса мяъна. Ца мяъна дусса ва ч1яру мяъна дусса махъру. Мукъул т1айланнасса ва зунххисса мяънарду. Синонимру. Антонимру.

Гъалгъалул бут1ри.

Гъалгъалул бут1рая (существительнирая, прилагательнирая, глаголдания, числительнирая, ц1анинк1анаймуния) аьмсса к1улшиву дулаву.

Существительное. Существительнирал мяъна, суаллу. К1улши думи ва к1улши дакъами существительнирду. Хасъсса ва аьмсса существительнирду. Существительнирал аьдад. Существительнирду аьдадирттайх баххана шаву. Существительнирду падежирттайх баххана шаву ( иширайну к1ул баву).

Прилагательное. Прилагательное, ганил мяъна. Прилагательниран бишайсса суаллу. Прилагательнирал существительниращалсса дах1аву. Прилагательнирду гъалгъалуву ишла баву.

Числительное. Числительное, ганил мяъна. Числительнирал журарду. Числительнирду группардайх баххана шаву. Числительнирал существительниращалсса дах1аву.

Числительнирду чичаву.

Глагол. Глагол, мяъна, суаллу. Глаголданул ч1унну: ц1анасса, ларгсса, дуч1ант1исса. Глагол ч1уннайх баххана шаву.

Тикрал баву. 3-мур классраву лавхьхьумур тикрал баву.

Махъру кунниц1ун кув бавх1усса гъалгъа

Мукъурттищалсса даву. Лич1и - лич1исса гъалгъалул бут1равун багьайсса ца мархлуя хьусса махъру цач1ун баву.

Мяъналул чулуха гъансса ва цаннин ца къаршисса мяъна дусса махъру. Ца пикри бусласийни яла дурусну бакьаймур махъ лякъаву. Лархьхьусса правилардавун багьайсса махъру ва предложенияртту диктовкалий чичаву.

Текст. Текстрал журарду, текст бут1райх дач1аву, гайннун ц1арду дизаву.

Хъун бакъасса статьялул ц1уххай ва бусай предложениярттай чирчусса план даву, текстрал гьанумур мяъна к1ул даву.

Циняннан цач1уну дурсса пландалийн бувну,мукъуя сакин хьусса текстрал изложение чичаву.

Т1абиаьтраву хъанахъисса иширттая, х1айвантрая, лич1и - лич1исса суратирттая дуклаки оьрч1ан к1ул хьумунил гьанулий, предложенияртту ва хъуни бакъасса хаварду ляхъан баву. Цала иширттая ч1ивисса чагъар чичаву.

Марц1ну чичаву

Чичрулул гигиена дуруччаврил вардишру хъиннура ц1акь даву. Хъуними ва мюрщими х1арпру чичлачи баву, бигьаминнуя зах1матминнуйн бук1лай. Махъру, предложенияртту ва текст анаварну чичаврийн буч1аву.

Правилардал кумаграйну чичин зах1матсса махъру:

лелуххант, аьйкьусса, помидор, портрет, ттериххин, хьюмушиву, цинцилу, бит1икьукьу, буххьулу, дус, дуснакь, иссиявт, лунттубак1, ккуручай, рашхант, оьлуркъусса, ряхк1и, ккюрнут1ай, гамуш, маслих1ат, ца - цасса, арх1алчу, лаккучу, физкультура, лух1иц1ансса.

III класс къуртал буллалисса дуклаки оьрч1аясса т1алавшиннарду:

ФГОС - райн бувну, шамилчинмур класс къуртал буллалисса дуклаки оьрч1ан к1улну бик1ан аьркинссар:

Гьарца дуклаки оьрч1ан хасъсса (личностьныйсса ) результатру

1.Цува Аьрасатнал х1укуматрал инсан ушиву к1улну бик1ан, Ватандалухлу, Аьрасатнал халкьуннахлу, тарихрахлу пахру бан к1улшиву х1асул даву. Дуклаки оьрч1ру ч1яву миллатру бусса Аьрасатнал обществалул яла ххуймунийн чул бивщуну, инсантал ххирану ва демократикийну тарбия баву.

2.Цува дуклаки оьрч1 ушиву бувч1уну ик1аву, дуккаврихсса гъира багьаву, ганил агьамшиву бувч1аву.

