Рабочая программа учебного курса «Мокшанский язык» (стр. 2 )

Штоба ученикне лацкас тонадольхть грамматическяй и лексическяй факттнень и явлениятнень явфнема, грамматическяй правилатнень корхтамста и сермадомста тевс ноляма, учительти эрявихть кочкамс работань стама метотт и приёмт, конат максольхть возможность аф аньцек лятфтамс тонафнеф материалть, но и пуроптомс сонь фкас, крхкалгофтомс, кемокстамок тянь мархта иттнень содамошиснон. Тяфтамкс можна лувомс грамматическяй (фонетическяй, морфологическяй, синтаксическяй) разборть, кялень факттнень фкя-фкянь мархта сравниндамаснон, выводонь и обобщениянь тиемать, и ст. тов. Но сембось тя эряви тиендемс стане, штоба ученикненди аф стака улель ванондомс валхнень и форматнень мельге и азондомс эрь фактть колга эсь мяльснон.

Кода повторениять ётафтомста, стане и од материалть тонафнемста пяк лезды техническяй средстватнень тевс нолдамасна, сембода пяк магнитофонть.

Техническяй средстватнень тевс нолдамасна тонафтсыне ученикнень: 1) выразительнайста лувома; 2) валхнень, валонь сочетаниятнень и предложениятнень правильнайста азома; 3) корхтамать содержаниянц шарьхкодема; 4) связнайста корхтама и сёрмадома.

Магнитафоннай лентаса ученикнень корхтамаснон сермадомац, сонь кулхцондомац и анализоц няфтсазь, кодама эльбятькст ноляй тя или тона тонафнись корхтамста и максыхть возможность петемс ня эльбятькснень.

Иттнень синцень корхтамдост башка магнитофонть вельде синь кулхцондсазь дикторхнень, артисттнень, а стане жа учительть корхтаманц.

Сембода важна кулхцондомс дикторхнень, учительть или цебярьста луви учениконь корхтамать программань тяфтама разделхнень повторяндамста и тонафнемста:

Интонациясь простой предложенияса (азондомань, кизефтемань, кошардомань и восклицательнай предложенияса), интонационнай средстватнень мархта простой предложениять различнай пяльксонзон явфтомасна. Однороднай член мархта предложениятне и синь интонированиянь особенностьсна (перечислительнай интонациясь, сопоставлениянь интонациясь; обращения мархта предложениятнень интонациясна). Виде и косвеннай корхтамать интонационнай особеностенза и лиятне.

Магнитофонть лезксонц вельде можна ётафтомс пяк лама различнай упражнения, няфтьсаськ кой-конатнень синь эздост:

Кулхцондость магнитофоннай лентас серматф предложениятнень и связнай тексттнень, мусть синь эсост тонафневи правилатнень лангс примерхнень. Лятфтамс дикторть мельге башка предложениятнень, азондость связнай текстть содержаниянц. Отвечада дикторть (учительть) кизефксонзон лангс. Кулхцондость учебникса максф текстть, башка мяль шарфтода перечислениянь интонациять лангс и ст. тов.

Пяк лезды магнитофонць фонетикать тонафнемста, штоба машфтомс иттнень устнай корхтамастост пяк сидеста васьфневи тяфтама эльбятькснень:

Башка звукнень аф яснайста, аф чёткайста азомасна (тя лисенди шабатнень корхтамань органцнон аф правильнайста работамаснон сюнеда).
Башка валхнень, валонь сочетаниятнень и предложениятнень кенордазь азомасна (туфталхне тяса разнайхть, например, шабать мялец азондомс сяда курок кодамовок няйф или кульф интереснай явлениянь колга; сон кенордай, «нилендьсыне» валхнень, валонь пктнень, аф тиенди паузат предложениятнень ёткса и синь потмосост). Предложениять эса эрь валть башка морафтомац (сидеста ученикне текстть лувомста или мезеньге колга азондомста эрь валть ёткса тиендихть пяк кувака паузат, конатнень пингста лятфнихть или арьсихть сянь колга, мезе эряви азомс сяда тов; лияста шабатне нльне азондыхть лишнай звукт или аф эрявикс валхт). Звукнень лиякс азомаснон вельде литературнай кяльть орфоэпическяй норманзон коламасна, например: эзем, эши, эцемс литературнай валхнень вастс корхтайхть: язем, яши, яцемс; ведь, вете, пе, ве, веле медь литературнай валхнень вастс ноляйхть тевс видь, вите, пи, ви, виле, мидь диалектнай валхт.

