Монгол Улсын Их Хурлын долоо дахь удаагийн сонгуулиар байгуулагдсан Улсын Их Хурлын анхдугаар чуулганы 2016 оны 7 дугаар сарын 29-ний өдөр /Баасан гараг/-ийн нэгдсэн хуралдааны гар тэмдэглэл (стр. 37 )

Санхүүгийн зохицуулах хорооны эрх зүйн байдлын тухай хуулийн 11 дүгээр зүйлийн 11.2 дахь хэсэг, Монгол Улсын Их Хурлын чуулганы хуралдааны дэгийн тухай хуулийн 45 дугаар зүйлийн 45.2 дахь хэсгийг үндэслэн Монгол Улсын Их Хурлаас ТОГТООХ нь:

Нэг. Дэмбэрэлдашийн Баярсайханыг Санхүүгийн зохицуулах хорооны орон тооны гишүүнээр томилсугай.

Хоёр. Энэ тогтоолыг 2016 оны 7 дугаар сарын 30-ны өдрөөс эхлэн дагаж мөрдсүгэй.

Эцсийн найруулга дээр саналтай гишүүн байна уу? За эцсийн найруулгыг сонссонд тооцлоо.

Шинээр сонгогдсон Санхүүгийн зохицуулах хорооны орон тооны гишүүн Д. Баярсайханд баяр хүргэе. Танд цаашдын ажлын амжилтыг хүсэн ерөөе.

Тав. Үндэсний статистикийн хорооны даргыг томилох тухай асуудал

Одоо дараагийн асуудалд оръё. Үндэсний статистикийн хорооны даргыг томилох тухай асуудалд оръё.

Статистикийн тухай хуульд заагдсаны дагуу Үндэсний статистикийн хорооны даргад Улсын Их Хурлын дарга нэр дэвшүүлэх ёстой. Би та бүхэнд нэр дэвшигчийг танилцуулъя.

Статистикийн тухай хуулийн 13 дугаар зүйлийн 1 дэх хэсгийг үндэслэн Үндэсний статистикийн хорооны даргад Аюушийн Ариунзаяаг нэрийг нь дэвшүүлж байна.

А. Ариунзуяа 1980 онд Улаанбаатар хотод төрсөн. 1996-1999 онд Москвагийн Олон улсын харилцааны их сургууль, Холбооны Бүгд коллежийг тус тус төгссөн. 1999-2005 онд Холбооны Бүгд Хановерын их сургуульд улс төр, нийгэм, түүх судлаар мастер, 2014-2015 онд Удирдлагын академид төрийн захиргааны менежментээр магистрын зэрэг хамгаалсан. Улмаар Америкийн Нэгдсэн Улс, Энэтхэг, Австри зэрэг орнуудад мэргэжил дээшлүүлж байсан.

Тэрээр 2005-2013 онд Монгол даатгал компанид хүний нөөц, даатгалын менежерээр ажиллаж байсан. 2013 оноос Монгол Ардын Намын Удирдах зөвлөлд Намын байгуулалт, стратеги, төлөвлөлтийн газрын дарга, Эдийн засгийн хөгжлийн бодлогын газрын дарга, Нийгэм, эдийн засгийн бодлогын газрын даргаар тус тус ажиллаж байсан байна.

А. Ариунзаяаг нэр дэвшүүлэхдээ Статистикийн тухай хуулийн 13 дугаар зүйлийн 13.2 дахь хэсэгт заасны дагуу Үндэсний статистикийн хорооны даргад мэргэжлийн хувьд, эдийн засагчийн хувьд, удирдлагын эзэмшсэн ажлын арга барилын хувьд тэнцэх хүн гэж үзэж түүнийг энэ албан тушаалд нэрийг нь дэвшүүлж байна.

Нэр дэвшигчийн талаар Эдийн засгийн байнгын хороо санал, дүгнэлт гаргасан байгаа. Энэ дүгнэлтийг Их Хурлын гишүүн Д. Сумъяабазар танилцуулна. Д. Сумъяабазар гишүүнийг индэрт урьж байна.

Д. Сумъяабазар: - Улсын Их Хурлын дарга, эрхэм гишүүд ээ,

Статистикийн тухай хуулийн 13 дугаар зүйлийн 1 дэх хэсэгт заасны дагуу Улсын Их Хурлын даргаас өргөн мэдүүлсэн Үндэсний статистикийн хорооны даргаар Аюушийн Ариунзаяаг томилуулах саналыг Эдийн засгийн байнгын хороо 2016 оны 7 дугаар сарын 29-ний өдрийн хуралдаанаар хэлэлцээд Улсын Их Хурлын даргын саналыг дэмжсэн санал, дүгнэлтийг Улсын Их Хурлын нэгдсэн хуралдаанд оруулж хэлэлцүүлэхээр санал нэгтэй шийдвэрлэлээ.