3.Цама инсаннал пикрилух, чил миллатрал тарихрах ва маданиятрах х1урмат буну ургаву х1асул даву.

4.Цала дуллалисса даврил, цала т1уллан жаваб дулун бюхъаву.

5.Анаварну даххана хъанахъисса ва оьрму хьхьич1унмай нанисса дуниялий ялапар хьун лахьхьин бюхъаву.

8.Чурххан зарал бакъа, дуллалисса давриву цукунсса - дунугу ккаккияртту хьунну зузаву.

Метапредметныйсса результатру

1. Цайнура цала гихуннайсса к1улшиву ласун бюхъаву, дуккаврихсса, за к1ул баврихсса мотивация дик1аву.

5.Бяс бусса к1анттурдаву, циняннал мурадирттах бурувгун, т1айласса сант, ххуллу лякъин х1адурну ик1аву.

Предмет к1улшиврул результатру

1. Т1айласса хат1лий диктовкалий, мукунма доскалия ягу луттирая махъ бусса текст чичаву;

2.Грамматический разбор дан: а) мукъурттил бут1рал (мархха, суффикс, дайлит1у); б) гъалгъалул бут1рал (существительнирал, прилагательнирал ва глаголданул); в) предложениялул члентрал (цалчинмур даражалул члентру); предложениялул члентру кунниц1ун кув бавх1уну бушиву ккаккан баву.

3. Циняннал цач1у дурсса пландалийн бувну, махъ бусса изложение чичаву.

4. Гъалгъалул бут1рал ц1арду (существительное, прилагательное, глагол, ц1анинк1анаймур) ва гайннул хасиятру.

4. Предложениялул члентрал ц1арду - цалчинмур даражалулми

( подлежащее ва сказуемое), к1илчинмур даражалулми (журардан ц1арду къакуну).

5.Мукъул бут1ран ц1арду: мархха, дайлит1у, суффикс ва мукъуву гай лич1и баву.

IV класс

Тикрал баву. Хьхьич1ми классирттаву лавхьхьумур тикрал ва жям баву.

Махъ, предложение, текст гъалгъалул единицарду х1исаврай.

Ч1урду ва х1арпру. I - III классирттаву лавхьхьумур тикрал баву. Ч1урдал ва х1арпирдал анализ даву хъиннура магьир даву. Аслийсса лакку ч1урду ва х1арпру тикрал даву. К1илийнусса х1арпру ва гайннул ккаккан байсса гуж бу ч1урду.

Гъалгъа. Текст. Текстрая лавхьхьумур тикрал ва жям баву. Текстру сакин даву.

Синтаксис. Предложение.

Ялавайми классирттаву предложениялуя лавхьхьумур тикрал баву.

Предложениялул цалчинмур ва к1илчинмур даражалул члентру. Предложениялул гьану.

Предложениялул ца журасса члентру.

Ца журасса члентращалсса предложенияртту, ва, - гу союзру бусса ва союзру бакъасса. Ца журасса члентрач1а запятой дишаву. Ца журасса члентру бусса предложенияртту сакин дан к1улшиву.

Кут1а предложенияртту. Лахъи предложенияртту.

Цалчинмур даражалул члентрая хьусса кут1а предложенияртту к1илчинмур даражалул члентрал кумаграйну лахъи даву.

Сложный предложение. Сложный предложениялуясса аьмсса бусаву.

Сложный предложение простой предложениялуя лич1и дан бюхъаву.

Бавх1умахъру. Бавх1умукъурттия лавхьхьумур тикрал ва жям баву. Бавх1умукъурттил ва предложениялувусса мукъурттил дянивусса дах1аву.

Мукъул бут1ри. III классраву лавхьхьумур тикрал баву ва магьир баву. Ца мархлуя хьусса махъру лич1и бан бюхъаву.

Цач1ун був махъру (к1ул баву). Ч1явуну ишла байсса цач1ун був махъру чичин к1улшиву.

Гъалгъалул бут1ри. Гъалгъалул бут1рая лавхьхьумур тикрал баву.

Существительное. III классраву лавхьхьумур тикрал баву. Существительнирдал группарду (ур группа, дур группа, бур группа). Существительнирал падежру. Существительнирду ца аьдадрай падежирттайх баххана шаву (склонение). Существительнирду ч1яру аьдадрай падежирттайх баххана шаву. Существительнирдал падежирттал аьмсса дайлит1уртту (к1ирагу аьдадрай) гъаншиврул - л, дулаврил - н, бусаврил - хь, шаврил - ща, цач1ушиврул - щал.