Магнитофонть тевс нолдазь сембе ня эльбятьксне тёждяста петевихть.

Башка мяль шарфтома учительти «Фонетика, графика и орфография» разделть тонафнеманцты. Кода няфнесы практикась, сембода лама эльбятькс сёрмадомстонга шабатне ноляйхть фрнетическяй явлениятнень аф содамаснон сюнеда (кайги и аф кайги согласнайхнень сермадомасна, ляпе знакть эрявикс вастс путнемац, ингольце рядонь а-ть провописанияц). Сяс фонетикать коряс систематическяй занятиятне ётафнемат стане, штоба синь лездольхть ученикнень орфографическяй навыкснон касомаснонды.

Ученикненди эряви няфтемс тонафневи фонетическяй явлениятнень практическяй значенияснон. Башка эряви толкавамс, што аньцек фонетикаса получаф содамошитнень вельде можна цебярьста тонафнемс лексикать и морфологиять, што кяльть тя разделонц содамац лезды орфографиять тонафнеманцты, што звукнень тиевомаснон колга правилатнень апак шарьхкотть стака ули тонадомс литературнай произношениянь норматнень.

Лиякс азомс, фонетикать тонафнемста учительть основной задачанза стапт: 1) лездомс ученикненди сяда парста шарьхкодемс фонетикать роленц ломаттнень фкя-фкянь мархта общенияса; 2) максомс иттненди правильнай понятия звукнень и букватнень (сёрмаса звукнень няфтемаснон) колга; 3) шарьхкодевиста азондомс звукнень тиевомаснон; 4) крхкалгофнемс шабатнень содамошиснон гласнайхнень и согласнайхнень, ударениять, слогть, ляпе и калгода, кайги и аф кайги согласнайхнень и алфавитть роленц колга; тонафтомс ученикнень словарьхнень мархта работама; 5) знакомондамс синь орфографическяй и орфоэпическяй правилатнень мархта; няфтемс иттненди, што фонетикась лезды правильнайста шарьхкодемс валть строениянц и значениянц; тонафтомс синь звукть и буквать ёткса аф фкаксшитнень содама и кошардомс аф юкснемс сянь колга, што сидеста валхне сермадовихть аф стане, кода азовихть, и, меколанкт, корхтамста аф фалу эряви ваномс сянь лангс кода сёрматф; 6) аф эряви юкснемс, што инь оцю аф фкаксшись литературнай корхтамать и диалекттнень ёткса – фонетикать эса; 7) фонетикась и графикась 5-це класста меле специальна аф тонафневи, хотя орфографическяй и орфоэпическяй эльбятькснень ламосна эрь класса лисенди фонетикать кальдявста содаманц сюнеда. Сембось тя корхтай сянь колга, што фонетикать тонафнеманцты эряви сянь колга, што фонетикать тонафнеманцты эряви шарфнемс оцю мяль аф аньцек 5-це класса, но и сембе класснень эса родной кялень урокса.

Эряви азомс, што аф аньцек начальнай класса ётаф материалть лятфтамста, но и фонетикать тонафнемста, ученикне сидеста кармайхть васьфнема содаф материал, мезсь максы учительти возможность урокста урокс крхкалгофнемс иттнень содамошиснон, касфнемс, кемокснемс и цебярьгофнемс синь корхтамань и сермадомань навыкснон. Вдь кода ётаф материалть лятфтамста, стане фонетикать и лексикать тонафнемста учительть основной задачац – иттннень устнай и письменнай корхтамаснон цебярьгофтомац. Тя тиендеви: а) орфоэпиянь и выразительнайста морафтомань навыкнень касфтомаснон лангса работаса; б) иттнень валонь запасснон козякофтомаса; в) предложениятнень строямаснон колга правилатнень содамаса; г) связнай корхтамань навыкнень касфтомаса.

Устнай и письменнай корхтамать касфтомаса работась туй лац эста, кда учительсь правильна шарьхкодьсы, мезе стамсь устнай корхтамась и мезе стамсь письменнайсь, мезень пяльде синь фкат и мезень пяльде аф, и кодама ётксост соткссь.