Аюушийн Ариунзаяа нь 1980 онд Улаанбаатар хотод төрсөн. 1996-1999 онд Москвагийн Олон улсын харилцааны их сургууль, Холбооны Бүгд коллежи, 2014-2015 онд Удирдлагын академийг төгсөж, 1999-2005 онд Холбооны Бүгд Хановерын их сургуульд улс төр, нийгэм, түүх судлаар мастер тус тус хамгаалжээ. Улмаар Улмаар Америкийн Нэгдсэн Улс, Энэтхэг, Австри зэрэг орнуудад мэргэжил дээшлүүлсэн байна.

Тэрээр 2005-2013 онд Монгол даатгал компанид хүний нөөц, даатгалын менежер, 2013 оноос Монгол Ардын Намын Удирдах зөвлөлд Намын байгуулалт, стратеги, төлөвлөлтийн газрын дарга, Эдийн засгийн хөгжлийн бодлогын газрын дарга, Нийгэм, эдийн засгийн бодлогын газрын даргаар тус тус ажиллаж иржээ.

Аюушийн Ариунзаяаг нэр дэвшүүлэхдээ Статистикийн тухай хуулийн 13 дугаар зүйлийн 13 штрих 2 дахь хэсэгт заасныг баримталсан болно.

Хэлэлцүүлгийн явцад Улсын Их Хурлын гишүүн С. Чинзориг тус хороо Засгийн газрын харьяанд очсон үеийн статистик мэдээллийн үнэн зөв байдлыг нягтлах, ядуурал болон инфляцийн түвшин бодитой буурсан эсэхийг тодруулах зэрэг саналыг тус тус гаргаж байлаа.

Нэр дэвшигчийн анкет, тогтоолын төсөл, холбогдох бусад материалыг та бүхэнд тараасан болно.

Улсын Их Хурлын эрхэм гишүүд ээ,

Аюушийн Ариунзаяаг Үндэсний статистикийн хорооны даргаар томилох асуудлаар Эдийн засгийн байнгын хорооноос гаргасан санал, дүгнэлтийг хэлэлцэн шийдвэрлэж, тогтоолын төслийг баталж өгөхийг Та бүхнээсээ хүсье.

Анхаарал тавьсан явдалд баярлалаа.

М. Энхболд: - Д. Сумъяабазар гишүүнд баярлалаа. Санал оруулсан Улсын Их Хурлын дарга болон Байнгын хорооны санал, дүгнэлт, нэр дэвшигчээс асуух асуулттай гишүүн байна уу? За Д. Цогтбаатар гишүүнээр тасаллаа. Б. Энх-Амгалан гишүүн асуултаа тавъя.

Б. Энх-Амгалан: - За асуулт алга. Саналаа хэлчихье. За эзэмшсэн мэргэжил, ажлын туршлага, дадлага ямар ч байсан энэ ажлыг хариуцаад явна гэж бүрэн найдаж байна.

Өвөө нь анх Статистикийн газрын дэд даргаар анх төрийн албаны гараагаа эхэлсэн байсан. П. Жасрай гуай. Ээж нь энэ Статистикийн газар ажиллаж байсан. Эгч нь ажиллаж байсан гээд ийм удам дамжсан статистикийн хүмүүс байна. Тийм учраас энэ ажлыг маш хариуцлагатай сайн хийгээрэй гэж нэр дэвшигч А. Ариунзаяад захья.

Энэ улс оронд яг болоод байгаа нөхцөл байдлуудын хүрээнд хичнээн хүн одоо ажлын байргүй болсон юм бэ? Ядуурдын түвшин хэд байгаа юм бэ. Энэ Монгол Улсад бүртгэлтэй байгаа аж ахуйн нэгжүүд чинь хэд нь дампуурсан байна вэ. Ер нь бол энэ гэмт хэргийн золиос болж байгаа нөхдүүдийн тоо яг зөв гарч байна уу, үгүй юу. Энэ одоо хавдраар болон бусад энэ өвчлөлөөр нас барж байгаа хүмүүсийн тооны статистик судалгаа хэр бодитой байна вэ гэсэн энэ олон статистик мэдээллүүдийг маш зөвөөр нь гаргаж эргэж Улсын Их Хуралд, энэ түмэн олонд танилцуулаарай гэж бас танд хүсэх байна. Ингээд таны ажилд амжилт, сайн сайхныг хүсье. Баярлалаа.