К1анттул падежру (к1ул баву). К1анттул падежирттайсса существительнирду текстраву лякъин бюхъаву ва гай гъалгъалуву ишла баву.

Существительнирду журардайх бач1аву (затирттал, ххяххиярттал, х1айвантрал, инсантурал, т1абиаьтраву, обществалуву хъанахъисса иширттал ц1арду).

Существительнирду гъалгъалуву ишла бан бюхъаву.

Прилагательное. Прилагательное существительниращал бакъасса ч1умал существительное кунма падежирттайх баххана шаву. Прилагательнирал суффиксру - сса, - ма, - мур, - ми ( - сса - аьмсса, - ма, - мур - ца аьдад, - ми - ч1яру аьдад).

Ц1анинк1анаймур. Ц1анинк1анаймур. Хасъсса ц1анинк1анайми. Гай падежирттайх баххана шаву. Хасъсса ц1анинк1анайминнул лицорду: 1- мур, 2- мур ва 3 - мур. Ц1анинк1анайми текстраву лякъин бюхъаву ва гай гъалгъалуву ишла баву.

Глагол. Шамилчинмур классраву лавхьхьумур тикрал баву. Глаголданул мяълум дакъа формалуя аьмсса к1улшиву дулаву. Глаголданул ч1унну. Глаголлу лицордайх ва аьдадирттайх баххана шаву. Глаголлу группардайх баххана шаву (цивува группарду ккакканбувулт буми). Глаголлу существительниращал бах1ин к1улшиву. Лич1и - лич1исса давуртту ккаккан дуллалисса глаголлу лич1и бан к1улшиву.

Наречие, мяъна, суаллу. (иширайну к1ул баву). Наречияртту текстраву лякъин бюхъаву ва гай гъалгъалуву ишла баву.

Лавхьхьумур тикрал баву. Байбихьулул школалий лавхьхьумур тикрал баву.

Махъру кунниц1ун кув бавх1усса гъалгъа.

Мукъурттищалсса даву. Предложение сакин дуллалийни ца лархьхьусса ва цаннин ца къаршисса мяъна дусса махъру - существительнирду, прилагательнирду, глаголлу - язи бугьаву. Ца пикри бусласийни аьркинми, к1анин багьми махъру язи бугьаву. Гъалгъалуву гайва - гай махъру ч1явуну ишла баву духлаган даву.

Гъалгъа. Инсаннал оьрмулувусса гъалгъалул агьамшиву.

Текст. Текстрал тема ва гьанусса пикри. Текстрал сакиншинна

( композиция).

Бувккумунил план даву. Классраву циняннал цач1у дурсса пландалийн бувну, текстрал изложение даву ( диялсса ягу кут1а дурсса ).

Марц1ну чичаву

Ца ща бусса ххуттайх чичаву. Чичру анавар даврил чулухуннайсса давуртту: а) ка вардиш даву мурадрай кьасса аьшру дихьлахьи баву; б) бартканил ва к1иссурттал зузаву бигьа ва саргъун хьун даву мурадрай, мюрщи х1арпру лич1и - лич1исса аьщурдиц1ун лач1ун дурну, чичлачи баву; в) мюрщи х1арпру кунниц1ун кув ва лич1и - лич1исса аьщурдиц1ун лач1ун дурну, чичаву; г) хъуни х1арпру мюрщи х1арпирдац1ун лач1ун дурну, алфавитрал низамрай чичаву; д) мукъурттиву хъуними ва мюрщими х1арпру кунниц1ун кув лач1ун дурну, чичаву.

Цаппара махъру, предложенияртту анаварну чичаву, диктовкалий чичаву.

Чичин зах1мат хъанахъисса махъру чичин к1улну бик1аву.

Арх1ал, аьлтта ч1алай, баранбалну, багьт1ат1 хьун, байчу щун, гьаен дан, к1урадаен, дак1 оьзан, костюм, театр, хозяйство, шифер, бювкьу - аьй, самолет, автобус, портфель, линейка, кино, шкаф, пюрун, шичча - тичча, гичча, хьхьич1ва - хьхьич1, кунц1а, к1ияма, к1ихьра, ненттабак1, няй-няй т1ий, нину-ппу, куннач1а кув, цаннащал ца, т1урщилухсса, орден, председатель, радио, район, сочинение, изложение, телеграмма, стакан, паччах1лугъ, х1укумат, бухгалтер, телефон, съезд.

