Монгол Улсын Их Хурлын долоо дахь удаагийн сонгуулиар байгуулагдсан Улсын Их Хурлын анхдугаар чуулганы 2016 оны 7 дугаар сарын 29-ний өдөр /Баасан гараг/-ийн нэгдсэн хуралдааны гар тэмдэглэл (стр. 30 )

Гуравт нь, одоо энэ нэгэнт хийгээд өнгөрсөн бүх ажлуудаасаа болж бүтэж байгаа зүйлийг нь үргэлжлүүл. Өнгөрсөн Засгийн газрын үед хийсэн сайн сайхан юм байвал тэрийг нь ард түмэндээ хэлж ярьж ойлгуул. Эд нар ийм юмыг эхлүүлж, энийг нь бид үргэлжлүүлэх ёстой. Энэ дээр нь бид харин энэ алдааг нь засч залруулах ёстой. Ийм зүйлийг дахин давтах ёсгүй гэдгийг анхааруулж хэлж ярьж ингэж явж чадах юм бол бид нар сайн ажиллаж чадна гэж ингэж бодож байгаа.

Тэгээд энэ Засгийн газрынхнаасаа эцэст нь хүсэх зүйл юу байна вэ гэхээр шударга байгаарай, шуурхай байгаарай, нээлттэй байгаарай ард түмэндээ. Ингэхэд ард түмэн та бүхнийг дэмжиж ажиллаж чадна.

Ахин хэлье. Одоо бага ярьж их хийх цаг болсон шүү. Энийг манай энэ Засгийн газрынхан чадна гэдэгт би огтхон ч эргэлзэхгүй байгаа. Монголын ард түмэн ч гэсэн та бүхэнд асар том итгэл найдварыг хүлээлгэж байгаа. Улсын Их Хурлын зүгээс чадах бүхнээрээ Засгийн газраа дэмжиж ажиллана гэж ингэж бодож байна.

М. Энхболд: - Д. Хаянхярваа дарга үг хэллээ. М. Оюунчимэг гишүүн асуулт тавьж, үг хэлье.

М. Оюунчимэг: - Д. Хаянхярваа гишүүн сая маш чухал санааг хэллээ. Үнэхээр манай шинэ сайдууд бодит байдалд эдийн засаг нөхцөл байдал ямар байгаа юм бэ гэдгээр Ерөнхий сайд та өөрөө ч чуулганд нэг бодит мэдээллийг хийвэл зүгээр болов уу гэж бодож байна. Сангийн яамны мэдээгээр одоо 6 сард төсвийн алдагдал 1.2 гээд байгаа хэрнээ 2 их наяд гээд байгаа хэрнээ бодит байдал дээр энэнээс 2, 3 дахин их алдагдалтай байна гэсэн мэдээлэл байгаад байгаа шүү дээ. Цалин хөлс, тэтгэвэр тэтгэмж тавих бараг чадах нь уу, үгүй юу гээд. Тэгэхээр энд нэг бодит хариулт өгөөрэй гэж танаас хэлэх байна.

Тэгээд би П. Ганхүү нэр дэвшигчийн хувьд үнэхээр улс төржөөгүй нэр цэвэр. Тэгээд салбартаа нөгөө мерит зарчмаар мэргэжилтнээс аваад хэлтсийн дарга, тэгээд ингээд яг зарчмаараа ингээд явж байгаа ийм гадаадад өндөр боловсрол эзэмшсэн залуу Эрчим хүчний сайдаар томилогдоод энэ том салбарыг авч явах гэж байгаад бас нэг талаасаа бахархаж, нөгөө талаасаа энэ бол маш сайн үзэгдлээ гэж хэлэхээр байна. Энд Монгол Ардын Нам маш том итгэл хүлээлгэж байна.

Тэгээд хамгийн гол нь одоо багаа шахааны хүмүүсээр биш мэргэжлийн чадварлаг хүмүүсээр бүрдүүлбэл өмнөө тавьсан зорилгоо хэрэгжүүлж чадна шүү гэж хэлмээр байна. Тэгээд одоо хамгийн түрүүнд том том төслүүдийг урагшлуулах ажил нэн чухал. Манай Засгийн газрын хувьд хамгийн гол зорилт бол ер нь л би ч анх хэлж байсан. Ажлын байр, ажлын байр, ажлын байр гэж. Тэгэхээр энэ том төслүүд урагшлаад, V цахилгаан станц гээд эрчим хүчний салбартай холбоотой энэ эрс өөрчлөлтийг өөрөө бас залуу хүний хувьд энэ салбарт ингээд хүлээн зөвшөөрөгдсөн хүний хувьд хийгээрэй. 4 жилийн дараа бол үнэхээр өөрийнхийгөө ч, энэ Засгийн газраа ч, мөрийн хөтөлбөрөө ч хэрэгжүүлж чадсан тийм ажлыг хийсэн байна гэдэгт би өөрт чинь их итгэлтэй байгаа шүү. Тэгээд амжилт хүсье.