М. Энхболд: - Б. Энх-Амгалан гишүүн үг хэллээ. Ж. Энхбаяр гишүүн асуултаа тавъя.

Ж. Энхбаяр: - Ажлын их амжилтыг хүсэн ерөөе. Энэ хүний өвөө Монголын ард түмний хайртай хүү, төр нийгмийн зүтгэлтэн П. Жасрай гэдэг хүн байсан. Энийг Монголын ард түмэн бүгд мэднэ.

Тэгээд өвөөгийнхөө ажиллаж байсан, ажлын гараагаа эхэлж байсан тэр газар очиж энэ салбарыг удирдах болж байгаад үнэхээр чин сэтгэлийн баяр хүргэе. Ард түмэн юу хүсдэг вэ гэвэл бодит үнэнийг л хүсдэг. Статистикийн төв газар өөрөө энэ бодит үнэн мэдээллийг олон түмэнд хүргэдэг. Үндсэн чиг үүрэг нь энэ.

Бид ард түмнийг бодит мэдээллээр хангах ёстой. Төөрөгдүүлж болохгүй. Монголчууд бид нийгэм, эдийн засгийн туйлын амаргүй хүнд үеийг даван туулна. Томоохон сорилтыг бид хамтдаа ард гэтэлнэ. Энд юу хэрэгтэй гэвэл бид нарт бодит зөв чиг хэрэгтэй. Бодит мэдээлэл хэрэгтэй.

Тэгэхээр нэр дэвшигчээс ард түмэндээ бодит мэдээллийг өгөөрэй. Төр засагтаа бодит мэдээллийг өгөөрэй. Ний нуугүй хэлэхэд сүүлийн хэдэн жил улс төржсөн, бодит мэдээллийг төөрөгдүүлсэн, нуун дарагдуулсан олон зүйлийг бид амсаж байсан, харж байсан. Энэтэй холбоотойгоор төр засаг, төсөв мөнгөний бодлого алдаатай явж ирсэн. Энэний үр дүнд Монгол Улс нийтээрээ нийгэм, эдийн засгийн гүнзгий хямралд орсон байгаа нь энэ байгууллагатай бас тодорхой хэмжээнд холбогдолтой гэдгийг, холбоотой гэдгийг бид бас мартаж болохгүй. Мэдээлэл бодит байж оношлогоо зөв хийгдэнэ, бодлого, үйл ажиллагаа зөв явагдана гэж.

Тэгэхээр энэ үйл хэрэгтээ танд амжилт хүсэхийг хүсч байна. Нутгийн ард түмэн чинь харж байна. Монголын ард түмэн харж байна. Өвөөгийнхөө үйл хэргийг амжилттай үргэлжлүүлээрэй гэж танд амжилт хүсье.

М. Энхболд: - За Ж. Энхбаяр гишүүн үг хэллээ. Д. Цогтбаатар гишүүн асуултаа асууя.

Д. Цогтбаатар: - Надад бас асуулт байхгүй. А. Ариунзаяадаа амжилт хүсмээр байна. Дэмжмээр байна.

Яг сая Ж. Энхбаяр гишүүн хэлчихлээ л дээ. Статистик гэдэг бол улс орны эдийн засгийн амин судас. Энэ дээр худлаа мэдээлэл явж байгаа бол бид нар эдийн засгийн зөв бодлого боловсруулах боломжгүй болж байгаа.

Ер нь бол алдаатай бодлого явуулахад хамгийн том үүрэг гүйцэтгэх юм бол алдаатай буюу санаатай худлаа мэдээлэл. Статистик тийм байж болохгүй. Таалагдахгүй байсан ч үнэн мэдээлэл бид нарт хэрэгтэй. Энэ дээрээ үндэслээд сая бас хэлж байна. Зөв тэр оношлогоо нь явах ёстой. Би энийг онцлоод хэлмээр байна. Бүр дахин хэлмээр байна. Яагаад гэвэл эдийн засгийн бодлогыг бид нар боловсруулахад таалагдахгүй байсан ч үнэнийг үнэнтэй нь нүүрэлдэж байж л бид нар энэ хүндрэлийн ард гарна гэдгийг хэлмээр байна. Ариунзаяа дарга энэ дээр таалагдсан таалагдаагүй улс төрөөс ангид үнэн мэдээллийг гаргадаг байх ёстой гэдэг ийм санааг энэ завшааныг ашиглаж хэлмээр байна.