IV класс къуртал буллалисса оьрч1аясса т1алавшиннарду:

Гьарца дуклаки оьрч1ан хасъсса (личностьныйсса ) результатру.

2.Цува дуклаки оьрч1 ушиву бувч1уну ик1аву, дуккаврихсса гъира багьаву, ганил агьамшиву бувч1аву.

3.Цама инсаннал пикрилух, чил миллатрал тарихрах ва маданиятрах х1урмат буну ургаву х1асул даву.

4.Цала дуллалисса даврил, цала т1уллан жаваб дулун бюхъаву.

5.Анаварну даххана хъанахъисса ва оьрму хьхьич1унмай нанисса дуниялий ялапар хьун лахьхьин бюхъаву.

8.Чурххан зарал бакъа, дуллалисса давриву цукунсса - дунугу ккаккияртту хьунну зузаву.

Метапредметныйсса результатру

1. Цайнура цала гихуннайсса к1улшиву ласун бюхъаву, дуккаврихсса, за к1ул баврихсса мотивация дик1аву.

2. Лич1и-лич1исса источникирттаву информация лякъин бюхъаву: жура-журасса пособиярттаву, Интернетраву. Аьркинсса информация лякъин, бат1ан, ганил анализ дан ва га аьркинсса куццуй ишла баву.

3.Лич1и-лич1исса стильллайн дагьлагьисса текстру мяъна бувч1инсса куццуй дуккин бюхъаврил вардишру хьун дан. Буллалисса гъалгъалул мурадрах бурувгун, дак1них ва чичрулийну текстру сакин дан бюхъаву.

4.Лув ккаккан дурсса давуртту дан лахьхьин: лащан баву, анализ, синтез, журардайх бач1ин ва жям буллан, лавхьхьусса к1антту лич1и бан ва м. ц.

5.Гъалгъат1иманах вич1и дишин к1улну бик1ан, щищал - бунугу гъалгъа бан к1улну бик1ан. Гьарца инсаннал ссал - бунугу ялув цала - цала пикри бик1айшиву к1улну бик1ан. Цала пикри бусан, га бувч1ин бан бюхъан. Щищал - бунугу гъалгъа т1исса ч1умал диалограл ва монолограл журалийсса гъалгъа ишла бан бюхъаву.

6.Бяс бусса к1анттурдаву, циняннал мурадирттах бурувгун, т1айласса сант, ххуллу лякъин х1адурну ик1аву.

7. Предметирттал дах1аву ккаккан дуллалисса агьамми дурч1алартту лахьхьаву.

Предмет к1улшиврул результатру

1. Лархьхьусса орфограммарду ва чичрулул лишанну дусса 60-70 махъ бусса текст диктовкалий чичаву.

2. Мукъувусса ч1урдал разбор дан, мукъурттиву ч1урдал ва х1арпирдал ккал ккаккан дан; мукъул бут1рал (мархха, суффикс, дайлит1у) ва гъалгъалул бут1рал разбор дан (существительнирдал - аьдад, падеж; прилагательнирдал - падеж, аьдад; глаголданул - аьдад, ч1ун; синтаксисрал - предложениялуву мукъурттил дах1аву ккаккан дан, подлежащее, сказуемое ва к1илчинмур даражалул ( ц1а къакуну) ккаккан баву.

3. Гъалгъалул бут1ран ц1арду (существительное, прилагательное, глагол, числительное, ц1анинк1анаймур) ва гайннул хасиятру.

4. Предложениялул члентран ц1арду - цалчинмур даражалулми

( подлежащее ва сказуемое), к1илчинмур даражалулми (журардан ц1арду къакуну).

5.Мукъул бут1ран ц1арду: мархха, дайлит1у, суффикс.

6. (70-80 махъ) бусса текстрал изложение чичаву.

7. Цала оьрмулуву хьусса иширая хавар сакин баву, чичаву.