М. Энхболд: - М. Оюунчимэг гишүүн үг хэллээ. Д. Сарангэрэл гишүүн асуулт тавьж, үг хэлье.

Д. Сарангэрэл: - За та бүхэн маань бүгд мэргэжлийн, эрүүл мэндийн, хөдөө аж ахуй, эрчим хүчний, барилгын салбарын хүмүүс учраас салбарынхаа өмнө тулгамдсан асуудлыг биднээс илүү мэдэж байгаа. Тийм учраас надад бол та бүхэндээ захиж зөвлөх зүйл байхгүй.

Монгол Ардын Намд ард түмэн итгэл үзүүлсэн. Бид та бүхэндээ мөн адил итгэж томилох гэж байна. Тийм болохоор би та бүхнийгээ итгэлийг зүтгэлээр хариулна гэдэгт итгэлтэй байна. Тэгээд би Эрчим хүчний сайдаар нэр дэвшиж байгаа П. Ганхүүдээ хандаж ганцхан зүйл хэлэх гэсэн юм.

Нийслэлийн алслагдсан хороо Хан-Уул дүүргийн 12 дугаар хороо гэж байгаа юм. XXI зуунд 36 өрхийн. П. Ганхүү нэр дэвшигчээ. 36 өрхийн 150 хүн 1 жил шахам харанхуйд сууж байна. Би энэ асуудлыг хамгийн түрүүнд таныг барьж аваасай гэж хүсч байна. Танд би хандаж албан бичиг үйлдсэн байгаа. Энийг одоо би танд гардуулъя. Бусдаар бол би та дөрөвтөө итгэж байна.

Нам бол долоо хэмжиж, нэг огтлох зарчмаар та бүхнийг итгэл хүлээлгэж энд оруулж ирж үгийг чинь сонсч, мөн Улсын Их Хурлын гишүүдтэйгээ хэлэлцүүлж байна. Тийм болохоор би та бүхнийгээ итгэлийг зүтгэлээр хариулна гэдэгт итгэлтэй байна. Маш их баярлалаа.

М. Энхболд: - Д. Сарангэрэл гишүүн үг хэллээ. Г. Занданшатар гишүүн алга байна. 5 минутын дараа санал хураалт явагдана. Гишүүд танхимдаа ирье. Х. Нямбаатар гишүүн асуулт тавьж, үг хэлье.

Х. Нямбаатар: - Шинээр томилогдох гэж байгаа сайддаа ажлын амжилт хүсье. Сая Сонгинохайрхан дүүргээс сонгогдсон гишүүд хэлсэн учраас би үгээ товчилъё. Нийслэлийн хэмжээнд 8 мянган өрх айл одоо өнөөдөр гэрэл цахилгаангүй байгаагаас 6200 нь Сонгинохайрхан дүүрэгт байгаа. Тэгээд нэг ийм шинэ нэр томьёо гарсан. Шинээр томилогдож байгаа сайд аа. Энэ юу гэвэл шагийн ток гэдэг ийм ойлголт одоо энэ гэр хорооллуудад байдаг. Өөрөөр хэлбэл өөрсдөө өндөр хүчдэлээс буулгаж ирсэн токоо дамжуулж айл өрхүүдэд 50-иас 60 мянган төгрөгөөр сард ингээд дамжуулж зардаг ийм айл өрхүүд бий болсон. Тэгээд сүүлдээ энэ маань бас нөгөө ачааллаа даахаа болиод гал цахилгааны аюул хүртэл гарч байгаа ийм тохиолдлууд байгаа. Тийм учраас энэ шагийн ток гэдэг ойлголтыг халах тал дээр хамгийн түрүүнд ажил зохион байгуулж өгөөчээ.