Устнай корхтамась шарьхкодеви пилетнень мархта кулезь, кулхцондозь, а письменнайсь – сельмоса няезь. Устнай корхтамась аф сяшкава полнай, сяс мес корхтайсь кой-коста эсь мялензон азондсыне аф аньцек валса, но и кядензон и прянц, шаманц мархта. Устна корхтамаста валхне ащихть сяда свободнайста, сяс мес азондысь корхтаманц тисы сяда точнайкс, сяда шарьхкодевикс эсь вайгяльсонза, смыслас коре аерфнесыне сяда важнай валхнень, логическяй центратнень.

Устна корхтама тонафнемать задачац ся, штоба тонафтомс ученикнень устна эсь мысляснон лиянди азондома, тя корхтамась должен улемс лиянди шарьхкодеви, яснай, выразительнай.

Устнай корхтамась веши: звукнень правильнайста азондомаснон, валхнень азомста орфоэпиянь норматнень ванфтомаснон (сембе, но аф симбе, ведь но аф видь, корхтайхть, но аф корхташть, вете, но аф вите), предложениять выразительнайста лувоманц, лиякс мярьгомс, правильна логическяй ударениянь и паузань тиемать, корхтамаста аф эрявикс валхнень ёрямаснон (клее, мле, мон аля, мон бать и лият), эсь мыслятнень прясот кирдема и фкя-фкянь мельге апак лотксек синь азондома маштомать.

Ученикть эрь устнай ответоц ащи упражнениякс устнай корхтамати. Сембода сидеста ня упражнениятне васьфневихть кайгиста книгань морафтомста (сонць кайгиста морафтомась, кизефксненди ответтне, морафтфть азондомац).

Ученикть азксонза природать мельге эсь ванондоманзон колга, эсь переживаниянзон колга, картинкать коряс устнай ответонза – нят стане жа устнай корхтамань упражненият.

Аф эрь сочинениясь должен шумордавомс письменнай работаса, но эрь письменнай изложенияда или сочиненияда инголе ётафневи устнай работа.

Основакс, фундаментокс корхтама маштомать касфтоманцты ащи иттнень валонь запасснон козякофтоманц лангса работась. Кда ученикть запасса аш сатомшка валоц, тейнза аф тиеви цебярь предложения, лац-ряц аф азови эсь мялец.

Валхнень лангса работать задачац ащи сянь эса, штоба шабась тонадоль кода можна сяда мазыста сон машты корхтама. Сяс сембе мокшень кялень урокнень эса ётафнема тонафнихнень мархта валхнень лангса оцю работа.

Эрь урокть ётафтомста учительти эряви фалу мяляфтомс сянь, што аш кода кадондомс ученикненди апак азонтт фкявок аф шарьхкодеви вал или валонь группа. Шабась лияста аф шарьхкодьсы инь простой валть значениянц. Тя сяс, месс кальдявста вятеви работась валть значениянц шарьхкодеманц коряс. Кда учениксь изь лотка од валть лангса, аф кемоста шарьхкодезе сонь видексонь смысланц, ся валсь лия предметтнень эсовок ляткшни шобда вастокс. Сяс учительти эряви фалу ваномс тянь мельге, эста сяда кржа ляды апак шарьхкотть валда, а значит и эльбятькстовок. Смыслань ширде содаф валхне сяда курок сувайхть шабатнень активнай словарезост. Сяс сембе урокнень эса азонкшневихть аф шарьхкодеви валхнень значениясна, тяка ёткть учительсь мярьги, штоба иттне сувафтолезь ня од валхнень сяда товолдень работазост. Тяфта валом-валом козякофневи ученикть кялец валонь ширде.

Словарнай работать ётафтомс учебникса максф сатомшка лама упражнения кода повторениянь разделса, стане и фонетикать и лексикать тонафнемста. Эрь параграфть эса, аф ваномок темать лангс, ули материал валть, валонь сочетаниять, предложениять, а стане жа связнай корхтамать лангса работань вятемс. Словарнай работать ётафтомс учебникса максф упражнениятне пцтай сембе лексико-грамматическяйхть, синь лездыхть ученикнень грамматическяй навыкснон касомаснонды и валонь запасснон козякодоманцты.