«Лакку мазрал» дарсирдал махъ дуллан ккаккан дурсса даву

Учительнаща дарсирдал махъ дуллан бюхъант1иссар жура-журасса давуртту:

1) лакку мазрал кружок;

2) факультатив;

3) лич1и-лич1исса кьинирдан хас дурсса утренникру: «Ниттихъал байран», «Ххувшаврил кьини»; лич1и-лич1исса темардайнсса утренникру: «Лакрал букварь къуртал баврин хас дурсса байран» («Праздник букваря»), «Маз - му миллатрал ххазинар», «Лакку к1ану» ва ц.;

4) конкурсру, олимпиадартту, выставкартту;

5)ч1ирал кказит итабакьаву. Ч1ирал кказитру, лич1и-лич1исса темардайн бувну, итабакьин буч1иссар: «Лахьхьи вила ниттил маз», «Т1абиаьт ххиранан», «Агь, ттул буттал к1ануй, Лакку билаят», «Жул шяраваллил лагмасса к1анттурдан ц1арду» ва м. ц.

Лув ккаккан данну цаппара темарду учительнал дарсирдал махъ дуллалисса давриву ишла дан бюхъайсса. Вай дакъассагу учительнаща бюхъант1иссар жура - журасса темарду ларсуну, гай ххал дигьин.

1. «Интту ардай т1ут1аяр, т1ут1айх бичу, ниттил маз!

Зунттай зяй щаращаяр, зяй-зяй т1ут1у, ниттил маз!» (А. Гъапуров)

2. «Агь, ниттил маз, вил ц1анил марц1шиву, гъелишиву…» (Х1.Муркъилинский)

3. «Маз - му миллатрал ххазинар»

4. Лакрал учалартту ва лувлякъурду.

5. Лакку мазравусса синонимру ва гай гъалгъалуву ишла баву.

6. Лакку мазравусса антонимру.

7. Бух хьусса мукъурттих лугланну.

8. Жула к1анттурдал ц1арду к1ул данну.

9. Жуч1ара ххяххайсса ххяххиярттан ц1арду к1ул данну.

10. Магьраву лабивк1сса прилагательнирду лякъинну.

Литературийсса буккаврил программа

I - IV классру

Бувч1ин бай чичру

Программа сакин дуллалийни гьануну ларсъссар «Федеральный государственный образовательный стандарт начального общего образования» ва «Лакку мазрал ва литературийсса буккаврил байбихьулул классирттансса программарду» (Мах1ачкала, 2009).

Литературийсса буккаву байбихьулул школалий ца яла агьанмур предметну хъанахъиссар. Ганил дуклаки оьрч1ру магьир литературалущал к1ул байссар ва буккаврил бюхъурду магьир бавривугу хъуннасса агьамшиву дуссар. Буккаврил агьамсса к1ану дуклаки оьрч1ал за лахьхьавриву бугьлагьиссар. Агар оьрч1ан ххуйну буккин к1улну бухьурча, ганаща цайми предметругу ххуйну лахьхьин бюхъайссар. Буккаврил мукунма агьамсса к1ану бугьлагьиссар гъалгъалул цайми журарду (вич1и дишаву, чичру, гъалгъа баву) магьир бавривугу.

Литературийсса буккаврил курсирал мурадну хъанахъиссар оьрч1ру магьир литературалущал к1ул баву, гайннан магьир литературалул сипатру дурч1ин даву. Мунил кумаг бант1иссар магьир литературалул произведение гьарца чулуха аьч, ч1алач1и бан. Литературийсса буккаврил дуклаки оьрч1аву магьир литературалул чулухунмай гъира бутан, произведенияртту буккаврихсса шавкь рутан кумаг байссар.

Литературийсса буккаврил программалувусса материалданул дуклаки оьрчIан лагма-ялттусса оьрму кIул бан, оьрчIаву тIул-тIабиаьтрал чулухуннайсса, ниттил мазрахсса ччаву цIакь дан кумаг бантIиссар.

Магьир литературалул произведенияртту буккаврил мурад хъанахъиссар дуклаки оьрчIру магьир литературалущал кIул баву, гивусса сипатру дурчIин даву, произведенияртту буккаврих шавкь рутаву. Произведенияртту ххал бигьин аьркинссар гьарца чулуха: мазрал, гиву дуллусса сипатирттал, ганил бючIаврил, авуршиврул чулухагу, авторнал цала бусан, бувчIин бан ччимур цуксса усттарну, пасихIну ва дакIний личIанну увкуну бурив ― чичул цала пикри, адав-инсапрал чулухунмайсса масъалартту цукун щаллу бувну бурив бувчIин бан.