Тэгээд өнөөдөр Сонгинохайрхан дүүрэг дээр 4.5 орчим тэрбум төгрөгийн зураг төсвийн ажлууд хийгдсэн. Танай яаман дээр байгаа. Та өөрөө ч бас энэ талын мэдээлэл авсан байх. Энэ 4.5 орчим тэрбум төгрөгөөр нөгөө хүчдэлийн уналттай, за мөн гэрэл цахилгаанд огтоос холбогдоогүй айл өрхүүдийг ингээд холбох энэ ажлууд бэлэн ингээд байгаа. Энийг л одоо ойрын үед хийж хэрэгжүүлээрэй. Тэгээд сая бас Д. Сарангэрэл гишүүний адилаар бас бид нар энэ Сонгинохайрхан дүүргээс сонгогдсон гишүүд танд одоо энэ талаар бас албан бичгээр уламжилъя. Тэгээд танд ажлын өндөр амжилт хүсье. Баярлалаа.

М. Энхболд: - Х. Нямбаатар гишүүн үг хэллээ. Гишүүд асуулт тавьж, хариулт авч, үг хэлж дууслаа. Одоо санал хураалт явагдана.

Байнгын хорооноос гаргасан саналын дагуу Монгол Улсын Засгийн газрын гишүүн – Эрчим хүчний сайдаар Пүрэвжавын Ганхүүг томилох саналыг дэмжье гэсэн томьёоллоор санал хураалт. За санал хураалт явагдаж байна.

53 гишүүн санал хураалтад оролцож, 47 гишүүн дэмжиж, 88.7 хувиар санал дэмжигдлээ.

Монгол Улсын Их Хурлын чуулганы хуралдааны дэгийн тухай хуулийн 37 дугаар зүйлийн 7 дугаарт заасны дагуу Монгол Улсын Засгийн газрын зарим гишүүдийг томилох тухай Улсын Их Хурлын тогтоол батлагдсанд тооцож байна.

Засгийн газрын зарим гишүүдийг томилох тухай Улсын Их Хурлын тогтоолыг би та бүхэнд уншиж танилцуулъя. Монгол Улсын Засгийн газрын зарим гишүүдийг томилох тухай. Монгол Улсын Үндсэн хуулийн 25 дугаар зүйлийн 1 дэх хэсгийн 6 дахь заалт, 39 дүгээр зүйлийн 3 дахь хэсэг, Монгол Улсын Их Хурлын тухай хуулийн 14 дүгээр зүйлийн 14.3.6 дахь заалт, Монгол Улсын Их Хурлын чуулганы хуралдааны дэгийн тухай хуулийн 37 дугаар зүйлийн 37.7 дахь хэсэг, Монгол Улсын Засгийн газрын тухай хуулийн 21 дүгээр зүйлийн 21.1 дэх хэсэг, Монгол Улсын Засгийн газрын бүрэлдэхүүний тухай хууль, санал хураалтын дүнг үндэслэн Монгол Улсын Их Хурлаас ТОГТООХ нь:

Нэг. Монгол Улсын Засгийн газрын гишүүн, Монгол Улсын сайдаар доор дурдсан хүмүүсийг томилсугай.

Нэгдүгээрт, Монгол Улсын Засгийн газрын гишүүн – Барилга, хот байгуулалтын сайдаар Гомбосүрэнгийн Мөнхбаярыг;

Хоёр. Монгол Улсын Засгийн газрын гишүүн – Хүнс, хөдөө аж ахуй, хөнгөн үйлдвэрийн сайдаар Пүрэвийн Сэргэлэнг;

Гурав. Монгол Улсын Засгийн газрын гишүүн – Эрчим хүчний сайдаар Пүрэвжавын Ганхүүг;

Дөрөв. Монгол Улсын Засгийн газрын гишүүн – Эрүүл мэндийн сайдаар Аюушийн Цогцэцэгийг.

Хоёр. Энэ тогтоолыг 2016 оны 7 дугаар сарын 30-ны өдрөөс эхлэн дагаж мөрдүсэй гэсэн ийм тогтоол байна.

Тогтоолын эцсийн найруулга дээр саналтай гишүүн байна уу? Эцсийн найруулгыг сонссонд тооцлоо.

Шинээр сонгогдсон Засгийн газрын гишүүдэд баяр хүргэе. Та бүхэнд ажлын амжилт хүсэн ерөөе. /алга ташив/

Монгол Улсын Засгийн газрын гишүүд бүгд томилогдож, Засгийн газар бүрэн бүрэлдэхүүнээрээ ажиллах боломж бололцоо бүрдэж байгаа. Үүнтэй холбогдуулж Ерөнхий сайд Ж. Эрдэнэбат чуулганы хуралдаанд үг хэлнэ. Ерөнхий сайд Ж. Эрдэнэбат таныг индэрт урьж байна.