Буккаврил программалул бувчIин буллай бур учебникирттал мурад, миннул сакиншинна ва дарс дишаврил кьяйдарду. Ми цимурца художественный ва литературоведческий принципрацIун дархIуну дикIан аьркинссар. Художественно-эстетический принципрал буккинсса произведенияртту хъинну хъирив лавну личIи бан аьркиншиву тIалав буллалиссар. Мунийн бувну дуклаки оьрчIан буккин ккаккан бувсса произведенияртту бикIан аьркинссар хъунмурчIин художественныйсса. Дуклаки оьрчIан бувчIин бан аьркинссар гай магьирлугърал произведениярттал ххуйшиву. Хъуннасса къулагъас дан аьркинссар мукьух, га ккаккан байссар произведениялул сипатирттал системалуву.

Байбихьулул классирттаву магьир литературалул произведениялул пасихIшиврул ярагъуннил анализ дан чара бакъа литературийсса принцип ишла дуллан аьркинссар.

Произведениялул анализ дуллалийни, га принципрайн бувну, ганил чулухунмайсса пикри, художествалул форма, тема, гикку гьаз бувсса масъалартту, адав-инсапрал композиция дуклаки оьрчIан бюххансса ва бувчIинсса формалий ххал дигьин аьркинссар.

Байбихьулул классирттал курсирал чичул творчествалул лялич1ишиву ххал къадигьайссар. Оьрч1ру му даражалийн уттигу биян бувассар, миннан му бувч1ингу зах1матссар: миннал уттигу я ч1явусса луттирду къабувкссар, я мукун жям дуллалисса х1асиллу щаллу дуллансса оьрмулул опыт бакъассар. Хъунисса ца-цасса произведенияртту лахьлай байбишайссар, чан- чанну т1ий, лавайми классирттаву, яни ххюйлчинмур классрава байбивхьуну. Байбихьулул классирттаву так мунинсса х1адуршин щаллу дайссар, ми байбихьулул ва лавайми классирттал дянив чачунсса дах1аву дик1ан аьркинссар.

Байбихьулул классирттал программа дурган дурну дуссар дуклаки оьрчIал гъалгъалул вардишру магьир даврил чулухуннай. Ва масъала байбихьулул школалий яла агьанмур масъалану хьанахъиссар ― лахъну буккаврия цавува цала буккаврийн бучIайссар.

Буккаврил дарсирдай дуклаки оьрчIан литературоведениялул чулухуннайсса хьхьичIра-хьхьичIсса кIулшиву дулайссар, авторнаясса чан-кьансса кIулшиву ― чичуя, произведениялул темалуя, ганил журалуя, фольклорданул произведениярттал ляличIишивруя (басня, магьа, ссигъа, лувлякъу, учала ва м. ц.). Оьрч1ан дулун аьркинссар шеърирдал, мазрал пасих1шиврул ярагъуннил х1акъиравусса к1улшиву: метафоралуя, лащан баврия, олицетворениялуя, шеърирдал ритмалуя ва рифмалуя ва м. ц.

Литературийсса буккаврил курсирал укунсса гьанусса масъалартту бак1райн буккан бан аьркинссар:

— оьрч1ан магьир литературалул произведенияртту биялну бувч1инсса бюхъурду хьун бан кумаг бан, бувккумур бюххайсса даража хьун бан;

— дуклаки оьрч1ал шеърирду лаласун бюхъаврил гьунар итххяххан бан;

— луттирду буккаврих шавкь рутан;

—оьрч1аву оьрмулухсса, т1абиаьтрахсса, гайннул ххуйшиврухсса асарду хьун буллан;

—лич1и-лич1исса журардал произведенияртту ккалакки буллай, дуклаки оьрч1ал пикри гьарта ва магьир бан, к1улшиву курт1 дан;

—лич1и - лич1исса текстирдал журардащал оьрч1ру к1ул бан ва гайннуха зун лахьхьин бан;

—дуклаки оьрч1ал маз авадан хьунсса шарт1ру щаллу дуллан, гайннал гъалгъалул вардишру магьир дуллан.

Гьарца классраву буккаврил дарсирдай хъунмур ч1ун (30-35минут) буккаврин ва текстращалсса даврин харж дайссар. Ккаланнин хьхьич1 байсса ихтилат, бувккумунил жям дайсса махъ 5-8 минутраяр хъунмасса къабик1айссар. Миннул содержаниягу дарсирдай ккалаккисса текстрац1ун дарх1усса дик1ан аьркинссар.

Буккаврил т1айланнасса дах1аву дуссар мазрал программалул бут1ращал, мукунна байбихьулул классирттаву дишайсса цаймигу дарсирдащал.

Программалуву ккаккан дурну дуссар буккаврил темарду ва оьрчIал дакIнихсса ва чичрулийнусса гъалгъа магьир буллансса давуртту, мукунна буккаврил вардишру хIалли-хIаллих хьхьичIуннай дуллалисса давурттал чулухуннай цукунсса тIалавшиннарду дан аьркинссаривгу.

Буклакимур дуклаки оьрчIал, цалнияр цал тIий, пикрилувун ласаврил ва му мяъналух бурувгун нани баврил ялув учитель мудан авцIуну икIан аьркинссар.

Мукьрагу дуккаврил шинал мутталий оьрчIаву бувчIинну, тIайлану, анаварну буккаврил вардишру цIакь хъанахъиссар.

«Литературийсса буккаву» т1исса предметрал аьмсса характеристика

Филология т1исса образовательный областьравун духлахисса предметирттаву литературийсса буккаврил хъинну хъуннасса агьамшиву дуссар ва ганил кумаг байссар лув ккаккан бувсса масъалартту щаллу бан:

1.Ххуйну буккин лахьхьин ва ккалаккимур бувч1лан; луттирахсса ва га буккаврихсса гъира багьан бан.

Буккаврил агьамсса к1ану дуклаки оьрч1ал за лахьхьавриву бугьлагьиссар. Агар оьрч1ан ххуйну буккин к1улну бухьурча, ганаща цайми предметругу ххуйну лахьхьин бюхъайссар. Буккаврил мукунма агьамсса к1ану бугьлагьиссар гъалгъалул цайми журарду (вич1и дишаву, чичру, гъалгъа баву) магьир бавривугу.

1-4 классирттаву литературийсса буккаву лахьхьаву хъанахъиссар дянивмур даражалул школалий литература лахьхьаврил цалчинмур шач1ану. Вай классирттаву лахъну ва цавува цала буккаврил вардишру хьун даврищал арх1ал дуклаки оьрч1ру лавайми классирттаву литература лахьлангу х1адур буллалиссар.

2.Дак1них ва чичрулийну гъалгъа бан, щищал - бунугу ихтилат бан лахьхьаву.

Шикку дуклаки оьрч1ан луттирдащал зун, гиву цанма аьркинмур лякъинсса к1улшиву магьир дуллалиссар. Гайннан лич1и-лич1исса журалул текстру дуккин, гиву бумур бувч1ин, лаласун к1улшиву магьир дайссар. Дуклаки оьрч1ру, бувккусса произведениярттайн бувну ва цала оьрмулуву хьумур, хьунабавкьумунийн бувну, лич1и-лич1исса диалогирттаву гьуртту хъанан бик1айссар, гайннал цала бувккумуния бусайссар. Оьрч1ру словарьдай, энциклопедиярттаву, справочникирттаву аьркинсса информация ляхълан бик1айссар, жура-журасса ишру, затру цач1у дирхьуну ххал дуллай, гайннуя буслан бик1айссар.

3.Дуклаки оьрч1ру магьир литературалул чулухунмай эстетически буругаву дуну тарбия баву.

Ва масъала щаллу буллалийни дуклаки оьрч1ан бувч1ин бан аьркинссар литература - му магьирлугърал лялич1исса жура бушиву, ганил художественныйсса агьамшиву к1ул дуллан ва бигьасса журалий ганил пасих1шиврул ярагъуннил анализ дуллан. Дуклаки оьрч1аву, га цайми магьирлугърал журардащал ( музыкалущал, театрданущал, сурат даврищал ) цач1у дирхьуну, ххал дуллансса бюхъурду хьун байссар, гиву ца лавхьхьусса к1антту ва лич1ишивуртту ккаккан дуллан лахьхьин байссар.